قازاقستان شوۋ- بيزنەسىندەگى جۇبايلارىن جاسىراتىن جۇلدىزدار - فوتو
ءتىپتى كەيدە، جۇبايىن جاسىراتىندارعا بايلانىستى وزگەنىڭ ار-نامىسىنا تيەتىن سوزدەر دە ايتىپ جاتادى.
ءانشى ايقىن تولەپبەرگەننىڭ ءانىن تىڭداپ جەكە ومىرىنە قىزىعا قارايتىندار سانى كوپ ەكەن. وسىعان دەيىن ايقىن جەكە ءومىرىن اسىرەسە ايەلى جايلى ايتقان ەمەس. ءتىپتى الەۋمەتتىك جەلىدەگى پاراقشالارىنا وتباسى جايلى ايتىپ بەرۋىن سۇراعان تىڭدارماندارىنا بۇل ءانشى اتا-اناسى، ياعني شىققان تەگى جايلى بايانداپ بەرىپ قۇتىلىپ كەتەدى ەكەن.
ءبىر كەزدەرى بۇل ءانشىنى حالىق ماقپال يسابەكوۆامەن دە بايلانىستىرعان بولاتىن. الايدا كەيىننەن ايقىنىڭ ۇيلەنگەنى بەلگىلى بولدى. ءبىراق ءانشى ومىرلىك سەرىگى كىم ەكەنىن ءالى جاسىرادى.
ءتىپتى ايقىن كۇندە ءوزىنىڭ سۋرەتىن سالىپ وتىراتىن الەۋمەتتىك جەلىدەگى پاراقشاسىنا دا ايەلىنىڭ سۋرەتىن سالىپ كورگەن ەمەس.
ءانشى ليدونىڭ دا كۇيەۋىن تەك الەۋمەتتىك جەلىدەگى پاراقشالارىنان ءجيى كورەمىز. ول ءوزىنىڭ سۇحباتتارىندا كۇيەۋى وزىنە جانە بالالارىنا وتە قامقور ءارى مىقتى كاسىپكەر ەكەنىن ايتادى.
ليدو كۇيەۋىن ناعىز ەر دەپ اتايدى. ءانشى العاش كورگەندە رۋسلاننىڭ قىزىقتى اڭگىمەلەرى مەن مىنەزىنە كوڭىلى اۋعانىن دا جاسىرماعان.
ءانشى، اكتريسا ايدا جانتىلەۋوۆا جاقىندا عانا تۇرمىسقا شىقتى. ول دا باسىندا كۇيەۋىمنىڭ سۋرەتتەرىن ەش جەردە جاريالاي المايتىنىن ايتقان بولاتىن. ءبىراق كەيىننەن ينستاگرام پاراقشاسىنا جارىمەن تۇسكەن سۋرەتتەردى سالا باستادى.
دەيتۇرعانمەن ايدا ومىرلىك جارىنىڭ كىم ەكەنىن تولىقتاي ايتۋدان ءالى جاسىرادى. جۋرناليستەردى دە جولاتپايدى.
بەلگىلى پروديۋسەر بايان ەسەنتايەۆا دا قىزدارىنىڭ اكەسىن جاسىراتىن تانىمالداردىڭ ءبىرى. دەسە دە كوپشىلىك باياننىڭ باقىتبەگىن ينستاگرام جەلىسى ارقىلى تانيدى. كاسىپكەر ەكەنىن بىلەدى.
بايان ەسەنتايەۆا ءوز سۇحباتتارىنىڭ بىرىندە «ول مەنىمەن ءتىپتى حالىق كوپ جەرگە بارعىسى كەلمەيدى. ءوزى جايلى كوپ ماعلۇمات بەرگەنىمدى دە قالامايدى. سەبەبى سىرت كوزدىڭ سىنىن جاقتىرمايدى. حالىق ءار ءتۇرلى عوي. قاسىندا تۇرىپ «باياننىڭ كۇيەۋىنىڭ مۇرنى ءداۋ، كوزى قىسىق، بويى الاسا» دەپ ايتسا، ول ىڭعايسىزدانادى. ال مەن ەلدىڭ سىنىن، ءتۇرلى اڭگىمەلەرىنە ۇيرەنىپ قالعام. كەرەگىن الام، ارتىعىن ەلەمەيمىن دە»، - دەگەن بولاتىن.
تانىمال اكتريسا قارلىعاش مۇحامەدجانوۆانىڭ دا تۇرمىسقا شىققانىنا ەكى جىلداي ۋاقىت بولدى. ول - بەلگىلى كاسىپكەر بەكبولات بالعىمبايەۆتىڭ جۇبايى. دەسە دە اكتريسا ءالى كۇنگە كۇيەۋىنىڭ سۋرەتتەرىن الەۋمەتتىك جەلىدەگى پاراقشاسىنا سالمايدى. ول جايلى سۇراقتارعا اشىق جاۋاپ بەرۋدەن باس تارتادى.
جاس اكتريسا ءاليا تەلەباريسوۆا دا جاقىندا عانا تۇرمىسقا شىقتى. كۇيەۋ جىگىت بەلگىلى ءارى بەدەلدى وتباسىنىڭ پەرزەنتى. ەسىمى - ازامات. جاڭادان تانىلىپ كەلە جاتقان اكتريسا ءاليانى تىكۇشاقپەن قىدىرتۋعا ەرتىپ بارىپ، ۇيلەنۋ جايلى ۇسىنىسىن توسىن سىي تۇرىندە اۋەدە جاساعانى بار.
ءاليانىڭ كۇيەۋىمەن بىرگە تۇسكەن سۋرەتتەرىن وزگەلەر تاراتپاسا، وزدەرى جاسىرىن ۇستاعاندى جاقسى كورەدى. ال كوپشىلىك ازاماتتىڭ كاسىپكەر ەكەنىن عانا بىلەدى.
ءانشى ديلناز احماديەۆا دا تۇرمىسقا شىققالى كۇيەۋىن تىڭدارماندارىنان جاسىرىن ۇستاعانداردىڭ ءبىرى. جاقىندا عانا جارىنىڭ سۋرەتىن ينستاگرام پاراقشاسىنا سالعان ەدى.
وندا دا ءانشىنىڭ جارىنىڭ ەسىمى احماد ەكەنى بەلگىلى. ديلنازدىڭ كۇيەۋى دە كاسىپكەر. ودان ارتىق ماعلۇمات جوق.
بەلگىلى اكتريسا اسەل ساعاتوۆا دا تۇرمىسقا شىققان. ءبىراق ول دا جارىن جاسىرىن ۇستايتىنداردىڭ ءبىرى.
ءانشى ءارى ءبيشى ايگەرىم قالاۋبايەۆانىڭ تۇرمىسقا شىققانىنا ءبىراز ۋاقىت بولعان. ءتىپتى ۇزىنقۇلاقتىڭ سوزىنشە، ەكى پەرزەنتى بار. ال ءانشىنىڭ ءوزى جاقىندا عانا ينستاگرام پاراقشاسىنا جۇبايىمەن تۇسكەن سۋرەتىن سالعان.
وندا جاستار نەكە ساقيناسىن كورسەتىپ ءتۇسىپتى. ال كوپشىلىك وسى سۋرەتتەردەن كەيىن ءانشىنى «تۇرمىسقا شىققالى جاتىر» دەپ ءجۇر.
رينات باسيتوۆ جول اپاتىنا ۇشىراعاننان كەيىن ءوسىپ قالعان بالاسى مەن بۇرىنىراق وتاۋ كوتەرگەن جارىنىڭ بارىن ايتقان ەدى. ءانشى «ايەلىمدى كوپ جىلاتتىم. بالامدى دا كوپشىلىكتەن جاسىردىم. وسىدان امان قالسام وتباسىممەن بىرگە بولامىن» دەگەن ەدى. ءانشى ۋادەسىندە تۇرىپ، قازىر ءوز وتباسىمەن تۇرىپ جاتىر.
بەلگىلى ءانشى قايرات نۇرتاس ۇلكەن ساحناعا شىعىپ، ءبىراز تانىلعاننان كەيىن بارىپ وتباسىن جاسىرۋدى ويلاعان سياقتى. سەبەبى ونىڭ تۇڭعىش بەينەبايانىندا ومىردەگى ايەلى سۇيىكتىسىنىڭ ءرولىن ويناعان. ءبىراق ءانشى مەن ونىڭ اناسى ءالى كۇنگە قايرات نۇرتاستىڭ وتباسىن قىزدارىن جاسىرادى. ولار جايلى تولىق ماعلۇمات بەرۋدەن باس تارتادى.
NUR. KZ
