ون ەكى جىلدىق ءبىلىم بەرۋدە مەكتەپ الدىنداعى ءبىر جىل دايارلىق قاراستىرىلادى - ا. ءسارىنجىپوۆ
بۇل تۋرالى ق ر ءبىلىم جانە عىلىم مينيسترلىگىنىڭ القا ءماجىلىسى الدىنداعى بريفينگتە اتالعان ۆەدومستۆونىڭ باسشىسى اسلان ءسارىنجىپوۆ ءمالىم ەتتى.
وسى ورايدا مينيستر ەلباسى نۇرسۇلتان نازاربايەۆ ۇكىمەتتىڭ كەڭەيتىلگەن وتىرىسىندا ءبىلىم سالاسىن جاڭارتۋ باعدارلاماسىن جالعاستىرۋدى تاپسىرعانىن ەسكە سالىپ ءوتتى.
«ءبىز بولاشاق ەكونوميكا ءۇشىن كادرلاردى دايارلاپ، ساپالى ءبىلىم بەرۋىمىز قاجەت. سوندىقتان دا وسى سالانىڭ باعدارلامالارى بۇدان ارى قاراي دا دامىتىلادى. ورتا ءبىلىم بەرۋ قۇرىلىمىنا توقتالاتىن بولساق، ءبىز پرەزيدەنتتىڭ تاپسىرماسى بويىنشا ءبىر ايدىڭ ىشىندە جاڭا ۇسىنىستاردى ەنگىزۋىمىز شارت. ۇسىنىستار حالىقارالىق تالاپتارعا سايكەستىككە قاتىستى بولادى. ءبىز 12 جىلدىق ءبىلىم بەرۋ جاعىنا قاراي جىلجيتىن بولامىز. بۇعان كوشۋ باعىتى 11 جىلدىق ءبىلىم پليۋس 1 جىل مەكتەپ الدىنداعى دايىندىق اياسىندا ىسكە اسىرىلادى»، - دەدى مينيستر.
ا. ءسارىنجىپوۆتىڭ ايتۋىنشا، قازىرگى كەزدە مەكتەپكە دەيىنگى دايارلىق باعدارلاماسى قازاقستاندا 6 جاستاعى بارلىق بالالاردىڭ 95 پايىزىن قامتىپ وتىر.
«ءبىز مەكتەپ الدىنداعى دايارلىق باعدارلاماسىن جاڭارتۋدى جاقسارتۋ باعىتى بويىنشا جۇرەتىن بولامىز»، - دەدى ۆەدومستۆو باسشىسى.
