جامبىل وبلىسىنداعى ءىرى جول اپاتى: اۆتوبۋس جۇرگىزۋشىسى ۇستالدى
باسپا ءسوز قىزمەتىنىڭ مالىمەتىنشە، جول-كولىك وقيعاسىنا قاتىستى ق ر قىلمىستىق كودەكسىنىڭ 345-بابى 4-ءبولىمى بويىنشا سوتقا دەيىنگى تەرگەۋ امالدارى باستالدى. الدىن الا مالىمەت بويىنشا، وڭتۇستىك قازاقستان وبلىسىنىڭ تۇرعىنى بەگالايەۆ ب. ا. باسقارعان اۆتوبۋس كوكتايعاقتىڭ سالدارىنان جولدىڭ شەتىنە قاراي اۋدارىلىپ كەتكەن.
«اۆتوبۋس جۇرگىزۋشىسى قازىرگى تاڭدا ۋاقىتشا قاماۋ يزولياتورىندا وتىر. جول-كولىك وقيعاسىنىڭ سەبەپتەرى انىقتالىپ جاتىر، بىرنەشە سوت ساراپتاماسى تاعايىندالدى»، - دەلىنگەن حابارلامادا.
شىمكەنت قالاسىنا بارا جاتقان اۆتوبۋستىڭ 10 جولاۋشىسى وقيعا ورنىندا قازا تاپتى، قالعاندارىنا مەديتسينالىق كومەك كورسەتىلىپ، تۇرعىلىقتى جەرلەرىنە جەتكىزىلدى، ءۇش ادام پريوزەرسك قالاسىنىڭ ورتالىق اۋرۋحاناسىندا جاتىر.
ەسكە سالا كەتەيىك، جامبىل وبلىسىندا اۆتوبۋستىڭ قاتىسۋىمەن ءىرى جول- كولىك وقيعاسىنىڭ بولعانى بۇعان دەيىن حابارلانعان ەدى. توتەنشە جاعدايلار مينيسترلىگىنىڭ شۇعىل قىزمەتى جول اپاتىنان زارداپ شەككەن ءتورت ادامدى پريوزەرسك قالالىق اۋرۋحاناسىنا جەتكىزدى. ولاردىڭ ۇشەۋى - ەر ادام، اراسىندا قىرعىزستاننىڭ ءبىر ازاماتى بار جانە ءتورتىنشىسى جۇكتى ايەل. تاعى ءبىر زارداپ شەككەن ادام تۋىستارىنىڭ وتىنىشىمەن ەم الۋ ءۇشىن الماتىعا جىبەرىلدى. قىرعىزستان ازاماتى اۋرۋحانادان شىعىپ، ەمحانادا ەمدەلەتىن بولدى. دارىگەرلەردىڭ مالىمەتىنشە، ولار ايەلدىڭ بالاسىن ساقتاپ قالا الدى.
