اۋىل قازاعىنىڭ كورگەن كۇنى

اتا-بابامىز تاۋ-تاۋدىڭ ساي-سالاسىنا، وزەن-وزەكتىڭ بويىنا قىستاق سالىپ مىڭعىرتىپ مال وسىرگەن، كەيىن كولحوز-سوۆحوز بولىپ تىرلىك ەتكەن ۇلى دالاداعى اۋىلداردى شەتىنەن جويىپ جىبەرۋدىڭ ار جاعىن ويلاۋدىڭ ءوزى قاۋىپتى. ۇلى دالادان جۇرت كوشىپ كەتەدى ەكەن. سوندا، ول دالانى ەندى كىم مەكەن ەتپەك، كىمگە بەرەمىز. قۇرتشا قۇجىناپ وزىنە سىيماي بارا جاتقاندار بوس دالاعا اعىلا جونەلمەسىنە كىم كەپىل.

«اياعى جوق، قولى جوق،

جىلان قايتىپ كۇن كورەر»، -  دەپ ءوزى تۇگىلى بار تابيعاتىنا ءسۇيسىنىپ، سول تابيعاتتىڭ ءبىر بولشەگىنىڭ تىرلىگىن مۇڭ ەتكەن ابىز اقساقالدىڭ سوزىنە ەرگەن وسى ەل عاسىرلار بويى نە قيىندىق كورسە دە وسى دالانى مەكەن ەتكەن. ادامباي-تۇرسىن 18 مىڭ جىلقى باعىپ، جاڭگىر تورە 17 مىڭ سارى-الا، بوز بەن قۇلانى وسىرگەن. قىسى قاتتى تاعىلىدا بوتباي باي 40 مىڭ قويعا يە بولعان. مىڭ قوي، ءجۇز جىلقىسى بارلاردا شەك جوق. ىرىس وسىلاي ەدى.

«ادامزاتتى دۇرلىكتىرە كىرگەن ⅩⅩعاسىر قازاق حالقىنا ادامي قيامەتتىڭ نەشە الۋان پالەسىن الا كەلگەن. ەۋروپادان ءوتىپ قازاق جەرىنە جەتكەن «كوممۋنيزم ەلەسى» كوشپەلى ەلدىڭ كەرەگەسىن قيراتىپ، تىرلىگىنىڭ بار كوزى مالدى تارتىپ الىپ، عاسىرلار بويى «اشتان ولگەن قازاقتىڭ مولاسى جوق» دەپ كەلگەن قازاقتى جەرتەزەك ەتىپ قىرىپ سالدى، «ەي» دەگەنىن وققا بايلايدى.

قۇيرىعى جوق، جالى جوق،

قۇلان قايتىپ كۇن كورەر، - دەگەن ابىز ەلدىڭ كوڭىلى مۇڭلى، كوزى شەرلى بولسا دا تىرلىككە ۇمتىلدى. بۇرىنعى رۋلىق-تۋىسقاندىق تىرلىگىنە جاقىن كەلەتىن كولحوز، سوۆحوز دەگەنگە ەرىكسىز بولسا دا باس سۇقتى. سول شارۋاشىلىقتاردا تالاي 40 مىڭ قوي، پالەنباي مىڭ سيىر ءوسىردى. ەگىن سالدى. اشتىقتان قۇتىلدى. كومپلەكستەر سالىپ، سوندا ساۋىنشىلىق ەتكەن ايەلدەر ءاپپاق حالاتپەن ءجۇرىپ ەڭبەك ەتتى. قوي باققان شوپاننىڭ ءۇيىن اۆتومونشا ىزدەپ كەلدى، اۆتوكلۋب ءان سالدى. ءار ءۇيدىڭ ۇستەلىنىڭ ۇستىندە «جۇلدىز»، «مادەنيەت جانە تۇرمىس» جاتتى. توڭكەرىلىپ قالعان سوتسياليزمدى قانشا جامانداساق تا مويىندايتىن وسىنداي شىندىق تا بار ەدى.

عاسىر سوڭىندا تاۋەلسىزدىك الدىق. قۋانباعان قازاق جوق. شوقىنىپ كەتكەن بىرەۋ بولماسا توي جاساماعان شاڭىراق جوق. سوعان ىلەسە «پريۆاتيزاتسيا» دەگەن تاعى ءبىر ەلەس، ەندى جاتا قالىپ باي-باتشا بولاسىڭ دەگەن قيالي ەلەس باۋراپ الا جونەلدى. تارپا باس سالىپ، توناۋ باستالدى. ءجۇمادىل دەگەن اقساقال ايتىپتى «زامان تۇزەلدى، ەل تالاعانعا ەسكەرتۋ، كىسى ولتىرگەنگە سوگىس» دەپ. 40 مىڭ قويدان ءبىر جىلدا مىڭى قالعان. ايتەۋىر، ءبىر جاققا، ءبىر قارىزدى وتەۋگە كۇنى-ءتۇنى جونەلتىلگەن. تاقىر تازا قالۋعا اينالعاندا قالعانىن جۇرت «بولىسكەن» بولعان سوۆحوزداردا جەتەرلىك. ەكى مىڭ قويدى مەنشىكتەپ، ەكى جىلدان سوڭ اق تاياق ۇستاپ قاڭعىپ، تراكتورىن مەتاللومعا وتكىزگەنىنە ءماز بولعان جۇرتتا جەتەرلىك. ءار سوۆحوزدان جۇزدەگەن شاقىرىمداعى قىستاقتارعا ەلەكتردىڭ توعىنىڭ سىمى تارتىلىپ، بۇكىل دالا، اۋىل-اۋىل، قويناۋداعى قىستاقتار سامالاداي جارىق شاشاتىن. مىڭداعان شاقىرىمعا كەتىپ جاتقان توقتىڭ اليۋميني سىمىن كەز كەلگەن جەرىنەن ءۇزىپ، سىپىرىپ الىپ، جات ەلگە وتكىزىپ، اۋىل-اۋىلدىڭ بولاشاعىنا بالتا شاپتىق. «وتكىزبەڭدەر» دەپ تىيىم سالعان ۇكىمەت، «بۇل قالاي» دەگەن وبلىستاردىڭ دا، اۋداننىڭ دا اكىمى جوق.

ءبارى اش قاسقىرداي جۇلقا تارتىپ، جەپ جاتىر. ءوزىمىزدى- ءوزىمىز تونادىق. تىر جالاڭاش (دامبالسىز) قالعانىمىزعا نە جوسىق؟ جات ەل مازاق ەتىپ، كۇلگەن بولار. بىرەۋلەر «كەلەشەكسىز اۋىلدار» دەگەندى سول كەزدە ويلاستىرعان بولار. مىڭ ايداعان اقشاعىل، اقادىر، ايىرتاس، قارابۇلاق ت. ب تالاي شارۋاشىلىقتىڭ ورنىندا قۇلاعان ۇيلەر مەن كۇلدىڭ ۇيىندىلەرى عانا جاتىر. «فەرمەر» بولىپ شىققاندار ءار جەردە شاشاۋ-شاشاۋ. جارىق تۇگىلى ەلەكتر باعاندارىنا دەيىن «يە» تابىلىپ، الىپ كەتكەن. سول «يە» توققا نەگە «يە» بولماعانى بەلگىسىز، ءارى ول جازاسىز. كوپتەگەن قىستاقتاردا شوشايىپ تەك ەركەكتەر عانا ءجۇر. جانىندا اكەسىنىڭ اتىن ۇمىتقان بىرەر بيچتەر عانا بار. ايەل... ايەلدەرى «تسيۆيليزاتسياسى» بار ورتالىقتاردا. «تسيۆيليزاتسيانىڭ» ءتۇرى تەلەديدار. ايەلسىز ءۇي - وشاقسىز ءۇي. جىلۋى جوق جەردە كىم قالادى.

 ول قۇريتىن قىستاق، ءۇمىتسىز شارۋاشىلىق. كارى اكەسى «ولگەن سوڭدى» كۇتىپ جۇرگەندەي حال. ءجامشى وزەنى بويىنداعى ەلدى ارالاپ كەلە جاتىپ، بەس جۇزدەن اسا قويى بارعا كەزىكتىك. مال وسىرگەنىنە قۋاندىق. ارتى مۇڭ. سوڭعى جيىرما جىلدا گازەت-جۋرنال كورمەپتى. «جۇلدىز» ... ءاي، ونداي جۋرنال بار ما ەدى؟ بالالارى سويلەيدى، تىستا قوي ماڭىرايدى. وسى ءبىز قايدا كەلدىك؟ بىزگە ەكسپو كەرەك-اق! ءبىراق... «تسيۆيليزاتسياسى» بار ورتالىقتا ونداي-مۇنداي وقۋ بىتىرگەن، وتىرىك «ۋنيۆەرسيتەتتىڭ» جالعان «ديپلومىنا» يە تالايلار بوس ءجۇر. «وقىپ» جاتقانىنا ءماز تالاي اكە بار.

 جۇمىسسىزدىقتان كەرەناۋ تارتقان بوزبالا جەتەدى. سوۆحوزعا جەگىلىپ، ەڭبەكتىڭ سىنىنان وتكەندەر ەلەۋلى جاسقا كەلگەن. ەندىگىلەر ەڭبەكسىزدىككە بوي الدىرعان، ءسوزى سۇيىق، بەزبەلەۋ بوزجىگىتتەر. ال، قىستاق قول ۇشىن بەرەرگە زار. قىستاقتىڭ ماڭى ۇيىلگەن تەزەك-قيعا تولى. سول مالدىڭ بوعىنان گاز الىپ، ۇيگە جارىق تارتاتىن تەحنولوگيانى گازەتتەر جازدى دا قويدى. وسى قىستاقتا ەل بار-اۋ، ولار ءبىزدى اسپەن قامتاماسىز ەتىپ وتىر، وسى جاقسىلىقتى سولارعا ورناتىپ، نە كورسەتىپ بەرەيىك دەگەن ءبىر مينيستر، نە دەپۋتات، نە اكىم بولسايشى. قىستاقتاعىلار ءتۇن بالاسى مايشامعا ۇڭىلگەن.

مىنە، وسى تىعىرىقتان پرەزيدەنت شىعۋدىڭ جولىن ۇسىنعانداي. بىرىگىڭدەر دەگەن. بىرىگىپ ءومىر ءسۇرۋدىڭ كەلەشەگى بارىن دا ايتقان. تەك قاشان؟ قانداي جولمەن دەگەندى ەل دە زارىعىپ كۇتكەندەي. اۋىل ءۇشىن مەكتەپ دەگەن دە باس اۋىرتار شارۋاعا اينالدى. سوناۋ سوعىستان كەيىنگى 1945-50- جىلدارى ارالىعىندا شاعىن كولحوزدىڭ 5 (بەس) بالاسى ءۇشىن ءبىز جامانداپ جۇرگەن سوتسياليستىك ۇكىمەت ەكى ءمۇعالىم ۇستاعان ەدى. ءبىرىنشى كلاستا ەكەۋ، قالعانى ءبىر-بىردەن. وقىسىن، ەل بولسىن دەگەن نيەت جاتاتىن. اۋىل كوركەيۋى ءۇشىن مەكتەپتىڭ بولۋى العى شارت ەدى. بۇگىن بۇل دا توڭكەرىلىپ بارا جاتىر. ورتالاۋ مەكتەپتە 41 بالا بولسىن، ايتپەسە... ايتپەسە جابىلادى. «جاپ تا جاپ» دەپ ۇرانداسىپ شىعا كەلگەن جاعداي. 39 نە 40 وقۋشى... ول قۇريتىندار ساناتىندا.

مەكتەپ جابىلسا ول اۋىل دا تاس-تالقان بولماق. وسى جەردە كوشپەلى ەل بولعاننىڭ بەلگىسى رەتىندە ۇيىلگەن توپىراق پەن كۇل عانا قالماق. كەشەگى سوتسياليزم زامانىندا وسى شەت اۋدانىندا «ميلليونەر» اتانعان اسا باي ەكى كولحوز بولۋشى ەدى. سونىڭ ءبىرى وسى قىزىلتۋ. قىزىلتۋدىڭ حالقى مەكتەپتى ساقتاپ قالۋعا جانتالاسۋدا. حالىقپەن كەزدەسكەن ەدىك 11 اتا-انا جەتىم بالالاردى اسىراپ الۋعا ىقىلاس ءبىلدىرىپ وتىر. «ساۋاپ قوي بۇل. اۋىلدا وسىرسەك ناعىز قازاق بالاسى بولادى عوي» دەسەدى. جاسى الپىسقا ەندى ىلىگەتىن اقساقالعا «سىزگە بەرمەس، قارت دەر» دەستى. «وۋ، اعايىن، سوندا قالاي؟ مەن ءالى جيىرما جىل ءومىر سۇرەمىن. مەن اسىراپ العان بەس جاستاعى بالا سوندا 25 كە كەلەدى ەكەن. بۇل نە قيتۇرقىلىق» دەپ رەنجىدى اقساقال.

شىن، اۋ وسىنى الگى زاڭ قابىلداعىش دەپۋتاتتار ويلاستىرعانى ءجون شىعار. رەسمي دەرەكتەر رەسپۋبليكادا جەتىم جانە اتا-انا قومقورلىعىنسىز قالعان 33680 بالا بار ەكەنىن جازعان. ارمەنيادا ارميانىن بالاسىن اسىراۋعا تەك ارميانعا بەرەدى. يزرايلدە يەۆرەي بالاسىن يەۆرەي عانا تاربيەلەيدى. ەل بولۋدى مىقتاپ ويلاساق جەتىمحاناداعى ءبىر اكەگە، نە ءبىر اناعا زار بولىپ وتىرعان بالانى اۋىل-اۋىلعا ورنالاستىرۋدى ناقتىلاپ قولعا الۋ كەرەك. ناعىز تالانتتى ونەر ادامدارى دا عالىم دا اياعىمەن جەر باسىپ، اقتۇتەك بوراندى كورىپ، كوك مايسا شالعىنعا اۋناپ، شىبىن شاعىپ، قارا كوك اسپانداعى سانسىز جۇلدىزعا تەلمىرىپ وسكەن اۋىل جاستارىنان شىعادى. اۋىل- قازاقتىڭ تامىرى ۇزىلمەس گەنەفونى.

اۋىل مال ءوسىرسىن دەگەندى ەشكىم تەرىسكە شىعارمايدى. ءبىراق، اۋىل قازاعى وسىرگەن مالىنىڭ پايداسىن قالاي كورمەك. سونى وتكىزەتىن جەر تابا الماي تاۋى شاعىلعان قازاق بارلىق اۋىلدا بار. ماعاۋيا دەگەن دوسىم، وتكەن قىستا ءۇش بۇقاسىن وتكىزە الماي قىستاي الىسىپ شىقتى. دەلدال ءار بۇقانى بۇزاۋدىڭ قۇنىمەن العىسى كەلەدى. ءۇش بۇقا-ءۇش بۇزاۋ رەتىندە. كەشەگى سوتسياليزم زامانىندا ەل ارتىق مالىن زاگوتسكوت دەگەن مەكەمەگە تاپسىرىپ پايداسىن كورەتىن. قازىر ول دا جوق. مال بار، ونى ىسكە اسىرۋدىڭ تەتىگى تازا جوق. ونداي مەحانيزم ءورىسى وسكەن ەلدىڭ بارىندە بارىن، كورشى قىتايدا دا ويلاستىرىلعانىن جۇرت گازەتتەن عانا وقيدى. سونىڭ سالدارىنان قازاق ءوز مالىن وتكىزە الماي، مىسىق قانا جەيتىن بەلورۋسسيانىڭ كارى سيىرىنىڭ ەتىن شايناپ وتىر.

اۋىلدا ءجۇن دە جەتەدى. ءۇيىلىپ جاتىر. ەل ورتەپ الەك. سول ءجۇندى اسفالتقا قوسسا ول ەرەكشە ساپالى بولاتىنىن تاعى دا گازەتتەر جازادى. ەڭ بولماسا وسىنى ويلاستىرۋعا بولماس پا ەدى. اۋىل ەگىن دە سالادى. العان استىعىن وتكىزەتىن جەر دە جوققا ءتان. ءبارى الىپ-ساتار دەلدالدىڭ قولىندا. اپاراعان بيدايىن ونىسى جەتىسپەيدى، مىناسى ماناداي دەپ، ءوزىن كەلەكە اقىماق ەتىپ، سۋتەگىنگە استىعىن الىپ قويا بەرگەن سوڭ ەگىن سالۋدى دا قويدى. اۋىل قازاعىنىڭ كورگەن كۇنى وسى.

اۋىل قازاقتىڭ قالقانى مەن قورعانى، قازاقتىڭ رۋحىنىڭ ساقشىسى. اۋىل قازاقتى قايتا ءتىرىلتىپ وتىراتىن ماڭگىلىك گەنوفوندى، قورىعى. كەلەشەگى جوق دەپ اۋىلدى جويۋ -  قازاقتىڭ رۋحىن جويۋ. تازا قازاقتىڭ ءوسىمىن بەرىپ وتىرعان دا اۋىل. ءسال مۇمكىندىك بولعان 1945-جىل جانە 1990-جىلدار اراسىندا قازاقتىڭ سانى 3 ەسەدەي ءوستى. بۇل دەموگرافيالىق ءدۇمپۋ قازىر توقتاپ قالدى. 1987-جىلى 427 مىڭ بالا تۋسا 1997-جىلى 232 مىڭ عانا بالا تۋعان. قازىر دە جاعداي ءماز ەمەس.

ۇلى دالامىزعا ماڭگىلىك يە بولۋ ءۇشىن قازاقتىڭ ءوسىمىن كوتەرۋ بۇگىنگى كۇننىڭ كوكەيكەستى ماسەلەسى. اۋىل بالا وسىرگىسى كەلەدى. ءبىراق، ءوزى جارىماي وتىرعان ەلدە «سەن بالا تابا قويشى» دەۋ قيالي ادامنىڭ ءىسى. ونى مىقتاپ جولعا قويۋ كەرەك. مىنا كورشى رەسەيدە كوپ بالالى اناعا ايىنا 100 مىڭ تەڭگە كولەمىندە جاردەم اقى تولەنەتىنىن گازەتتەر جازدى. ونان وزگە ءار بالاعا ارنالعان 10 مىڭ دوللارلىق انا كاپيتالى تاعى بار. بىزدەگى كومەك قانداي؟ ونى ايتۋدىڭ ءوزى جۇرتتىڭ مىسقىلىنا ۇشىراتادى. حالقىنىڭ كەلەشەگىن ويلاعان ەلدەردەي اناعا، كوپ بالالىلارعا ناقتىلى كومەك زاڭدى تۇردە قاراستىرىلسا اۋىل بالاعا تولىپ، ەل كوركەيىپ شىعا كەلەر ەدى. قالادا باسپانا تابا الماي جۇرگەن جاس وتباسىلاردىڭ يپوتەكاعا العان ءۇيىنىڭ ءبىر بالا تاپقانى ءۇشىن 25، ەكى بالاسى ءۇشىن 50 پايىز تولەمىن الىپ تاستاسا سول شاعىن وتباسىنىڭ ءتورت بالالى بولارىنا كۇمان جوق قوي. مۇنداي پراكتيكا ءار ەلدە بار، بىزدە نەگە جوق دەگەن ساۋال كوكەيگە تىرەلەدى.

عاسىرلار بويى باتىستىڭ دا، شىعىستىڭ دا تالاي جاۋىمەن ارپالىسىپ كەلگەن كوشپەلى ەل ازاماتى قانشا قىرىلسا دا ەلدىڭ شاڭىراعىن ازايتپاۋدىڭ امالىن تاۋىپ كەلگەن. جەتىمىن جەتىم ەتپەيتىن امەڭگەرلىك جول دا، كوپ ايەل الۋدا ۇلتتىڭ بۇتىندىگىن، ىرگەلى ەل بولۋىن ويلاستىرعان كەمەڭگەرلىك. ەكى ايەل الۋ ەرىككەننىڭ ەرمەگى ەمەس. جان-جاعىڭ ميلليارد بوپ قۇجىناعان زاماندا ۇرپاعىنىڭ بىرەۋدىڭ قۇلى بولىپ كەتپەۋىن ويلاستىرعان وتان سۇيگىشتىك. ەريمەنتاۋلىق باكەن دەگەن دوستىڭ ايەلى ون جىل بىرگە تۇرسا دا بالا كوتەرمەي كۇيەۋىنە «ەكىنشى ايەل ال» دەۋى، اقىرى ءوزىنىڭ ءبىر قىزدى الىپ بەرۋىنىڭ ار جاعىندا دانالىق، قازاعىم باسقا جۇرتقا قور بولماسىن دەگەن عاجايىپ ەلىن ءسۇيۋ ارمانى جاتىر. ۇلى دالاعا كىم نە بولادى دەگەن ساۋال قاي زاماننان بەرى كەلە جاتقان وشپەيتىن سۇراق. بالاڭ، ءوزىڭ جان-تانىڭمەن سۇيەتىن نەمەرەڭ بىرەۋدىڭ، جات جۇرتتىڭ قۇلى بولىپ كەتپەسە يگى ەدى دەگەن تىلەك ءاربىر انانى تولعاندىرسا كەرەكتى.

 ول وسىنى ويلاماسا پەرزەنتىن قوقىسقا تاستاي سالاتىن «كوكەك» قاتىننان نەسى ارتىق؟ ءسۇيۋ دەيدى؟ ماحابباتتىڭ ەڭ ۇلىسى، تازاسى وتاندى ءسۇيۋ. ءاربىر قازاق ەڭ الدىمەن وتاندى، وتاننىڭ بولاشاعىن ويلاۋعا مىندەتتى. وتارشىلدىق قالپىمىزدى بۇزىپ كەتكەن قۇبىلىس- ەسىرىك مۋزىكاعا ەسىرگەن ايەل، ريۋمكالى كەمپىر، ىشكىشتەۋ كوكتاتا شال- ەلدىڭ بولاشاعى ەمەس. بولاشاق -  ۇلتتىق رۋحتا. ۇلى پايعامبار مۇحاممەد س. ع. س. «كوپ تۋاتىن ايەلگە ۇيلەنىڭدەر. ول اللا تاعالانىڭ الدىندا دا سۇيكىمدى» دەگەن. بابالار «بەس ۇلى باردىڭ ءسوزىنىڭ جالعانى جوق، ءتورت ۇلى باردىڭ الماي قالعانى جوق، ءۇش ۇلى باردىڭ ءحالى الىم-بەرىم، ەكى ۇلى باردىڭ شاق-شاق قانا ءالى بار، جالعىز ۇلى باردىڭ شىعار-شىقپاس جانى بار» دەگەن ۇلى ءسوزىن ۇمىتۋعا بولماس.

قايران اۋىلدا جەتكەننەن جەتپەگەن كوپ. ونىڭ ءوزى قولدان جاسالعان جەتىسپەۋشىلىك. اۋىل كۇركىلدەگەن كارى تراكتورى مەن جالعىز ماشيناسىن جۇرگىزە الماي، سولياركا مەن بەنزيننەن جۇتاپ وتىر. تۇگى جوق تۇركىمەنستاندا بەنزيننىڭ قۇنى 23 تەڭگە ەكەن. «اپىر-اي-ءا» دەپ تاڭعالىپ وتىر. بيىل لايساڭ كۇز كەلدى. قازان تۋا باستالعان جاڭبىر قاراشادا سۋلى قارعا ۇلاستى. مالدىڭ ازىعى دەپ شابىلعان ءشوپتى قازاندا تاسىپ الماق ەدى. جاڭبىر جىبەرمەدى. سۋلى ءشوپتى ماياعا ۇيسە ءشىرىپ كەتەدى. ونىڭ ۇستىنە جىعىلعانعا جۇدىرىق، قازان ايىنان بەرى سولياركا دا بەنزين دە جوق. ءانى بولادى، مىنە كەپ قاپتىمەن كۇز ءوتتى. شابىلعان ءشوپ دالادا. قىستاققا مايا ۇيىلمەگەن. ەكى اي جاڭبىر مەن قاردىڭ استىنداعى شوپتە نە قاسيەت قالعانىن ەشكىم دە ايتا المايدى.

اۋىل قازاعىنىڭ جولدان كورەر قيامەتىنىڭ ءوزى ازاپتى حيكايات. قىستاقتار مەن ەلدى مەكەندەردىڭ اراسىنا ومبى قارعا ءتۇسىپ كەتىپ، اتىن جەتەكتەگەن بىرەۋدىڭ ىزىنەن باسقا سوقپاق تۇسپەگەن تىڭ. بۇرىنعى سوۆحوزداردىڭ ءىرى بولىمشەلەرىنىڭ جۇرتى وزدەرى ارشىپ الەك. ءبىر كەزدەگى ميلليونەر كولحوز بولعان قىزىلتۋدىڭ سەگىز ايەلى قار كەپتەلىندە قالىپ، توعىز شاقىرىم جولدى كۇرەكپەن ارشىپ بارعانى قاي ماقتانعانعا جاتادى؟ سول اۋىلدىڭ ءبىر اقساقالىنىڭ «ءاۋ، وسى ХХІ  عاسىر دەگەنى وسى ما» دەگەنى تاڭدانىس پا، كۇيىنۋ مە.

قىس ءتۇسىپ كەلەدى. مالىن وتكىزە الماعان جۇرت كوڭىلى كۇپتى! وزبەك قاشان كەلەدى ەكەن دەسەدى. ەلەڭ-ەلەڭ. مال الاتىن وزبەك قانا. ونىڭ دا ءىسى قيىنداپ كەتكەن. بۇرىن بەرگەنىن الا بەرۋشى ەدى، ەندى تاڭداۋعا كوشكەن. ەلدىڭ ءبىر جارىم جاسار تايىنشاسىن «مىناۋ تورپاق» دەيدى. ەكى جاسارىن ءبىر جاسارعا الادى. ءۇش جاسار بۇقا؟ جوق، ونى المايدى. نەگە؟ المايدى، بولدى! وقۋداعى بالاسىنا اقشا ىزدەگەن اقساقال، كۇرسىنىپ ساقالىن سيپايدى. بەكەر وسىرگەن ەكەن. ەندى نە امال؟

كورىنگەنگە جەم بولعان،

اۋىل قايتىپ كۇن كورەر.

اۆتورى: جازۋشى، «قۇرمەت» وردەنىنىڭ يەگەرى، ق ر مادەنيەت قايراتكەرى

كامەل جۇنىستەگى

akikatkaz.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى