بەيجىڭ استانالىق تىركەۋ الۋ جۇيەسىن جۇمسارتتى
بەيجىڭدە تۇراقتى تىركەۋ الۋ ءۇشىن ۇمىتكەر بەلگىلى ءبىر باللدار سانىن جيناۋى ءتيىس، وندا تۇراقتى جۇمىسقا ورنالاسۋى، تۇرعىن ءۇيىنىڭ جانە الەۋمەتتىك ساقتاندىرىلۋى بولۋى، سونداي-اق قالادا تۇرۋ ۇزاقتىعى ەسكەرىلەدى.
استانالىق تىركەۋ الۋ تۋرالى جاڭا ەرەجەلەر ۋربانيزاتسيانىڭ جاڭا تۇرپاتىن دامىتۋ جونىندەگى رەفورمالار مەن دامۋ ىستەرى جونىندەگى مەملەكەتتىك كوميتەت جوسپارىنا ەنگىزىلدى.
بەيجىڭدىك تىركەۋ ونىڭ يەسىنە نەعۇرلىم ساپالى بىلىمگە، ەڭبەككە ورنالاسۋعا جانە مەملەكەت تاراپىنان الەۋمەتتىك قولداۋدىڭ باسقا دا شارالارىنا قول جەتكىزۋگە جول اشادى.
بۇدان بۇرىن قىتايلىق ەڭبەك ميگرانتتارى قالادا ۋاقىتشا تۇرۋعا عانا رۇقسات الاتىن، بۇل كوپتەگەن ادامداردىڭ استاناداعى ارتىقشىلىقتارعا قول جەتكىزۋگە كەدەرگى جاسادى.
سوڭعى مالىمەتتەر بويىنشا، بەيجىڭنىڭ تۇراقتى تۇرعىندارىنىڭ سانى 20 ميلليون ادامنان اسادى، بۇل لوندون حالقىنان 2,6 ەسە، نيۋ-يورك تۇرعىندارىنان 2,5 ەسە كوپ. قىتاي استاناسى كوپتەگەن مەگاپوليستەر سياقتى حالىقتىڭ شامادان تىس قونىستانۋى جانە اتموسفەرانىڭ لاستانۋى پروبلەمالارىنا تاپ بولۋدا.
رەسۋرستاردىڭ شەكتەۋلى بولۋى سالدارىنان قالا بيلىگى حالىق ءوسىمىن تىركەۋ الۋدىڭ قاتاڭ ەرەجەلەرىمەن شەكتەۋگە تىرىسىپ كەلدى. 2014-جىلى بەيجىڭدە ەلدىڭ باسقا وڭىرلەرىنەن كەلگەن 8 ميلليون ەڭبەك ميگرانتتارى تۇرىپ، جۇمىس جاسادى. قالادا تۇرۋعا رۇقسات الۋدىڭ جاڭا ءتارتىبى ولاردىڭ شىن مانىندە قالا تۇرعىندارىنا اينالۋىنا مۇمكىندىك بەرەدى.
ال حالىقتىڭ ءوسىمىن باقىلاۋدى بەيجىڭ استانانىڭ كەيبىر فۋنكتسيالارىن كورشى وڭىرلەرگە بەرۋ ەسەبىنەن باقىلايتىن بولادى، دەپ سانايدى PanGoal قوعامدىق- ساياسي زەرتتەۋلەر ينستيتۋتىنىڭ زەرتتەۋشىسى ي پەن.
شاڭحايدا، گۋاڭجوۋدا جانە تيانجيندە قازىردىڭ وزىندە تىركەۋ الۋدىڭ بەيجىڭدىك ءتارتىبى جۇمىس ىستەۋدە. ايتالىق، گۋانجوۋدا بالل ۇمىتكەردىڭ ءبىلىم دەڭگەيىنە، داعدىلارىنا جانە الەۋمەتتىك ساقتاندىرۋلار الۋ تاريحىنا قاراي ەسەپتەلەدى. گۋانجوۋدا جىل سايىن 3 مىڭعا تارتا ەڭبەك ميگرانتتارى تۇراقتى تۇرۋعا رۇقسات الادى.
