استانا اۋەجايىنىڭ پرەزيدەنتى قالا اكىمىنىڭ سىن ەسكەرتپەسىنەن كەيىنگى اتقارىلعان جۇمىستاردى باياندادى
وندا قالالىق كوممۋنالدىق قىزمەتتەردىڭ جۇمىستارى قارالىپ، كاسىپكەرلەردى قولداۋدىڭ ناقتى شارالارى تالقىلاندى، دەپ حابارلادى astana.gov.kz.
- مەملەكەت باسشىسىنىڭ تاپسىرماسىنا سايكەس قازاقستان حالقى اسسامبلەياسىنىڭ 20 جىلدىعىنا وراي ناۋرىز مەيرامى مەن بىرلىك كۇنىن مەرەكەلەۋدى ۇيىمداستىرۋدى قازىردەن باستاپ قولعا الۋ كەرەك. بۇدان باسقا، استانانىڭ ينۆەستيتسيالىق تارتىمدىلىعىن ارتتىرۋ، شاعىن جانە ورتا بيزنەستى ءتيىمدى قولداۋ بويىنشا جۇمىستاردى جالعاستىرۋ قاجەت، - دەدى ادىلبەك جاقسىبەكوۆ.
بۇعان دەيىن وتكەن اپپارات كەڭەستەرىنىڭ بىرىندە ەلوردا اكىمى قالالىق اۋەجايدىڭ جۇمىسىن سىنعا العان بولاتىن. ءا. جاقسىبەكوۆتىڭ اتاپ وتۋىنشە، ءتولقۇجات جانە كەدەن قىزمەتتەرىنىڭ جۇمىسى قاناعاتتانارلىقسىز، تاريفتەر جوعارى جانە قىزمەت كورسەتۋ ساپاسى تومەن. بۇل جولاۋشىلار تاراپىنان كوپتەگەن نارازىلىقتار تۋدىرادى. وسى ورايدا بۇگىن استانانىڭ حالىقارالىق اۋەجايىنىڭ پرەزيدەنتى قايرات جاۋحانوۆ ورىندالعان جۇمىستارعا توقتالدى.
اتاپ ايتقاندا، كەدەندىك باقىلاۋسىز كەلەتىن جولاۋشىلارعا «جاسىل ايماق» ارقىلى ءوتۋ قامتاماسىز ەتىلدى. الداعى ۋاقىتتا قالالىق اۋەجايدىڭ جۇمىسىنا حالىقارالىق دەڭگەيدەگى ساپا ستاندارتتارى ەنگىزىلەتىن بولادى.
نەگىزىنەن، قىزمەت كورسەتۋ سالاسىنا باسىمدىق بەرىلمەك، جولاۋشىلار تەرمينالىن قايتا قۇرۋ جوسپارلانعان. مۇنىمەن قوسا، جولاۋشىلارعا قىزمەت كورسەتۋ سەرۆيسى وزگەرتىلەدى، اۋەجاي اۋماعىندا جۇمىس ىستەيتىن كاسىپورىندارعا الدەقايدا قاتاڭ تالاپتار قويىلاتىن بولادى.
