اۋىل شارۋاشىلىعى مينيسترلىگىندەگى جەمقورلاردىڭ «قارا ءتىزىمى» جاسالدى

بۇل تۋرالى كەشە ءمالىم بولدى.

وسى كۇنى ا ش م مەن «جاڭارۋ» سىبايلاس جەمقورلىققا قارسى جالپى ۇلتتىق قوزعالىسى» ىنتىماقتاسۋعا كەلىسىپ، ءتيىستى مەموراندۋمعا قول قويدى. وعان سايكەس، ەكى مەكەمە اۋىل شارۋاشىلىعى سالاسىنداعى كوررۋپتسيالىق كورىنىستەرمەن بىرلەسىپ كۇرەسپەك.

سوڭعى كەزدەرى جەمقورلىققا قاتىستى داۋ- جانجالدار اۋىل شارۋاشىلىعى مينيسترلىگىنىڭ تۇڭلىگىن داۋىلداي جەلپىلدەتىپ تۇرعانى ءمالىم. وسىعان وراي ۆەدومستۆو 2013-2014 - جىلدار ىشىندە ا ش م-نىڭ ورتالىق جانە باعىنىستى ۇيىمدارىنىڭ قىزمەتكەرلەرى جاساعان سىبايلاس جەمقورلىق قۇقىق بۇزۋشىلىقتارىنا تالداۋ جۇرگىزىپ شىعىپتى.

سونىڭ ناتيجەسىندە، «وسى ۋاقىت ارالىعىندا تارتىپتىك جانە قىلمىستىق جاۋاپكەرشىلىككە تارتىلعان ادامداردىڭ اتى-جوندەرى ناقتى جازىلعان ءتىزىم جاسالدى». بۇعان قوسا، وتكەن جىلى ەڭ كوپ كوررۋپتسيالىق قۇقىق بۇزۋشىلىقتارعا جول بەرگەن وبلىستىق اۋماقتىق ينسپەكتسيا باسشىلارى جۇمىستارىنان قۋىلۋى مۇمكىن: ولاردى تارتىپتىك جاۋاپكەرشىلىككە تارتۋ بويىنشا بۇگىندە شارالار قابىلدانۋدا ەكەن.

مينيسترلىك وزىندەگى كوررۋپتسيالىق قىلمىس فاكتىلەرى بويىنشا بارلىق اقپاراتتى توقسان سايىن بارلىق اۋماقتىق بولىمشەلەر مەن باعىنىستى ۇيىمدارىنا ماعلۇمات رەتىندە نازارعا الۋى ءۇشىن جولدايتىن بولعان. وسىلايشا، سالا شەنەۋنىكتەرى ارام ارەكەتتەرى اشكەرەلەنگەن وزدەرىنىڭ ارىپتەستەرى ۇلگىسىندە نەنى جاساۋعا جول بەرىلمەيتىندىگىن، ال وعان بارعاندار قانداي جازا تارتاتىندىعىن ۇعىنۋلارى ءتيىس.

قابىلدانعان شارالاردىڭ ارقاسىندا 2014 - جىلى قىلمىستىق جاۋاپكەرشىلىككە تارتىلعان قىزمەتكەرلەردىڭ سانى 2013 - جىلمەن سالىستىرعاندا 45  پايىزعا تومەندەگەن. اتاپ ايتقاندا، ەگەر الدىڭعى جىلى ا ش م- نىڭ 31 ادامى جەمقورلىعى ءۇشىن سوتتالسا، بىلتىر سالانىڭ كوررۋپتسيونەر شەنەۋنىكتەرىنىڭ تەك 17 سى تۇتىلىپتى.

جيىندا جاريا ەتىلگەنىندەي، قازىرگى كەزدە مينيسترلىك 2015-2025 - جىلدارعا ارنالعان «جەمقورلىققا قارسى ستراتەگيانى» جۇزەگە اسىرۋدا. «سىبايلاس جەمقورلىققا قارسى كۇرەس بويىنشا ىشكى جوسپار» بەكىتىلدى.

باس پروكۋراتۋرامەن بىرلەسىپ وتكىزىلگەن اۋديتتىڭ قورىتىندىسى كورسەتكەنىندەي، اۋىل شارۋاشىلىعىنا جاۋاپتى شەنەۋنىكتەر اراسىندا ەڭ كەڭ تارالعان بۇزۋشىلىقتار قاتارىنا «جەرگىلىكتى اتقارۋشى ورگاندار ىسكە اسىراتىن باعدارلامالار بويىنشا اۋىل شارۋاشىلىعى سۋبسيديالارىن نەگىزسىز بەرۋ نەمەسە ەش سەبەپسىز، بەرمەي تاستاۋ فاكتىلەرى» تانىلعان. بۇل سالاعا جەمقورلىق تامىرىن تەرەڭ جايىپ، شىرماپ تاستاعانداي.

ا ش م بۇدان قالاي اقتالادى؟ كوررۋپتسيالىق ارام قارەكەتتەرگە جول بەرمەۋ ماقساتىندا -  «اۋىل شارۋاشىلىعى تاۋار وندىرۋشىلەرىن سۋبسيديالاۋدىڭ جاڭا مەحانيزمى ازىرلەنىپ، ەنگىزىلۋدە». سونداي- اق سۋبسيديالاۋدى مەملەكەتتىك قىزمەتتەر رەەسترىنە قوسۋ قاراستىرىلىپ وتىر. سونىمەن بىرگە، «قازاگرو» ۇلتتىق حولدينگىنىڭ قارجىلىق ينستيتۋتتارىنا باعىتتالاتىن نەسيەلىك وتىنىمدەردى راسىمدەۋ جانە مەملەكەتتىك دوتاتسيالاردى بەرۋ پروتسەدۋرالارىن اۆتوماتتاۋ جوسپارلانۋدا.

جەكە جانە كوممۋنالدىق بازارلار قىزمەتىندە اكىمشىلىك توسقاۋىلداردى جويۋ بويىنشا جۇمىستار جۇرگىزىلۋدە دەپ حابارلاندى. ايتپەسە، وتاندىق ءونىم وندىرۋشىلەرگە بۇل بازارلارعا كىرۋ ءالى كۇنگە مۇڭ بولۋدا ەكەن.

ايحان ءشارىپ

«ايقىن»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى