قىزىلوردالىق وقۋشىنىڭ كيىز باسۋ ادىسىمەن دايىنداعان جۇمىسى رەسپۋبليكالىق بايگەدە باس جۇلدەگە يە بولدى
بۇل تۋرالى ءبىلىم ورداسىنىڭ باسپا ءسوز قىزمەتى حابارلادى.
ۇلتتىق قۇندىلىقتاردى دارىپتەپ، اتا- بابادان قالعان اسىل مۇرانى امانات ەتىپ قالدىرۋ بۇگىنگى كۇندە وزەكتى بولىپ وتىر. اسىرەسە ەجەلدەن كەلە جاتقان قازاق حالقىنىڭ ونەرىن جاڭعىرتۋ باعىتىندا ساۋساعىنان بال تامعان شەبەرلەردەن كوپتەپ كەزدەسەتىنى قۋانتادى. نازاربايەۆ زياتكەرلىك مەكتەبىنىڭ جانىنان اشىلعان قولونەر ۇيىرمەسى دە جاس جەتكىنشەكتەردى كيىز باسۋ، شي توقۋ سەكىلدى قازاق حالقىنىڭ ونەرىمەن سۋسىنداندىرىپ، قويدىڭ كۇزەم جۇنىنەن كەرەمەت دۇنيەلەردى جاساۋعا ۇيرەتەدى.
گۇلزيرا ماتكارىم عىلىمعا قىزىعىپ حيميا- بيولوگيالىق باعىتتاعى نازاربايەۆ زياتكەرلىك مەكتەبىنە وسىدان ءبىر جىل بۇرىن كەلىپ ءتۇستى. ۇزدىكسىز ءبىلىم الىپ، ءۇش ءتىلدى مەڭگەرۋدەن جالىقپايتىن ءبىلىمپاز بويجەتكەن شىعارماشىلىق ۇيىرمەلەرگە دە قاتىسۋعا ەرەكشە قىزىعۋشىلىق تانىتتى. بۇگىندە مەكتەپ جانىنان اشىلعان قولونەر ۇيىرمەسىنىڭ بەلسەندى مۇشەسى. كيىز باسۋ ءادىسى بويىنشا دايىنداعان پاننولارى جاقىندا وتكەن رەسپۋبليكالىق بايگەدە توپ جارىپ، 15 نازاربايەۆ زياتكەرلىك مەكتەپتەرى اراسىنان گران- پري يەگەرى اتاندى.
«بۇل ونەر مەنى ەرەكشە قىزىقتىرادى. سەبەبى كيىز باسۋ ءادىسى ادامنىڭ بويىنا ەرەكشە اسەر قالدىرادى. ادەمى پاننولار، باسقا دا بۇيىمداردى ازىرلەۋ بارىسىندا وسىنشاما كەرەمەت دۇنيەلەر ءبىزدىڭ قولىمىزدان شىققانىنا ءوزىمىز دە تاڭعالامىز»، - دەيدى گ. ماتكارىم.
كيىز باسۋ ونەرى - حالقىمىزدىڭ ەجەلدەن كەلە جاتقان ءتول تۋىندىسى. ءتۇرلى ءتۇستى بويالعان كيىزدەن اسەم كارتينالار جانە باسقا دا بۇيىمدار بۇگىندە ارنايى وتكىزىلەتىن كورمەلەردە ساتىلىپ، تۇسكەن قاراجات مەكتەپتىڭ قامقورلىعىنداعى 14 مۇمكىندىگى شەكتەۋلى جاننىڭ مۇقتاجىنا جۇمسالادى ەكەن.
ايتا كەتەيىك، بولاشاق عالىمداردى دايىندايتىن نازاربايەۆ زياتكەرلىك مەكتەبىندە بۇگىندە بارلىعى 40 قا جۋىق قوسىمشا ۇيىرمەلەر جۇمىس ىستەيدى. كوركەمدىك، ادەبي كلۋبتارمەن قاتار فوتو- جانە تەلەستۋديالاردىڭ وقۋشىلار ءۇشىن ءاردايىم ەسىكتەرى ايقارا اشىق. ءارقايسىنىڭ ءوز بىلىكتى ماماندارى ءدارىس بەرەدى. وتاندىق ۇستازدارمەن قاتار شەتەلدىك مامانداردا بالالاردىڭ شىعارماشىلىعىن ارتتىرۋعا ءوز سەپتىگىن تيگىزۋدە. سونىمەن قاتار مۇنداي ۇيىرمەلەر وقۋشىلاردىڭ بولاشاققا دەگەن باعىت- باعدارىن ايقىندايتىنى انىق.
اۆتور: ەلۋباي اۋەزوۆ 
