اسكەري وقۋ ورىندارىنا قابىلدانۋعا ۇمىتكەرلەرگە قويىلاتىن جاڭا تالاپتار قارالدى
اسكەري كەڭەس وتىرىسىنا قۇرلىق اسكەرلەرى باس قولباسشىسىنىڭ ورىنباسارلارى، وڭىرلىك قولباسشىلىقتار اسكەرلەرىنىڭ، اسكەر تەكتەرىنىڭ قولباسشىلارى قۇرلىق اسكەرلەرى باس قولباسشىسى باسقارماسىنداعى اسكەر تەكتەرى مەن قىزمەتتەردىڭ باستىقتارى قاتىستى.
بۇل تۋرالى قورعانىس مينيسترلىگىنىڭ باسپا ءسوز قىزمەتى حابارلادى.
ق ر قورعانىس ءمينيسترىنىڭ قارۋلى كۇشتەردى دامىتۋ جونىندەگى تالاپتارى اياسىندا جاۋىنگەرلىك ازىرلىكتى قولداۋ مەن اسكەرلەردىڭ جاۋىنگەرلىك جاتتىعۋلارىن ءارى قاراي جەتىلدىرۋگە ەرەكشە كوڭىل ءبولىندى.
اسكەري كەڭەس باستى كۇش-جىگەردى اسكەرلەردى حالىقارالىق قاۋىپسىزدىككە تونگەن قاۋىپ-قاتەرگە توتەپ بەرۋ ءۇشىن اسكەري بولىمدەر، بولىمشەلەر، قۇرىلىمدىق بولىمشەلەردىڭ ءىس جۇزىندەگى ارەكەتتەرىن جەتىلدىرۋگە باعىتتاۋ قاجەتتىگىن بەلگىلەپ بەردى.
سونىمەن قاتار، اسكەري كەڭەس اسكەري ءتارتىپ پەن قۇقىق ءتارتىبى ماسەلەسىنە دە ايرىقشا نازار اۋداردى. جاڭا قىلمىستىق كودەكستى قولدانۋ ەرەكشەلىكتەرىن ەسكەرە وتىرىپ، ەلباسى ايقىنداپ بەرگەن «قۇقىق بۇزۋشىلىققا نولدىك توزىمدىلىك» باعدارى ەرەكشە ورىن الاتىن بولادى. ال اسكەري قىزمەتشىلەر ءۇشىن قولدانىستاعى زاڭناما تالاپتارىنا سايكەس ءومىر ءسۇرۋ كۇندەلىكتى تىرشىلىك قالپىنا اينالۋى ءتيىس.
اسكەري كەڭەستىڭ كۇن تارتىبىندە اسكەري ۋنيۆەرسيتەتتەر، اكادەميالارعا كانديداتتاردى ىرىكتەپ جىبەرۋ ماسەلەسى جانە اسكەري قىزمەتشىلەردى قورعانىس مينيسترلىگى مەن مەملەكەت باسشىلىعىنىڭ كوتەرمەلەۋىنە ۇسىنۋ ماسەلەلەرى قارالدى. القا مۇشەلەرى ءار كانديداتتى جەكە قاراستىرىپ، ولاردىڭ قابىلەتتەرى، قىزمەتتىك تاجىريبەسى مەن سىڭىرگەن ەڭبەگىن ەسكەردى.
سونىمەن قاتار، اسكەري كەڭەس قۇرلىق اسكەرلەرىنىڭ ءارى قاراي دامۋ باعىتتارىن، اۋقىمدى وقۋ-جاتتىعۋلارعا بولىنەتىن قاراجات، جۇمىلدىرىلاتىن كۇشتەر مەن مەرزىمدەرىن، ۇلى جەڭىستىڭ 70 جىلدىعىنا ارنالعان اسكەري پارادقا قاتىساتىن قۇرلىق اسكەرلەرىنىڭ توپتارىن دايارلاۋ ءتارتىبىن ناقتىلادى.
