قازاقستانداي اتامەكەنىمە جەتەتىن جەر جوق
ءوزىنىڭ ايتۋىنشا، 1961-جىلى جانىبەك اۋىلىندا دۇنيەگە كەلگەن. اكەسى ۆلاديمير ميسيۋرين ۇلى وتان سوعىسىنا باستان-اياق قاتىسىپ، اۋەلگىدە زيس، كەيىن ستۋدەبەككەر ايداعان. « قىزىل جۇلدىز» وردەنى، «ەرلىگى ءۇشىن»، «بۋداپەشتى العانى ءۇشىن» مەدالدارىمەن ماراپاتتالعان. اناسى ماريا يۆانوۆنا ون بەس جاسىنان باستاپ ستالينگراد مايدانىنىڭ ەڭ جاقىن تىلى - جانىبەك ستانساسىنداعى اسكەري ماڭىزدى ستراتەگيالىق نىسانداردى قورعاۋعا قاتىسقان.
تاتيانا 1978-جىلى اۋدان ورتالىعىنداعى 1№ ورتا مەكتەپتى اياقتاپ، استراحان قالاسىنداعى قۇرىلىس تەحنيكۋمىندا ءبىلىم الدى. ونى بىتىرگەننەن كەيىن وتىز جىلدىق ەڭبەك ءوتىلى قازىرگى جانىبەك كوللەدجىمەن تىعىز بايلانىستا ءوربىدى. ءوندىرىس ءىسىنىڭ شەبەرى، ارنايى پاندەر مۇعالىمى، ديرەكتوردىڭ تاربيە ءىسى مەن ءوندىرىس ءىسى جونىندەگى ورىنباسارى ءتارىزدى قىزمەتتىك باسپالداقتاردان ءوتتى. 1992-جىلى «كاسىپتىك-تەحنيكالىق ءبىلىم بەرۋ ءىسىنىڭ ۇزدىگى» بەلگىسىمەن ماراپاتتالدى.
«بىزدەر اركەز بىرلىكتە، دوستىقتا ءومىر ءسۇرىپ، تاتار، قىرعىز، ورىس ۇلتىنىڭ وكىلدەرى - ن. پورودنوۆا، ا. شيشلياننيكوۆا، ك. رۋزمەتوۆالار جانى جومارت قازاق حالقىنىڭ قامقورلىعىن، مەيىرىمىن، جان جىلۋىن سەزىندىك. وتباسىنداعى اعايىندى ءۇش قىز ءۇش مەملەكەتتە، ياعني رەسەي، ۋكراينا، قازاقستاندا تۇرىپ جاتىرمىز، تۋىستارىما قىدىرىپ بارعانىمدا، ونداعى ءوز تىرشىلىگىمەن عانا شۇعىلدانىپ، وزگەمەن ءىسى جوق سول ۇلتتىڭ وكىلدەرىنە قاراي وتىرىپ، قازاقتاردىڭ شاڭىراعىنان ءدام تاتقىزباي جىبەرمەيتىن قوناقجايلىلىعى مەن مارتتىگىنە، ءار نارسەگە توزىمدىلىگىنە ءتانتى بولامىن. اپا- جەزدەلەرىمە بارا سالا، ىستىق باۋىرساق پەن بۋىن بۇرقىراتىپ اس اسىپ بەرەمىن. مەن ولارعا بارۋعا جينالعاندا، «سۇزبە مەن جەنت اكەلەرسىڭ» دەيتىنىن قايتەرسىڭ. قىزىم مارينا ۋكراينادا قارجى سالاسىنىڭ قىزمەتكەرى بولىپ جۇمىس ىستەدى، قازىر ول ەلدەگى بەرەكەتسىزدىككە بايلانىستى تۋعان جەرىنە ورالدى. ۇلىم الەكسەي جاڭگىر حان اتىنداعى ب ق ا ت ۋ-دىڭ «ماشينا جاساۋ ءىسى» فاكۋلتەتىن مۇناي-گاز وڭدەۋ تەحنولوگى ماماندىعى بويىنشا اياقتاپ، قازىر اقتوبە مۇناي وڭدەۋ زاۋىتىندا باس تەحنولوگ بولىپ قىزمەت اتقارادى. ول ورىس مەكتەبىندە وقي ءجۇرىپ، قازاق ءتىلىن وتە ەركىن مەڭگەرىپ الدى، ۋنيۆەرسيتەت قابىرعاسىندا جۇرگەندە ءتىل ءبىلۋىنىڭ ارقاسىندا حالىقارالىق، ايماقتىق سەمينارلارعا قاتىسىپ، قازاق تىلىندە باياندامالار وقىدى. رەپەتيتوردىڭ كومەگىنە جۇگىنىپ، اعىلشىن، قىتاي تىلدەرىن مەڭگەردى. بەرەكەلى بىرلىگىمىزدىڭ ءتۇپ نەگىزىندە قازاق حالقىنىڭ تۋمىسىنان ءوز اۋزىنداعىسىن وزگەگە جىرىپ بەرەر مەيماندوستىعى، كەشىرىمشىل، كىشىپەيىل قاسيەتى جاتىر. تاعدىردىڭ ءتۇرلى تەپەرىشىن باسىنان وتكىزگەن قازاقتاردىڭ تالايدىڭ بالاسىن باۋىرىنا باسقانىنا تاريح كۋا. «كەڭ بولساڭ، كەم بولمايسىڭ» دەگەن جاقسى ماتەل بار قازاق حالقىندا. ەلىمىز ەلباسىنىڭ جول باستاۋىمەن تاتۋلىق پەن ىنتىماقتى تۇعىر قىلىپ، قارىشتاپ دامۋدا. قايدا بارسام دا، تۋعان جەرىمە جەتكەنشە تاعات تاپپايمىن»، - دەدى ت. ميسيۋرينا.
اۆتور: ەلجان ەرالى
