اۋىل شارۋاشىلىعى جۇيەسىندە جەمقورلىق قىلمىستارعا جول اشاتىن وسال تۇستار وتە كوپ - مينيستر
مەموراندۋم اياسىندا تاراپتار سىبايلاس جەمقورلىققا قارسى ماسەلەلەردى نىعايتۋ، قوعامداعى سىبايلاس جەمقورلىققا قارسى مادەنيەتتى قالىپتاستىرۋ جونىندە ءوزارا كەلىسىمگە كەلدى.
«بۇگىندە اۋىل شارۋاشىلىعى مينيسترلىگى اتقارىپ وتىرعان كوپتەگەن شارۋالار بار. سولاردىڭ بارلىعىندا اشىقتىقتى قامتاماسىز ەتۋ ماقساتىندا بۇگىنگى كەلىسىمگە كەلىپ وتىرمىز. بىزگە بۇل مەموراندۋم وتە قاجەت. ويتكەنى قوعام قازىر كەيبىر جاعدايدا شەنەۋنىكتەردىڭ سوزىنە سەنە بەرمەيدى. سوندىقتان تىكەلەي جۇمىسقا قاتىسى جوق، ءۇشىنشى تاراپ رەتىندەگى بىرلەستىكتىڭ باقىلاپ وتىرعانى قوعامعا دا ۇلكەن سەنىم ۇيالاتادى»، - دەپ اتاپ ءوتتى شارا بارىسىندا ق ر اۋىل شارۋاشىلىعى ءمينيسترى اسىلجان مامىتبەكوۆ.
ونىڭ ايتۋىنشا، 2013 - جىلمەن سالىستىرعاندا وتكەن جىلى جەمقورلىق بويىنشا قىلمىستىق جازاعا تارتىلعانداردىڭ سانى 45%- عا ازايعان.
«دەگەنمەن، جاسىراتىنى جوق، اۋىل شارۋاشىلىعى جۇيەسىندە جەمقورلىق قىلمىستارعا جول اشاتىن وسال تۇستار وتە كوپ. ماسەلەن، سۋبسيديا بەرۋ بارىسىن ايتۋعا بولادى. قازىرگى كەزدە سۋبسيديالاردىڭ كوپتەگەن مولشەرى جەرگىلىكتى اتقارۋ ورگاندارىنا بەرىلگەن. ونى قوعام بىلە بەرمەيدى. ال ەندى اۋىل شارۋاشىلىعىنا سۋبسيديا دۇرىس بەرىلمەي جاتىر دەگەن اڭگىمە شىقسا، بارلىعى ا ش م دۇرىس جۇمىس جاساماي وتىر دەپ ويلايدى. ا ش م قىزمەتكەرلەرى جەمقورلىقپەن اينالىسىپ جاتىر دەپ تۇسىنەدى. ءبىراق قاتەلىكتەر جەرگىلىكتى اتقارۋ ورگاندارىنىڭ، سولاردىڭ اۋىل شارۋاشىلىق بولىمدەرىنىڭ قىزمەتكەرلەرىنەن كەتەدى. ال ولار ءبىزدىڭ جۇيەمىزگە كىرمەيدى»، - دەپ ءتۇسىندىردى مينيستر.
ءوز كەزەگىندە «جاڭارۋ» بىرلەستىگىنىڭ ءتوراعاسى ورالباي ابدىكارىموۆ مينيسترلىكپەن بىرگە مەملەكەتتىك قىزمەتكەرلەردىڭ قوعام الدىنداعى بەدەلىن كوتەرىپ، جەمقورلىقتىڭ الدىن الۋدا ىنتىماقتاسا قىزمەت ەتۋگە ءازىر ەكەندىكتەرىن ءمالىم ەتتى.
«قازىر ءبىزدىڭ قوعامدا مەملەكەتتىك قىزمەتكەر مىندەتتى تۇردە ۇرلىققا، جەمقورلىققا بارادى دەگەن تەرىس پىكىر قالىپتاسقان. ارينە، وندايلار جوق دەپ ايتا المايمىز. ءبىراق ءبىزدىڭ ماقساتىمىز - مەملەكەت باسشىسى العا قويىپ وتىرعان جەمقورلىققا قارسى ساياساتىن ورىنداۋعا اتسالىسۋ. وسى مەموراندۋم اياسىندا جەرگىلىكتى اۋىل شارۋاشىلىق بولىمدەرىمەن دە تىعىز قارىم- قاتىناس ورناتۋعا ءازىرمىز»، - دەدى ول.
