بەردىبەك ساپاربايەۆ استانادان شىقپايتىن ءبىلىم ءمينيسترىن سىنادى
رەفورما قۋعىش ءبىلىم ءمينيسترىن قاتال سىنعا العان ۆيتسە- پرەمەر، استانادا وتىرىپ الىپ ايماقتاعى بىلىقتى بىلمەيتىن ءسارىنجىپوۆتىڭ شاڭىن قاقتى.
- قانشا پروتسەنت قالدى جاستار جۇمىسسىز؟
-4-3.
- وتىرىك ايتاسىڭ، 7 پايىز.
- بىلمەيسىڭ.
بۇگىن ءبىلىم ءمينيسترى بار جەتىستىگىن جايىپ تاستاپ ۆيتسە- پرەمەردىڭ كوزىنە تۇسۋگە تىراشتانعان. ءبىراق، ويلارى ىسكە اسپادى. سەبەبى، ۇكىمەتتە الەۋمەتتىك سالاعا ونىڭ ىشىندە بىلىمگە جاۋاپتى بەردىبەك ساپاربايەۆ قىرۋار اقشا بولىنگەن عىلىمي ىزدەنىستەردىڭ كورمەدەن ارى اسا الماعانىنا قىنجىلىس ءبىلدىردى. ماسەلەن، ەكى جىلدا بيۋدجەتتەن 42 ميلليارد تەڭگە بولىنگەنىمەن بىردە ءبىر جوبا ىسكە اسپاپتى. ءسارىنجىپوۆتى سىناۋدان باستاعان ساپاربايەۆتىڭ وزگە دە ساۋالدارى كوپ بولىپ شىقتى.
بەردىبەك ساپاربايەۆ، ق ر پرەمەر- ءمينيسترىنىڭ ورىنباسارى:
- بىرىنشىدەن، ءبىلىم ستاندارتى قاشان بىتەدى؟ ەڭ بولماسا باستاۋىش مەكتەپتەردە. ەكىنشى سۇراق، وقۋلىقتار. وسىلاي جىلدا اۋىستىرىپ جۇرە بەرەمىز بە؟ ءۇشىنشى سۇراق قاشىقتىقتان وقىتۋعا قاتىستى.
- ا، جولداس مينيستر، ايت؟
ال ءمينيستردىڭ بايانداماسى تاستاي. ماقتانىپ ايتقان جوسپارلارىنىڭ بارلىعى ازىرشە، قۇجات جۇزىندە. باس مۇعالىم ورتا مەكتەپتەردەگى ءبىلىم ستاندارتىن جىل سوڭىنا دەيىن جاڭارتامىز دەپ ۋادە بەردى. ورتا جولدا توقتاعان 12 جىلدىق ءبىلىم بەرۋدى دە، قايتا جالعاستىرماق. ياعني، بالا مەكتەپكە دەيىن مىندەتتى تۇردە 1 جىل دايىندىقتان وتەدى دە، ءارىقاراي 11 سىنىپتى تولىق ءتامامدايدى. ال، تالاي داۋعا تۇزدىق بولعان وقۋلىق ماسەلەسى كەلەسى جىلى تۇبەگەيلى شەشىلەدى ەكەن.
اسىلان ءسارىنجىپوۆ، ءبىلىم جانە عىلىم ءمينيسترى:
- وقۋلىقتاردى ساتىپ الۋ، جەتكىزۋ كوكتەمدە باستالادى. قىركۇيەككە دەيىن تولىق قامتيمىز كىتاپپەن.
بەردىبەك ساپاربايەۆ، قر پرەمەر- ءمينيسترىنىڭ ورىنباسارى:
- «بولۋى مۇمكىن» دەگەن اڭگىمەنى دوعارىڭىز. تاعى قايتالايمىن. قىركۇيەك ەمەس، تامىزعا دەيىن كىتاپ بولۋى كەرەك.
ساپاربايەۆتىڭ وقۋلىققا شۇيلىگۋىنىڭ ءجونى بار. بىلتىر اتا- انالار وقۋ جىلىنىڭ ورتاسىنا دەيىن كىتاپ ىزدەپ، دۇكەندەردىڭ تابالدىرىعىن توزدىرعان بولاتىن. ۇزىن - سونار كەزەك كۇتكەن مىڭداعان ادام ىزدەگەنىن تاپپاي اۋرە- سارساڭ بولعان. كەيىن مينيسترلىك وقۋلىق تاپشىلىعىنا ۋاقتىلى تاپسىرىس بەرمەگەن جەرگىلىكتى اكىمدىكتەردى كىنالاعان ەدى. بىرنەشە وبلىستى باسقارعان سوڭ، شىنايى احۋالدى بىلەتىن بەردىبەك ساپاربايەۆ بولسا بۇعان ءسارىنجىپوۆتىڭ ءوزىن ايىپتادى.
بەردىبەك ساپاربايەۆ، ق ر پرەمەر- ءمينيسترىنىڭ ورىنباسارى:
- مينيسترلىك اكىمدىكتەرمەن جۇمىس ىستەمەيدى. قاعازبەن جانە تەلەفونمەن جۇمىس ىستەيدى. ادامدارىڭىز اۋدانعا، وبلىستارعا بارمايدى. مەن بىلەم مۇنى.
«وبلىستارداعى جاعدايدى بىلمەيسىڭدەر» دەپ شۇيلىككەن ۆيتسە- پرەمەرگە ءبىلىم ءمينيسترى تۇك دەمەدى. كەرىسىنشە، كەمشىلىكتەردى قاتقىل ۇنىمەن كوزگە شۇقىپ كورسەتكەن بەردىبەك ساپاربايەۆقا العىس ايتۋمەن بولدى. ال 12 جىلدىق ءبىلىم بەرۋدىڭ توقتاتىلۋىنا پرەزيدەنت قارسى شىققان سوڭ، ءسارىنجىپوۆ ەندى ونى ونى قالايدا جالعاستىرامىن دەپ قايتا بەلسەنىپ وتىر. ءبىراق، باسىنان داۋ ارىلماعان جوبانىڭ قاشان ىسكە اسىرىلاتىنى بەلگىسىز.
«КТК» تەلەارناسى
