ەلەكتر قۇرىلعىلارىن شىعاراتىن زاۋىت جاڭا سەرىكتەستەر ىزدەستىرۋدە
قازىر ەكىباستۇزداعى گ ر ە س- تەردەن ۇلكەن كولەمدە تاپسىرىس العان. بۇگىندە زاۋىت 50 پايىز قۋاتىندا جۇمىس ىستەپ تۇر. سوندىقتان جاڭا سەرىكتەستەر ىزدەستىرۋدە. مۇندا 700 گە جۋىق ادام تۇراقتى ەڭبەك ەتەدى. تولىق قۋاتىنا قوسىلعاندا، تاعى جۇزدەگەن جۇمىس ورنى اشىلماق.
ەلەنا بەلەنتسيەۆا، زاۋىت ديرەكتورى:
- بىزدەگى ەڭ نەگىزگى ماسەلە جۇمىس ورنىن ساقتاپ قالۋ. سول ارقىلى كومپانيامىزدىڭ اكتيۆىن كوبەيتەمىز. سوندىقتان تاپسىرىس الىپ، زاۋىتتىڭ قارقىنىن قازىرگىدەن تۇسىرمەۋگە تىرىسامىز. باسەكەگە توتەپ بەرۋ ءۇشىن زاۋىت جۇمىسشىلارى ەلەكتر جابدىقتارىنىنىڭ ساپاسىن جىل سايىن ارتتىرىپ كەلەدى. سول ءۇشىن ەلەكتر- مونتاجداۋشىلار گەرمانيا مەن فرانسياعا بارىپ وقۋ- تاجىريبەدەن ءوتىپ تۇرادى. ناتيجەسىندە بۇرىن شەت ەلدەن الىناتىن ترانسفورماتورلار زاۋىتتىڭ وزىندە جاسالىپ، جينالادى.
ەلەكتر قۇرىلعىلارىن شىعاراتىن ەلىمىزدەگى باسقا كاسىپورىندارعا قاراعاندا بۇل زاۋىت كلاستەرلىك جۇيەمەن جۇمىس ىستەيدى. ۇساق تۇيمەشەلەر مەن ىلمەكتەرگە دەيىن شىعارادى. ءتىپتى كەن ورىندارىنا ەنەرگيا بەرەتىن ۇلكەن ترانسفورماتورلاردى دا جينايدى. ال مۇنىڭ ءبارى قازاقستاندىق شيكىزاتتان جاسالعان. كەن ورىندارىنا ەنەرگيا وتكىزۋگە ارنالعان ترانسفورماتور بولشەگىنىڭ ءار ءتۇرىن قۇراستىرادى. وعان سۇرانىس تا جوعارى.
اقتوبە وبلىسى 25 قۇرىلعىعا تاپسىرىس بەرگەن. وڭىردەگى تاۋار وندىرۋشىلەردى قولداپ، ولاردىڭ ءونىمىن وتكىزۋ ءۇشىن وبلىستىق كاسىپكەرلەر پالاتاسى دا ءتۇرلى جوبا- جوسپارلار جاساۋدا. مامانداردىڭ ايتۋىنشا، كاسىپورىندار اراسىندا تۇتىنۋ باعىتىندا ءوزارا تىعىز ارىپتەستىك ورناعان جاعدايدا تاۋار كولەمى كەمىمەيدى.
www.24.kz
