يزرايل اۋرۋحانالارىندا بوس ورىن جوق
بىرنەشە كۇننىڭ ىشىندە قابىلداۋ بولىمدەرىنە اعىلىپ كەلگەن ادامدار مەجەلى كورسەتكىشتەن 350 پايىزعا اسىپ تۇسكەن.
سونىڭ سالدارىنان ناۋقاستار دارىگەرگە كورىنۋ ءۇشىن 12 ساعاتتان كەزەكتە تۇرۋعا ءماجبۇر. دەنساۋلىق ساقتاۋ مينيسترلىگىنىڭ ەسەبىنە سايكەس، مۇنداي كەلەڭسىزدىك ءبىرىنشى رەت ورىن الىپ وتىرعان جوق.
مينيسترلىك سوڭعى 1,5 جىل ىشىندە ەمدەلۋشىلەر سانىنىڭ كوپتىگىنەن 250 جاعدايدا قابىلداۋ بولىمدەرىن جاپتىرۋعا ءماجبۇر بولعان. بۇل ەلدەگى ەمحانالاردا ورىن سانىن ارتتىرماۋ جونىندە 2007 -جىلى قابىلدانعان شەشىمنىڭ ءساتسىز ناتيجەسى بولىپ وتىر.
قازىر جان باسىنا شاققاندا مەديتسينا مەكەمەلەرىندە توسەك-ورىنمەن قامتۋ جاعىنان يزرايل سوڭعىلاردىڭ قاتارىندا تۇر. مۇنداعى ءاربىر مىڭ تۇرعىنعا 2,2 توسەك-ورىن تيەسىلى ەكەن. بەني راۆيۆ، قابىلداۋ ءبولىمىنىڭ دارىگەرى:
- جەدەل كومەك كەرەك 30 ناۋقاسقا ءبىر-اق دارىگەردىڭ قىزمەت كورسەتۋى - دۇرىس ەم قابىلداۋعا ەش مۇمكىندىكتىڭ جوقتىعى. سونداي-اق بۇرىن كەلگەن جاندارعا دا كوڭىل ءبولۋ كەرەك، سوندىقتان ەمدەلۋشىلەر سانى ساعات ساناپ ءوسىپ وتىر.
حارايسي مۇباراك، ەمدەلۋشىنىڭ اكەسى:
- بالام كۇتىپ وتىرعانىنا ەكى كۇن بولدى. اۋرۋحانا ادامدارعا لىق تولى، سوندىقتان كەزەك باياۋ جىلجىپ جاتىر. مۇندا كەلىپ جۇرگەنىمىزگە 15 جىل بولدى. مۇنداي جاعدايدى ءبىرىنشى رەت كورىپ وتىرمىن.
www.24.kz
