استانا تۇرعىندارىنىڭ ەڭ كوپ تاراعان شاعىمدارى انىقتالدى
بۇل تۋرالى tengrinews.kz تىلشىسىنە مەملەكەتتىك-جەكەمەنشىك ارىپتەستىك ورتالىعىنىڭ اناليتيگى رۋسلان كيىكوۆ ايتىپ بەردى.
ونىڭ مالىمەتىنشە، 2013 - جىلدان بەرى قالا اكىمدىگىنىڭ سايتىنا استانا تۇرعىندارىنان 3 مىڭنان اسا شاعىم كەلىپ تۇسكەن، ولاردىڭ 27 پايىزى - اباتتاندىرۋعا، 20 پايىزى - كولىك پەن اۆتوجولعا جانە 19 پايىزى كوممۋنالدىق شارۋاشىلىققا بايلانىستى.
ايتا كەتەيىك، شاعىمدار تەك فاكتتى راستايتىن فوتوماتەريال بولعاندا عانا قابىلدانادى. وسىدان كەيىن ول وڭدەلىپ، اكىمدىكتىڭ ءتيىستى دەپارتامەنتتەرى ماسەلەنى شەشۋگە كىرىسەدى. «اباتتاندىرۋعا قاتىستى تۇرعىندار قاردىڭ تازالانباعانىنا ەمەس اۋلالاردا جارىق پەن بالالار وينايتىن الاڭنىڭ جوقتىعىنا ءجيى شاعىمدانادى.
ال «كولىك پەن جول» ساناتى بويىنشا قوعامدىق كولىكتەردىڭ جۇمىسىنا، جولدىڭ ناشار جاعدايىنا، رۇقسات ەتىلمەگەن جەرگە كولىك قويۋعا، جولداعى تاڭبالار مەن بەلگىلەردىڭ جوقتىعىنا شاعىمدانادى.
«كوممۋنالدىق شارۋاشىلىق» ساناتى بويىنشا قوقىستىڭ تازالانباۋىنا، ورتالىق جىلۋ جۇيەسىندەگى پروبلەمالار مەن اۆاريالارعا، سۋمەن جابدىقتاۋ جانە سانيتارلىق جاعداي، اشىق كاناليزاتسيا قۇدىقتارىنا قاتىستى شاعىمدار ءجيى تۇسەدى»، - دەدى كيىكوۆ.
ساراپشىنىڭ سوزىنە قاراعاندا، استانالىقتار بۇدان وزگە مىناداي پروبلەمالار بويىنشا دا ءجيى شاعىمدانادى: قۇقىقتىق ءتارتىپ (8 پايىز)، كوشە قوزعالىسىن ناشار ۇيىمداستىرۋ (6 پايىز) جانە باسپانا ساپاسى (5 پايىز).
كيىكوۆتىڭ مالىمەتىنشە، شاعىمداردىڭ جالپى سانىنىڭ 86 پايىزى (2854) ورىندالدى، 9 پايىزىنان (291) باس تارتىلدى، ال 13 ارىزدىڭ ۋاقىتى ءوتىپ كەتكەن، 94 ى قارالىپ جاتىر، تاعى 79 ىنا «ورىندالادى» دەگەن جاۋاپ بەرىلدى. اناليتيكتىڭ ويىنشا، بۇل - وتە پايدالى قىزمەت، ءبىراق ونى جاقسارتۋ قاجەت. «پروبلەمانىڭ ماڭىزىن ارتتىرۋ ءۇشىن جانە سول پروبلەمالاردى ىزدەستىرۋدىڭ جولدارىن جەڭىلدەدىپ، قاجەتتى ستاتيستيكانى الۋ ءۇشىن سانات بويىنشا شاعىم بەرۋدىڭ «سۇزگىشىن» استانا تۇرعىندارىنا مەڭگەرتىپ، شاعىمداردى «قولداۋ» مۇمكىندىگىن بەرۋ كەرەك (پەتيتسيا)»، - دەدى ول.
