ۇكىمەت ءوز موينىنداعى الەۋمەتتىك مىندەتتەمەلەردى تولىق كولەمدە ورىندايدى
بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە ق ر دەنساۋلىق ساقتاۋ جانە الەۋمەتتىك قورعاۋ ءمينيسترى تامارا دۇيسەنوۆا ءمالىم ەتتى.
«ۇكىمەت تولىق كولەمدە وزىنە العان مىندەتتەمەلەردى ورىندايتىن بولادى. بۇعان قوسا قازاقستاندا قىزمەتكەرلەردىڭ جۇمىستان بوساتىلۋىن بولدىرماۋ بويىنشا شارالار قابىلدانىپ، جۇمىسسىزداردى جانە وزدىگىنەن ءونىمسىز ەڭبەكپەن شۇعىلداناتىنداردى جۇمىسپەن قامتۋعا جاردەمدەسۋ بويىنشا شارالار جۇزەگە اسىرىلادى»، - دەدى ول.
سونداي- اق مينيستر ءوز سوزىندە اعىمداعى جىلدىڭ 1 - قاڭتارىنان باستاپ بارلىق زەينەتاقى تولەمدەرى 9 پايىزعا، ال بازالىق زەينەتاقى جانە جاردەماقى تولەمدەرى 7 پايىزعا وسكەنىن اتاپ ءوتتى.
«جالپى 2015 - جىلى الەۋمەتتىك تولەمدەرگە 1,6 ترليون تەڭگە، دەنساۋلىق ساقتاۋ سالاسىنا 678 ميلليارد تەڭگە قاراستىرىلادى. ال وسى 1,6 ترليون تەڭگە زەينەتاقى مەن باسقا دا تولەمدەرگە باعىتتالادى. سوندىقتان جىل سوڭىنا دەيىن حالىق الەۋمەتتىك تولەمدەردى دەر ۋاقىتىندا الىپ وتىراتىن بولادى»، - دەدى مينيستر.
اۆتور: مارلان جيەمباي
