ا ق ش-تا ءاربىر بەسىنشى بالا كەدەيلىك زاردابىن تارتۋدا

ا ق ش- تىڭ حالىق ساناعى بيۋروسىنىڭ مالىمەتىنە سايكەس بۇل ەلدەگى ءاربىر بەسىنشى بالاعا كومەك اۋاداي قاجەت.

مۇندا 16 ميلليوننان استام جەتكىنشەك ءبىر ءۇزىم نان تابا الماي وتىرعان وتباسىلاردا تۇرادى. 2008 - جىلى قارجى داعدارىسى باستالعانعا دەيىن ولاردىڭ سانى 9 ميلليون بولعان.

نيل سروكا، «امەريكاعا ارنالعان دەموكراتيا» ۇيىمىنىڭ قوعاممەن بايلانىس جونىندەگى ديرەكتورى:

- بىزدە ەكونوميكانى قالپىنا كەلتىرۋ ءىسى مۇلدە كەرەعار احۋالدا ءجۇرىپ جاتىر. مۇنداي جاعدايدا مايلى جىلىك تەك بايقۋاتتى ادامدارعا عانا بۇيىرادى. ال كۇندەلىكتى نانىن ارەڭ تاۋىپ وتىرعان قاراپايىم حالىق ءۇشىن ەشتەڭە وزگەرمەي كەلەدى. ءتىپتى كەيبىر كورسەتكىشتەر بويىنشا جاعداي مۇلدە اۋىرلاپ كەتتى.

ال وسىنداي قىسىلتاياڭ شاقتا قارجى بيرجاسىنداعى كورسەتكىشتەر جاڭا رەكوردتارعا جەتۋدە. ءبىراق بۇدان قارا حالىققا ەش پايدا جوق. امەريكالىقتاردىڭ 1 پايىزى بايىعان ۇستىنە بايىپ جاتىر. ال بالالاردىڭ 20  پايىزى اشتان بۇراتىلىپ، ءبىر ءتىلىم نانعا ءزارۋ.

قۇراما شتاتتار ونەركاسىبى دامىعان 35 ەلدىڭ اراسىندا كەدەيلىك اۋىرتپالىعىن تارتىپ وتىرعان بالالار سانى بويىنشا ەكىنشى ورىندى يەلەنگەن. بۇل كورسەتكىش بويىنشا امەريكا تەك رۋمىنياعا عانا جول بەرەدى.

باراك وباما ورتاشا تاپتىڭ ءال-اۋقاتىن ارتتىرۋ - ءوزى جۇرگىزىپ وتىرعان ىشكى ساياساتتىڭ باسىم باعىتى ەكەندىگىن ايتۋدا. ءبىراق ساراپشىلار: «ەگەر پرەزيدەنت كوپىرمە سوزدەن ناقتى ىسكە كوشپەسە، وندا ەلدە قالىپتاسىپ وتىرعان داعدارىستى جاعداي جاقىن ارادا وڭالمايدى»، - دەپ ەسەپتەيدى.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى