رەسەي سيريانى قولداۋىن دوعارسا مۇناي باعاسى ەركىنە جىبەرىلەتىن كورىنەدى
بۇل تۋرالى اتىن اتاماۋدى ءجون كورگەن ارابيالىق جانە امەريكالىق شەندىلەر سوزىنە سىلتەمە جاساعان New York Times گازەتى جازادى.
شەنەۋنىكتەردىڭ سوزىنە قاراعاندا، سوڭعى بىرنەشە اي بويىنا ساۋد ارابياسى اتالعان ماسەلە بويىنشا بىرنەشە رەت رەسەيلىك تاراپپەن كەلىسسوز جۇرگىزگەن، الايدا ولار قانداي دا ءبىر مامىلەگە كەلە الماپتى. امەريكالىق باسىلىمنىڭ جازۋىنشا، اراب شەندىلەرى مۇناي باعاسىن ەركىنە جىبەرۋگە ىقپال ەتە الاتىنىن رەسەيلىك تاراپقا جەتكىزگەن. الايدا باسىلىمدا سيريالىق ماسەلە شەشىمىن مۇناي باعاسىنا قالاي بايلانىستىرىلعانى جايلى كەڭىنەن مالىمەت كەلتىرىلمەيدى.
ساۋد ارابياسى - و پ ە ك- كە ەنەتىن، الەمدەگى ەڭ ءىرى مۇناي ءوندىرۋشى ەل. حالىقارالىق نارىقتا مۇناي باررەلىنىڭ باعاسى ەكى ەسەگە ءتۇسىپ كەتتى: 100 دوللاردان 50 دوللارعا دەيىن. ساراپشىلار «قارا التىن» باعاسىنىڭ قۇلدىراۋىن نارىقتا ۇسىنىستىڭ تىم كوپتىگىمەن تۇسىندىرەدى. و پ ە ك- ءتىڭ 27 - قاراشادا كۇنىنە 30 ميلليون باررەل مۇناي ءوندىرۋ تۋرالى شىعارعان شەشىمى باعانى ودان سايىن قۇلاتقان. جاڭا جىلدا Brent ماركاسىنداعى مۇنايدىڭ ءبىر باررەلى 45 دوللارعا دەيىن قۇلديلاعان. الايدا قاڭتاردىڭ سوڭى مەن اقپاننىڭ باسىندا مۇناي باعاسى اقىرىنداپ «باسىن» تىكتەي باستادى.
ايتا كەتەلىك، الدىندا سيريا پرەزيدەنتى باشار اساد Foreign Affairs جۋرنالىنا بەرگەن سۇحباتىندا حالىقارالىق نارىقتا مۇناي باعاسىنىڭ قۇلدىراپ جاتۋىنا بايلانىستى ەكونوميكالىق قيىندىقتارعا تاپ كەلىپ جاتقانىنا قاراماستان رەسەي مەن يران داماسكىگە قولداۋ كورسەتۋدى جالعاستىرۋدا دەپ مالىمدەگەن.
«الاش ايناسى»
