ستۋدەنتتەرى از ۋنيۆەرسيتەتتەردى مارتەبەسىنەن ايىرۋ ۇسىنىلدى

بۇگىن پارلامەنت سەناتىنىڭ جالپى وتىرىسىندا دەپۋتات مۇرات باقتيار ۇلى ۇكىمەت باسشىسىنىڭ اتىنا وسىنداي ساۋال جولدادى.

 ونىڭ ايتۋىنشا، قازىر قازاقستاندا 82 ۋنيۆەرسيتەت بار. ءبىراق، ولاردا وقىپ جاتقان جاستاردىڭ سانى 2 مىڭ مەن 7 مىڭنىڭ ارالىعىندا عانا. سوندىقتان، ءتيىستى تالاپقا ساي كەلمەيتىندەرىن ينستيتۋت نەمەسە اكادەميا دەڭگەيىنە ءتۇسىرۋ قاجەت دەپ وتىر.

1991 - جىلى قازاقستاندا 55 جوعارى وقۋ ورنى بولسا، قازىرگى سانى 127 گە جەتكەن. الايدا، «اتى دارداي كوممەرتسيالىق ءبىلىم وشاقتارى ماماندىق دايارلاۋعا دۇرىس ءمان بەرمەي وتىر»، - دەپ ەسەپتەيدى دەپۋتات. سوندىقتان سۇرانىسقا ساي ەمەس مامانداردى دايارلاۋدى توقتاتۋدى ۇسىندى. «سەبەبى، جىل سايىن ەلىمىزدە 10 مىڭداعان قاجەت ەمەس ماماندىققا ديپلوم بەرىپ، جۇمىسسىزدار سانىن كوبەيتىپ وتىرمىز» دەپ ەسەپتەيدى دەپۋتات.

 مۇرات باقتيار ۇلى، ق ر پارلامەنتى سەناتىنىڭ دەپۋتاتى:

- بۇل ماسەلەنى مەملەكەتتىك تۇرعىدا رەتتەمەسەك كەلەشەكتە ۇلتتىق قاۋىپسىزدىگىمىزگە قاۋىپ ءتوندىرۋى مۇمكىن. قازىر قازاقستاندا جوعارى وقۋ ورىندارىندا جاستارىمىزدىڭ 63 پايىزى وقىپ جاتسا، تەحنيكالىق كاسىپتىك ءبىلىم بەرۋ ۇيىمدارىندا ءبىلىم الىپ جاتقان جاستاردىڭ سانى نەبارى 17 پايىزدى قۇرايدى. ال 20 پايىز جاستارىمىزدىڭ ەشقانداي ماماندىقتارى جوق ەكەن.

 سونىمەن قاتار، دەپۋتاتتىڭ ايتۋىنشا بۇگىندە كوپتەگەن جوعارى وقۋ ورىندارى قۋلىققا كوشە باستاعان. ۇلتتىق تەستىلۋ كەزىندە 50 بالدىق جۇيەدەن وتە الماعان جاستاردى اۋەلى ديزاينەر، شاشتاراز سەكىلدى شارۋاشىلىق ماماندىقتارعا قابىلداپ، كەيىن قالاعان ماماندىعىڭا اۋىساسىڭ دەپ ۋاعدالاساتىن بولعان. وسىعان بايلانىستى ەلىمىزدەگى جوعارى وقۋ ورىندارىنا پروكۋراتۋرا ورگاندارى ءتيىستى تەكسەرىس جۇرگىزۋىن سۇرادى.

tv7.kz/kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى