الماتى جاستارى مەترودا اباي اندەرىن شىرقادى
100 گە تارتا جاس ورەن بايقوڭىر ستانساسىنان اباي ستانساسىنا دەيىنگى ارالىقتا جولاۋشىلارعا تەگىن كونسەرت ۇيىمداستىرىپ، دومبىرامەن اقىن ابايدىڭ «كوزىمنىڭ قاراسى» ءانىن اۋەلەتە شىرقادى.
اباي ستانساسىندا ت. جۇرگەنوۆ اتىنداعى ونەر اكادەمياسى جانىنداعى كوللەدج بەن قىزدار پەداگوگيكالىق ۋنيۆەرسيتەتىنىڭ ستۋدەنتتەرى «جەلسىز تۇندە جارىق اي» تۋىندىسىن ورىندادى.
«ق ر پرەزيدەنتى نۇرسۇلتان نازاربايەۆ جاقىندا جاستار تۋرالى زاڭ قابىلداعان بولاتىن. جاڭا زاڭنامادا 3-باپ بىزگە سەرپىن بەردى. وندا قازاقستان رەسپۋبليكاسىنداعى مەملەكەتتىك جاستار ساياساتى جاستاردىڭ رۋحاني، مادەني، ءبىلىم الۋى، كاسىبي قالىپتاسۋى مەن دەنە تاربيەسىن دامىتۋى ءۇشىن الەۋمەتتىك- ەكونوميكالىق، قۇقىقتىق، ۇيىمداستىرۋشىلىق جاعدايلار مەن كەپىلدىكتەر جاساۋ، بۇكىل قوعام مۇددەسى ءۇشىن ولاردىڭ شىعارماشىلىق الەۋەتىن اشۋ ماقساتىندا جۇزەگە اسىرىلادى دەلىنگەن. ۇلتتىق ءداستۇر مەن قۇندىلىقتار ۇرپاقتار ساباقتاستىعى ارقىلى كەيىنگى بۋىنعا جەتۋى كەرەك. ءبىز وسى ارقىلى ءوزىمىزدىڭ زاڭعا دەگەن كوزقاراسىمىزدى تانىتىپ، ونى ءتۇسىندىرۋدى ماقسات تۇتتىق. سوندىقتان، اباي اندەرىن تاڭدادىق. اباي اندەرىنىڭ تىم بولماسا ەكى اۋىزىن بىلمەيتىن ادام جوق»، - دەدى جاستار ساياساتى دامىتۋ مەملەكەتتىك قورىنىڭ ديرەكتورى سوۆەت سەيىتوۆ.
جولاۋشىلار تاراپىنان جاستاردىڭ ونەرى ۇلكەن قوشەمەتكە يە بولدى.
