قازاق حالقى سۇيىكتى گەر- اعاسىن اقتىق ساپارعا شىعارىپ سالدى
بۇگىن الماتىداعى م. اۋەزوۆ اتىنداعى اكادەميالىق دراما تەاترىندا قازاق ءتىلىنىڭ جاناشىرى، ۇلت ماقتانىشى گەرولد بەلگەردى باقيلىق شىعارىپ سالۋ ءراسىمى ءوتتى.
جازۋشىمەن قوشتاسۋعا قازاقستان جازۋشىلارى، قالامداستارى، قازاقستانداعى نەمىس ەلشىلىگىنىڭ وكىلدەرى، ءىزباسارلارى، الماتى جۇرتشىلىعى كەلدى.
قايعىلى قازاعا كوڭىل ايتا كەلگەن ق ر مادەنيەت جانە سپورت ءمينيسترى ارىستانبەك مۇحامەدي ۇلى ءوز سوزىندە مەملەكەت باسشىسى نۇرسۇلتان نازاربايەۆتىڭ كوڭىل ايتۋ حاتىن جەتكىزە كەتتى.
«قۇرمەتتى قاۋىم، ۇلت ءداستۇرىن، ءتىلىن، ءدىنىن ساناسىنا ءسىڭىرىپ وسكەن قازاقتىڭ ءبىرتۋار ۇلى بەلگەر ءوزىنىڭ سانالى عۇمىرىندا تۋىپ- وسكەن جەرى قازاقستانعا ەرەكشە سۇيسپەنشىلىكپەن قاراعانىن ءبارىمىز جاقسى بىلەمىز. گەرولد بەلگەر تەك قانا ەلىمىزدىڭ ءتىلى مەن ءداستۇرىن ماداقتاپ وتكەن ەمەس. سونىمەن قاتار، ونىڭ قالامگەرلىك، پۋبليتسيستىك مۇراسىنان بولەك، قوعامدىق بەلسەندىلىگىن دە ەرەكشە اتاپ ەتۋىمىز كەرەك.
گەر- اعا شىعارماشىلىعىنان باسقا قازاقستان پارلامەنتى دەپۋتاتى، ۇلتتىق كەڭەستىڭ مۇشەسى، جوعارى مەملەكەتتىك ناگرادالاردىڭ يەگەرى بولعان. ارينە، مەملەكەت باسشىسىنىڭ گەرولد بەلگەر شىعارماشىلىعىنا دەگەن ەرەكشە قۇرمەتىن جاقسى بىلەمىز. ول كىسىنىڭ قازاسى تۋرالى سۋىق حابار كەلگەسىن، ەلباسى نۇرسۇلتان ءابىش ۇلى نازاربايەۆ ءوزىنىڭ كوڭىل ايتۋ حاتىن جىبەردى. سونى وقۋعا رۇقسات ەتىڭىزدەر.
«گەرولد كارلوۆيچتىڭ قازاقستانعا دەگەن شەكسىز سۇيىسپەنشىلىكپەن ورىلگەن ءومىرى شىنايى پاتريوتيزمنىڭ ۇلگىسى بولىپ سانالادى. ونىڭ شىعارماشىلىق مۇراسى ءبىزدىڭ مادەنيەتىمىزدىڭ باعا جەتپەس يگىلىگىنە، ال ءومىر جولىنداعى رۋحاني ار- نامىس قاعيداتتارى ءار كەزەڭنىڭ ۇرپاقتارىنا جىگەر بەرەتىن باعىت- باعدارعا اينالدى. گەرولد كارلوۆيچتىڭ ەڭبەگى جوعارى مەملەكەتتىك ماراپاتتارمەن اتاپ ءوتىلدى، پرەزيدەنتتىڭ بەيبىتشىلىك پەن رۋحاني كەلىسىم سىيلىعىنىڭ لاۋرەاتى بولدى. ونىڭ جارقىن بەينەسى قازاقستاندىقتاردىڭ جادىندا ماڭگى ساقتالاتىن بولادى»، - دەدى ق ر مادەنيەت جانە سپورت ءمينيسترى ارىستانبەك مۇحامەدي ۇلى مەملەكەت باسشىسىنىڭ كوڭىل ايتۋ حاتىن جەتكىزە وتىرىپ.
جينالعان قاۋىم جازۋشىنىڭ ادەبيەت پەن كوركەم ءسوز جانرىنداعى ەرەن ەڭبەگىن، الار ۇلەسىن، ادامي قاسيەتتەرىن تىلگە تيەك ەتتى.
ەستەرىڭىزگە سالا كەتەيىك، جۇرەگى قازاق دەپ سوققان قازاق پۋبليتسيستيكاسىنداعى قۇبىلىس جازۋشى، اۋدارماشى، ادەبيەتتانۋشى گەرولد بەلگەر 81 جاسىنا قاراعان شاعىندا كوز جۇمدى. جازۋشىنىڭ دەنەسى كەڭساي زيراتىنا جەرلەندى.
اۆتور: گۇلميرا عوسمانالي
