استانادا ناعىز قازاقى شاپانداردىڭ ۇلگىسىن تانىستىرۋعا ارنالعان كورمە اشىلدى - فوتو
اتاپ ايتقاندا، شەبەر بۇگىندە بىرەگەي شىعارماشىلىعىمەن تانىلىپ وتىر. ول تاريح قويناۋىندا قالعان عاسىرلاردىڭ كيىمدەرى مەن تۇرمىستىق زاتتارىن قالپىنا كەلتىرەدى جانە قايتا جاڭعىرتۋمەن تابىستى اينالىسىپ ءجۇر. كونە «زەرلەۋ» تەحنيكاسىمەن توي جانە ۇلتتىق كيىمدەردى تىگەدى. اۆتوردىڭ سوزىنە قاراعاندا، كەستەلەپ توقۋدىڭ تامىرى تەرەڭدە جاتىر. قازاق حالقى بۇل كوركەم ادىسپەن سالتاناتتى كيىمدەردى، باس كيىمدەردى، تۇرمىستىق زاتتاردى اشەكەيلەگەن.
ق ر سۋرەتشىلەر وداعىنىڭ مۇشەسى، تاريح عىلىمدارىنىڭ كانديداتى قاليوللا احمەتجاننىڭ ايتۋىنشا، التىنمەن زەرلەپ كەستەلەۋ ونەرى ەلىمىزدە جوعالا باستادى.
«بۇل ونەر تەك مۋزەيلەردە كورەتىن تۋىندىلارعا اينالىپ كەتتى. ايجان تويشىبەك قىزى وسى ونەردى قالپىنا كەلتىرىپ، بيىك دارەجەگە كوتەرۋگە ەلەۋلى ەڭبەك ءسىڭىردى. بۇل ونەردى ەليتالىق ونەر دەپ ايتساق، ارتىق بولمايدى. ول بۇل ونەردى مۋزەيلەردە ساقتالعان تۋىندىلار ۇلگىلەرىنىڭ نەگىزىندە ونىڭ تەحيكاسىن زەرتتەپ، قالپىنا كەلتىرە الدى»، - دەدى ق. احمەتجان.
وسى ورايدا ول كورمەدە كوپشىلىك نازارىنا ۇسىنىلعان تۋىندىلاردىڭ بارلىعى وتە جوعارى دەڭگەيدە ورىندالعانىن اتاپ ءوتتى.
«بىزدەر وسى كۇندەرى بازارلاردا ساۋدالانىپ جۇرگەن قازاقتىڭ كەستەلەنگەن شاپاندارىن رەتىندە جالعان كەستەلەنگەن زاتتاردى الۋدامىز جانە ولاردى ۇلتتىق دۇنيە دەپ قابىلداۋدامىز. بۇگىنگى كورمە ءبىزدىڭ كوزقاراسىمىزدى قايتادان قالپىنا كەلتىرىپ، شىنايى ونەرىمىزدىڭ قانداي بولعانىن تۇسىنۋگە كومەك بولادى دەگەن ويدامىن»، - دەدى ق. احمەتجان.
قازاقتىڭ تۇرمىسى مەن ءداستۇرلى كيىم- كەشەكتەرىن ەتنوگرافيالىق جانە تاريحي تۇرعىدا زەرتتەۋ ا. ابدۋبايتكە تاريحي ارتەفاكتىلەردىڭ ءبىرتۇتاس بولىگىن قالپىنا كەلىرۋگە مۇمكىندىك بەردى. ولاردىڭ قاتارىندا، حان كيىمدەرىنىڭ جيناعى، جاڭگىر حاننىڭ اسكەري كيىمى، فاتيما حانشايىمنىڭ بەشپەنتى، سونداي- اق قازاق اقسۇيەكتەرىنىڭ كۇندەلىكتى پايدالاناتىن زاتتارى قايتا جاڭعىرتىلعان.
