كارىم ءماسىموۆ ە ا د ب كەڭەسىنىڭ ءتوراعاسى بولىپ سايلاندى
ە ا د ب باسپا ءسوز قىزمەتىنىڭ اقپاراتىنشا، 6- اقپان كۇنى ماسكەۋدە ەۋرازيا دامۋ بانكى كەڭەسىنىڭ كەزەكتى وتىرىسى ءوتتى. ونىڭ جۇمىسىنا ارمەنيا رەسپۋبليكسى ەنەرگەتيكا جانە تابيعي رەسۋرستار ءمينيسترىنىڭ ورىنباسارى يوسيف يسايان، بەلارۋس رەسپۋبليكاسى قارجى ءمينيسترى ۆلاديمير امارين، قازاقستان رەسپۋبليكاسىنىڭ پرەمەر-ءمينيسترى كارىم ءماسىموۆ، قازاقستاننىڭ قارجى ءمينيسترى باقىت سۇلتانوۆ، قىرعىزستان تاراپىنان - قارجى ءمينيسترى ولگا لاۆروۆا، رەسەي فەدەراتسياسىنىڭ قارجى ءمينيسترى انتون سيلۋانوۆ، ر ف قارجى ءمينيسترىنىڭ ورىنباسارى دميتري پانكين، ال تاجىكستان رەسپۋبليكاسىنىڭ اتىنان قارجى ءمينيسترى ابدۋسالوم كۋربونوۆ قاتىستى.
«بانك كەڭەسى قازاقستان رەسپۋبليكاسىنىڭ وكىلەتتى وكىلى - ق ر پرەمەر-ءمينيسترى كارىم ءماسىموۆتى كەڭەس ءتوراعاسى ەتىپ سايلادى. سونداي-اق دميتري پانكين بانك باسقارماسىنىڭ ءتوراعاسى بولىپ تاعايىندالدى. ول بۇل قىزمەتىنە وسى جىلدىڭ 18- اقپانىندا كىرىسەدى»، - دەلىنگەن ە ا د ب باسپا ءسوز قىزمەتىنىڭ حابارلاماسىندا.
بۇعان قوسا، بانك كەڭەسى باسقارما ءتوراعاسىنىڭ جاڭا ورىنباسارى لاۋازىمىنا ماكسيم كورجوۆتى تاعايىندادى.
بانك كەڭەسى بانكتىڭ 2014-جىلى اتقارعان جۇمىس قورىتىندىسى بويىنشا باسقارمانىڭ جىلدىق ەسەبىن، جيىنتىق تابىس تۋرالى ەسەپتى جانە بانكتىڭ قارجىلىق جاعدايى تۋرالى ەسەپتى بەكىتتى.
ەۋرازيا دامۋ بانكى رەسەي مەن قازاقستاننىڭ باستاماسىمەن 2006-جىلدىڭ قاڭتارىندا قۇرىلعان حالىقارالىق قارجى ۇيىمى.
