مەن گۇلىم جۇسىپبەكوۆانىڭ «قازاقستان داۋىسى» جوباسىنىڭ فينالىنا وتكەنىن قالامايمىن - مەدەۋ ارىنبايەۆ
«مەن گۇلىم جۇسىپبەكوۆانىڭ «قازاقستان داۋىسى» جوباسىنىڭ فينالىنا وتكەنىن قالامايمىن. ارينە، ماعان تالىمگەر رەتىندە بۇلاي ايتۋ وڭاي ەمەس. ويتكەنى، توبىمداعى ۇمىتكەرلەردىڭ ءبارى ماعان بىردەي. دەگەنمەن، ءادىلىن ايتاتىن بولساق، گۇلىمگە قاراعاندا ماقسات ماقۇلبەكوۆتىڭ ءان ورىنداۋ شەبەرلىگى باسىم، داۋىسى كۇشتى، كاسىبي دەڭگەيى جوعارى»، دەدى مەدەۋ ارىنبايەۆ.
«بەتىڭ بار، ءجۇزىڭ بار» دەمەي تىك سويلەيتىن مەدەۋ شاكىرتىنە كوڭىلى تولمايتىنىن جاسىرىپ قالا المادى. سوڭعى كەزدەرى مەدەۋ مەن گۇلىمنىڭ اراسىندا تۇسىنبەۋشىلىك تۋىنداعان كورىنەدى. ويتكەنى، تالىمگەرى ۇسىنعان ءاندى شاكىرتى ايتقىسى كەلمەيدى ەكەن.
«ءار تالىمگەر اقتىق سىنعا ەڭ جۇيرىگىن قوسقىسى كەلەدى. مەن دە جاسىرىپ قايتەيىن، اقپاننىڭ 15-ىندە وتەتىن فينالدا ماقساتتى كورگىم كەلەدى. ءبىراق، گۇلىمنىڭ قولداۋشىلارى كوپ بولعاندىقتان الداعى جەكسەنبى، 8- اقپانداعى تىكەلەي ەفيردە تاعى دا گۇلىم وزىپ، ماقسات جوبادان شىعىپ قالا ما دەپ الاڭداپ ءجۇرمىن. مۇنداي مەگاجوبانىڭ اقتىق سىنىندا ناعىز دۇلدىلدەر شايقاسۋى ءتيىس»، - دەيدى مەدەۋ ارىنبايەۆ.
ءوز كەزەگىندە گ. جۇسىپبەكوۆا تالىمگەرىنىڭ جاساعان مۇنداي مالىمدەمەسىن تۇسىنبەيتىنىن ايتتى.
«مەن مەدەۋ ارىنبايەۆتى ءانشى رەتىندە سىيلايمىن. جوبانىڭ «كورمەي تىڭداۋ» اتتى العاشقى ىرىكتەۋ كەزەڭىندە ماعان مەدەۋ مەن نۇرلان اعالار قاتار بۇرىلعاندا مەدەۋدى تاڭداعانمىن. «شايقاس» كەزەڭىندە مەنى قولداپ، جوبادا قالدىردى. وعان ريزاشىلىعىم شەكسىز»، - دەيدى گۇلىم. ءبىراق سوڭعى ۋاقىتتا تالىمگەرىن تۇسىنبەي جۇرگەنىن ايتادى.
«دايىندىق كەزىندە ماقساتقا كوبىرەك كوڭىل ءبولىپ، ماعان ءمان بەرمەيدى، مەنىمەن جۇمىس ىستەمەيدى. قازىر اندەرىمە مەدەۋ اعاسىز ءوزىم دايىندالىپ ءجۇرمىن. بەرگەن انىنەن باس تارتقانىم ءۇشىن رەنجىگەن شىعار. ماعان جانار دۇعالوۆانىڭ ءانىن ورىنداۋدى ۇسىندى. كەلىسپەدىم. ويتكەنى جاناردىڭ اندەرى مەنىڭ تابيعاتىما كەلمەيدى. ماقسات وپەرا ءانشىسى، سوندىقتان كلاسسيكالىق اندەردى شىرقاپ كەلەدى. نەگە ماعان جانىما جاقىن حالىق اندەرىن ورىنداماسقا»، - دەيدى گۇلىم جۇسىپبەكوۆا.
اقپاننىڭ 8-دە وتەتىن تىكەلەي ەفير تارتىستى وتپەك. اقتىق سىنعا كىم جولداما الادى - مەدەۋ ارىنبايەۆتىڭ قولداۋىنا يە بولعان ماقسات پا، الدە حالىقتان داۋىس كۇتكەن گۇلىم بە؟ جەكسەنبى كۇنى، ساعات 21:00 ۇلتتىق ارنانى قوسىڭىزدار! جىبەرىپ الماڭىزدار.
ەگەر سىزگە ۇناعان ءانشى كەلەسى كەزەڭگە ءوتسىن دەسەڭىز، قاپى قالماي داۋىس بەرىڭىز. ول ءۇشىن ونەرپازدىڭ رەتتىك ءنومىرىن 3075 نومىرىنە جولداڭىز نەمەسە 88090803075 نومەرىنە تەلەفون سوعىڭىز. ماقسات ماقۇلبەكوۆ، رەتتىك ءنومىرى - 32. گۇلىم جۇسىپبەكوۆا، رەتتىك ءنومىرى - 1.
