ەلىمىزگە نەگىزىنەن قىتاي مەن تۇركيا ەلدەرىنەن جۇمىسكەرلەر تارتىلىپ وتىر

بۇگىن ماجىلىستە «ق ر كەيبىر زاڭنامالىق اكتىلەرىنە حالىقتىڭ كوشى-قونى جانە جۇمىسپەن قامتىلۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىرعان دەنساۋلىق ساقتاۋ جانە الەۋمەتتىك دامۋ ۆيتسە- ءمينيسترى داۋلەت ارعىندىقوۆ وسىلاي ءمالىم ەتتى.

ۆيتسە-ءمينيستردىڭ ايتۋىنشا، قازىرگى تاڭدا مەملەكەت باسشىسىنىڭ تاپسىرماسىنا سايكەس، كومپانيالاردا ساناتتارعا وراي قازاقستاندىق كادرلارمەن قامتىلۋدىڭ ەڭ تومەنگى كورسەتكىشتەرى بەكىتىلگەن.

«بۇگىنگى كۇنى كومپانيالاردا ءبىرىنشى باسشىلار مەن ولاردىڭ ورىنباسارلارى، قۇرىلىمدىق بولىمشەلەر باسشىلارى بويىنشا 70 پايىزعا دەيىن جەرگىلىكتى كادرلاردان جاساقتالۋى شارت. ال بىلىكتى جوعارى ءبىلىمدى كادرلار مەن ماماندارعا كەلسەك، ولارداعى قازاقستاندىقتاردىڭ قامتىلۋى 90 پايىز بولۋى ءتيىس.

بۇگىنگى كۇنگى جاعدايعا كەلسەك، ەلىمىزدىڭ اۋماعىندا شەتەلدىك جۇمىس كۇشىن تارتۋعا 31,9 مىڭنان استام رۇقساتتار بەرىلگەن. ولاردىڭ باسىم بولىگىن ءۇشىنشى ساناتتاعى شەتەلدىك جۇمىسشىلار، ياعني ءتيىستى ءبىلىمى بار ماماندار قۇرايدى، ال بىلىكتى جۇمىسشىلار سانى 30 پايىزدان اسادى. بۇدان كەيىنگى ورىنداردا قۇرىلىمدىق بولىمشەلەر باسشىلارى -20,5 پايىز جانە ءبىرىنشى باسشىلار مەن ولاردىڭ ورىنباسارلارى -6,5 پايىز»، - دەدى ۆيتسە- مينيستر.

ونىڭ ايتۋىنشا، رەسپۋبليكامىزدا تارتىلعان شەتەلدىك جۇمىسكەرلەردىڭ نەگىزگى ۇلەسىن قىتاي مەن تۇركيا ەلدەرى قۇراپ وتىر.

اتاپ ايتقاندا، بارلىق تارتىلعان شەتەلدىك جۇمىس كۇشىنىڭ 31 پايىزى قىتايعا، 14 پايىزى تۇركياعا تيەسىلى. «ەگەر سالا بويىنشا جىكتەسەك، ولاردىڭ باسىم بولىگى قۇرىلىس سالاسىندا (جالپى شەتەلدىك جۇمىس كۇشىنىڭ 60 پايىزى)، سودان كەيىنگى ورىنداردا تاۋ-كەن ءوندىرىسى (13,4 پايىز) جانە وڭدەۋشى ونەركاسىپ (5,4 پايىز) سالاسىندا جۇمىس ىستەۋدە»، - دەيدى د. ارعىندىقوۆ.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى