ەر ەسىمى - ەل ەسىندە: باۋىرجان مومىش ۇلىنىڭ ءومىرى مەن شىعارماشىلىعىنا ارنالعان جيىن ءوتتى - فوتو
«شارانىڭ باستى ماقساتى - ەلىمىزدىڭ بولاشاعى جاستارىمىزدىڭ بويىندا پاتريوتتىق تاربيە قالىپتاستىرۋ، ەلىنىڭ ەرتەڭى، ازات تاڭى ءۇشىن ەڭبەك ەتكەن ازاماتتاردىڭ، ءوز كەۋدەسىن وققا توسقان جاۋجۇرەك باتىر اپا-اعالارىمىزدىڭ ەسىمدەرىن ۇرپاقتاردىڭ ساناسىندا ساقتاۋ، جاۋىنگەر اقىن-جازۋشىلارىمىزدىڭ شىعارمالارىن جاستار ساناسىنا ءسىڭىرۋ، باتىرلارىمىزدىڭ قانداي تار جول، تايعاق كەشۋلەردەن وتكەندىگىن ۇعىندىرىپ، ءتۇسىندىرۋ بولىپ تابىلادى»، - دەيدى شارانىڭ ۇيىمداستىرۋشىسى فيزيكا-ماتەماتيكا فاكۋلتەتى دەكانىنىڭ تاربيە ءىسى جونىندەگى ورىنباسارى ءلاززات رسالينا.
دوڭگەلەك ۇستەل باۋىرجان مومىش ۇلىنىڭ ومىرىنەن سىر شەرتەتىن بەينەروليك كورسەتىلىمىمەن باستالدى. شارا بارىسىندا فيزيكا-ماتەماتيكا فاكۋلتەتىنىڭ بەلسەندى ستۋدەنتتەرى باۋىرجان مومىش ۇلىنىڭ ءومىر-دەرەگى، شىعارماشىلىعى، قاناتتى سوزدەرى جانە دە ەرەن ەڭبەكتەرى جونىندە باياندامالار جاساپ، ارنايى سلايدتار دايىنداپ كورسەتسە، اقىنجاندى قىزدار ءوز شىعارماشىلىقتارىنان جاۋىنگەر جازۋشىعا ارناۋ ولەڭدەرىن وقىدى.
سونىمەن قاتار، ستۋدەنتتەر جاۋىنگەرلىك مىنەز- قۇلىقتىڭ قالىپتاسۋىنا، ەلدىك پەن ەرلىكتى دارىپتەۋگە، جاستاردىڭ بويىندا پاتريوتتىق رۋحتى تاربيەلەۋگە ىقپال ەتەتىن كورنەكتى جازۋشىنىڭ «وفيتسەر كۇندەلىگى»، «ءبىر ءتۇننىڭ تاريحى»، «ءبىزدىڭ سەميا»، «موسكۆا تۇبىندەگى شايقاس»، «مايدان»، «گەنەرال پانفيلوۆ»، «كۋبا اسكەرلەرى»، «ادام قايراتى»، «زا نامي موسكۆا»، «ۇشقان ۇيا» جانە ت. ب. وقىعان شىعارمالارىنان العان اسەرلەرىمەن ءبولىسىپ، حالىق قاھارمانى باۋىرجان مومىش ۇلىنىڭ جەكە تۇلعالىق قاسيەتى مەن ەرلىگىن تىلگە تيەك ەتتى.
دوڭگەلەك ۇستەل اياسىندا قاتىسۋشىلار قىزدار ۋنيۆەرسيتەتى عىلىمي كىتاپحانا ۇجىمىنىڭ دايىنداۋىنداعى جازۋشى شىعارماشىلىعىنا ارنالعان كورمەنى تاماشالادى. وعان باۋىرجان مومىش ۇلىنىڭ ءار جىلداردا شىققان تۋىندىلارى مەن ءبىرتۋار قولباسشى تۋرالى جازىلعان بەلگىلى قالامگەرلەردىڭ كىتاپتارى قويىلدى.
اۆتور: گۇلميرا عوسمانالي
