اسكەريدىڭ ءولىم الدىنداعى حاتى دەلىنگەن جازبا جاريالاندى

سىزدىقوۆتىكى دەلىنگەن حاتتا ەكى فاميليا اتالادى. ماتىندە: «مەنىڭ باسقا امالىم قالعان جوق، بۇل قورلىققا ودان ءارى توزە المايمىن. (...) ولاردى قالايدا جازالايدى جانە ادامدارمەن جۇمىس ىستەۋدەن شەتتەتەدى دەپ ۇمىتتەنەمىن، ءبىراق مەن ونى كورە المايمىن»، - دەلىنگەن. ايتا كەتەيىك، وقيعا ورنىنان ءولىم الدىندا جازىلعان حاتتىڭ تابىلعانى بۇعان دەيىن حابارلانعان بولاتىن.

قورعانىس مينيسترلىگى عيماراتى ماڭىندا اۆتوكولىك 10- اقپان كۇنى كۇندىز جارىلدى. مينيسترلىكتىڭ باسپا ءسوز قىزمەتىنىڭ حابارلاۋىنشا، جارىلىس ق ر قورعانىس مينيسترلىگى اسكەري بولىمدەرىنىڭ ءبىرىنىڭ قىزمەتشىسى، پودپولكوۆنيك، 1975-جىلى تۋعان سىزدىقوۆ ارمان قايدار ۇلى وتىرعان Chevrolet ماركالى اۆتوكولىكتە بولدى. العان جاراقاتىنان ول وقيعا ورنىندا قايتىس بولدى، كوشەدەن ءوتىپ بارا جاتقانداردىڭ ەشقايسىسى زارداپ شەككەن جوق. بۇل دەرەك بويىنشا قىلمىستىق ءىس قوزعالدى.

ارمان سىزدىقوۆتىڭ قورعانىس مينيسترلىگىنىڭ اقپاراتتاندىرۋ جانە تەلەكوممۋنيكاتسيا باس باسقارماسىندا جۇمىس ىستەگەنى بەلگىلى بولدى. كۋاگەرلەر مارقۇمنىڭ قولىندا گراناتانىڭ مۇرىندىعى بولعانىن كورگەنىن ايتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى