قازاق ءانشىسىنىڭ ورىنداۋىنداعى تۇرىك ءانى ىستامبۇل جۇرتشىلىعىن ءتانتى ەتتى

انسامبل ىستامبۇلدا قۇرمانعازىنىڭ، قازانعاپ پەن نۇرعيسا تىلەنديەۆتىڭ كۇيلەرىن ورىنداپ، ءشامشى قالداياقوۆ پەن اسەت بەيسەۋوۆتىڭ ۇزدىك اندەرىن سۇيەمەلدەدى.

سونىمەن قاتار ونەر سۇيەر قاۋىمعا اباي اتىنداعى وپەرا جانە بالەت تەاترىنىڭ ءانشىسى گۇلزات داۋىربايەۆا قازاقتىڭ حالىق اندەرى مەن ءتۇبى ءبىر تۇركى جۇرتىنىڭ تانىمال شىعارمالارىن شىرقادى.

تۇرىك اعايىندىلار اسىرەسە تۇرىكتىڭ اتاقتى «Üsküdar'a gider iken» ءانىن ەرەكشە ىقىلاسپەن قابىل الىپ، زور قوشمەت كورسەتتى.

«سازگەن سازى» فولكلورلىق-ەتنوگرافيالىق انسامبلىنىڭ كوركەمدىك جەتەكشىسى باعدات تىلەگەنوۆ انسامبلدىڭ تۇركيا مەن قازاقستاننىڭ مادەني بىرلىگىن نىعايتىپ، دوستىق كوپىرىن سالۋعا ۇلكەن سەپتىگىن تيگىزەدى دەپ ويلايتىندىعىن جەتكىزدى.

الداعى كۇندەرى «سازگەن سازى» فولكلورلىق-ەتنوگرافيالىق انسامبلى تۇركيانىڭ 5 قالاسىندا ونەر كورسەتىپ، ارتىنشا گاسترولدىك ساپارمەن ەۋروپا ەلدەرىندە اتتانباق.

ايتا كەتەيىك، «سازگەن سازى» فولكلورلىق-ەتنوگرافيالىق انسامبلى 1981 - جىلى رەسپۋبليكالىق قازاق حالىق اسپاپتارى مۇراجايىنىڭ جانىنان قۇرىلعان بولاتىن. انسامبل سىبىزعى، جەتىگەن، سازسىرناي، شەرتەر سىندى قازاقتىڭ حالىق اسپاپتارى جانە ەجەلگى ۇمىت بولا باستاعان، ال قازىرگى كۇنى قايتا جاڭعىرىپ كەلە جاتقان ادىرنا، سازگەن، نارقوبىز سىندى اسپاپتاردا ويناۋىمەن ەرەكشەلەنەدى.

«سازگەن سازى» انسامبلىنىڭ رەپەرتۋارى حالىق شىعارمالارىنان، سول سياقتى حالىقتىق-كاسىپقوي سازگەرلەر قۇرمانعازى، تاتتىمبەت، سۇگىرلەردىڭ تۋىندىلارىنان تۇرادى. بۇگىنگى كۇنى انسامبل شۆەيساريادا، يۋگوسلاۆيادا، ءۇندىستاندا، امەريكا قۇراما شتاتتارىندا، تۇركيادا، گەرمانيادا، جاپونيادا، كورەيادا، گولانديادا، يتاليادا، يسپانيادا، قىتايدا، اۆستريادا، گرەتسيادا جانە فرانسيا ەلدەرىندە ونەر كورسەتىپ ۇلكەن جەتىستىكتەرگە جەتىپ ۇلگەرگەن.

BNews.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى