ەلىمىزگە شەتەلدىك جۇمىس كۇشىن تارتۋعا بەرىلەتىن رۇقساتتار اقىلى بولۋى مۇمكىن
بۇل تۋرالى كەشە ماجىلىستە «ق ر كەيبىر زاڭنامالىق اكتىلەرىنە حالىقتىڭ كوشى- قونى جانە جۇمىسپەن قامتىلۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ تانىستىرىلىمى بارىسىندا ءمالىم بولدى.
دەنساۋلىق ساقتاۋ جانە الەۋمەتتىك دامۋ ۆيتسە- ءمينيسترى داۋلەت ارعىندىقوۆتىڭ ايتۋىنشا، جاڭا زاڭ جوباسىمەن شەتەلدىك جۇمىس كۇشىن تارتۋ بويىنشا ادىستەمەلەردى جەتىلدىرۋ ءۇشىن 4 باعىت ۇسىنىلىپ وتىر. بۇل رەتتە ەڭ الدىمەن وزدىگىنەن جۇمىسقا ورنالاسۋ ءۇشىن شەتەلدىك جۇمىس كۇشىنىڭ كەلۋ ءتارتىبى جەتىلدىرىلەدى. ولار ءۇشىن ەكونوميكانىڭ باسىم باعىتتارىنىڭ تىزبەسى ايقىندالادى. سونىمەن قاتار، شەتەلدىك جۇمىس كۇشى كۆوتادان تىس، رۇقساتسىز، ماماندىققا لايىقتىلىعى تۋرالى انىقتاما بويىنشا، سونداي- اق ۇكىمەتپەن ايقىندالعان قاجەتتى ماماندىقتار ءتىزىمى بويىنشا كەلە الادى.
«ەكىنشىدەن، جۇمىس بەرۋشىلەر تاراپىنان شەتەلدىك جۇمىس كۇشىن تارتۋ ءتارتىبى جەتىلدىرىلەدى. قازىرگى جاعدايعا كەلسەك، بۇندا جالپىلاما كۆوتا ۇسىنىلاتىن ەدى. ءبىز بۇنى سالا- سالا بويىنشا باسىمدىقتارعا وراي سارالاندىرۋدى ۇسىنامىز. وسىعان وراي، شەتەلدىك جۇمىس كۇشىن تارتۋدا اقىلى رۇقساتتار ەنگىزۋ دە ۇسىنىلادى. بۇل ءوز كەزەگىندە مەملەكەتكە تولەنەتىن وتەماقى رەتىندە قارالادى. سونىمەن ءبىر مەزگىلدە رۇقساتتار بەرۋدىڭ اشىقتىعىن قامتاماسىز ەتۋ ماقساتىندا ونى حالىققا قىزمەت كورسەتۋ ورتالىقتارىنان جۇزەگە اسىرۋ كوزدەلەدى»، - دەدى داۋلەت ارعىندىقوۆ.
ۆيتسە- ءمينيستردىڭ ايتۋىنشا، رۇقساتتار ستاۆكاسى نەگىزىنەن جۇمىسشىلاردىڭ بىلىكتىلىگىنە، سالانىڭ باسىمدىقتى تۇردە ايقىندالۋىنا قاتىستى بەلگىلەنۋى مۇمكىن. ياعني، سالا باسىم رەتىندە ايقىندالسا، وعان تارتىلاتىن جۇمىسشىنىڭ بىلىكتىلىگى دە جوعارى بولۋى ءتيىس، ءوز كەزەگىندە وعان بولىنەتىن رۇقساتتار تولەمى دە تومەندەيدى. «بۇل ەكونوميكالىق تەتىكتىڭ ءبىر ءتۇرى. ويتكەنى، جۇمىس بەرۋشى ءۇشىن رۇقسات الۋ اقىسى جوعارى بولعان سايىن، ول جەرگىلىكتى نارىقتان كادر ىزدەپ، ونى دايارلاۋعا وزدەرى دە مۇددەلى بولۋى كەرەك»، - دەدى ۆيتسە- مينيستر.
اۆتور: قانات مامەتقازى ۇلى
