پوليتسەيلەر شىندىق اسپابىنان تەكسەرۋدەن وتەتىن بولدى
بىلتىر قابىلدانعان پوليگرافولوگيالىق زەرتتەۋلەر ەرەجەلەرى تۋرالى ۇكىمەتتىڭ قاۋلىسى كۇشىنە ەندى. جىل باسىنان بەرى ىشكى ىستەر مينيسترلىگىنىڭ ورتالىق اپپاراتىندا 40 تان استام ادام پوليگراف سىناعىنان وتكەن.
ماماندار جاڭا تالاپ قىزمەتىنە ادال ءتارتىپ ساقشىلارىن ىرىكتەپ الۋعا مۇمكىندىك بەرەدى دەپ وتىر. قۇقىق قورعاۋ قىزمەتىنىڭ قۇرامىن تازارتىپ، وعان ەڭ لايىقتىلاردى ىرىكتەۋ رەفورماسى بۇدان ءارى دە جالعاسا بەرمەك.
ەندى ءتارتىپ ساقشىلارى جۇمىسقا قابىلدانار الدىندا 3 ساعاتقا سوزىلاتىن پوليگرافولوگيالىق تەكسەرىستەن ءوتۋى ءتيىس. بۇل ىشكى ىستەر ورگاندارىنا شىنشىل، پوليتسيا اتىنا كىر كەلتىرمەيتىن ءارى ءوز ىسىنە بەرىك كادرلاردى ىرىكتەۋ ءۇشىن جاسالىپ وتىر.
باقىتجان وراشيەۆا، پسيحولوگ-پوليگرافولوگ:
- تەكسەرىستەن ءوتۋ بارىسى ءۇش كەزەڭدى قامتيدى. ول - زەرتتەلەتىن اداممەن تەستىلەۋ الدىندا جۇرگىزىلەتىن اڭگىمەلەسۋ، نەگىزگى تەستىلەۋ جانە قورىتىندى شىعارۋ. تەكسەرىلەتىن ادامنان جان- جاقتى ءومىرى تۋرالى اقپاراتتار الىنادى. بۇل جەردە بەرىلىپ جاتقان اقپاراتتىڭ قانشالىقتى شىندىق ەكەنىن جانە جاسىرىپ وتىرعان فاكتىلەرىن انىقتاۋ ءۇشىن ساۋالناما قۇرىلادى.
ايتپاقشى، پوليگرافولوگيالىق زەرتتەۋلەر پوليتسيانى جۇمىسقا الاردا عانا ەمەس، قىزمەتتىك تەرگەۋ- تەكسەرۋلەر بارىسىندا دا قولدانىلادى. ۇمىتكەردەن شىندىق دەتەكتورىنىڭ كومەگىمەن ساۋالناما الۋ ارقىلى ولاردىڭ بۇعان دەيىن زاڭعا قايشى ارەكەت جاساعان-جاساماعانىن انىقتاۋعا بولادى.
جاننا ءابىلوۆا، ق ر ءى ءى م كادر جۇمىستارى دەپارتامەنتىنىڭ اعا ينسپەكتور-پوليگرافولوگى:
- پوليگرافولوگيالىق زەرتتەۋلەر قوسىمشا اقپارات الۋ ءۇشىن جۇرگىزىلەدى. سونداي-اق سىناقتان ءوتىپ جاتقان ادامنىڭ قىلمىس الەمىمەن بايلانىسى، كريمينالدىق قىلتىڭ-سىلتىڭنىڭ بار-جوعىن انىقتاۋعا كومەكتەسەدى.
پوليتسەيلەردىڭ شىندىق دەتەكتورى ارقىلى تەستىلەۋدەن ءوتۋى قازاقستاندا بيىل باستالدى. بۇل ماقساتقا قۇنى 1,5 ميلليون تەڭگە تۇراتىن ارناۋلى قۇرالدار ساتىپ الىنىپ، ونىمەن جۇمىس ىستەۋگە ارنايى جەكە قۇرام جاساقتالعان. مامانداردىڭ ايتۋىنا قاراعاندا، دەتەكتوردى الداۋ مۇمكىن ەمەس.
باقىتجان وراشيەۆا، پسيحولوگ-پوليگرافولوگ:
- ادام جالعان ايتقان جاعدايدا فيزيولوگيالىق وزگەرىستەر پايدا بولادى. ماسەلەن، تىنىس الۋ جۇيەسىنىڭ وزگەرۋى، قان تامىرلارىنىڭ وزگەرىسى، تامىر سوعىسىنىڭ جيىلەۋى نەمەسە تومەندەۋى.
بۇگىندە پوليگراف قۇرالى 80 مەملەكەتتە قولدانىلادى. ماسەلەن، كورشى رەسەيدە مۇنداي دەتەكتورلاردى 2010 - جىلدان باستاپ پايدالانىپ كەلەدى. ال قازىرگى پوليگرافتىڭ ءتۇپ نەگىزى XIX عاسىردىڭ سوڭىندا پايدا بولعان دەسەدى. ونى ويلاپ تاپقان يتالياندىق كريميناليست چەزارە لومبروزو ەكەن.
24.kz
