ناۋرىز مەيرامىندا قىدىر بابا مەن ۇماي انانى كەڭىنەن دارىپتەۋگە ءتيىسپىز - دەپۋتات الدان سمايىل
توقتالا كەتەتىن جايت، تاياۋدا مادەنيەت جانە سپورت ءمينيسترى ارىستانبەك مۇحامەدي ۇلىنىڭ ناۋرىز مەيرامىنا ۇلتتىق مازمۇن بەرۋ تۋرالى تۇجىرىمداماسى باسپا سوزدە جاريالانعان بولاتىن. وسىعان وراي، دەپۋتات ءمينيستردىڭ ۇسىنىسىنا تولىق قوسىلا وتىرىپ، ءداستۇرلى مەرەكەنى فولكلورلىق- ەتنوگرافيالىق اۋقىمنان جالپى قازاقستاندىق مەرەكە دارەجەسىنە كوتەرۋدى العا تارتادى.
«ناۋرىز بەن ونىڭ تاريحى جايىندا ايتقاندا، الدىمەن قىدىر بابا مەن ۇماي انا جايلى ءسوز قوزعاۋعا ءتيىسپىز. قىدىر قازاقتىڭ سونداي- اق باسقا دا تۇركى تىلدەس حالىقتاردىڭ ەرەكشە جارىلقاۋشى قاسيەتكە يە اۋليەسى. بۇل كۇندەردىڭ كۇنىندە «قىرىقتىڭ ءبىرى» بولىپ جولىعىپ، باعىڭدى جاندىرادى. سوندىقتان جۇزدەسكەننىڭ ءبارىن كەمسىتپەي، ءىلتيپات كورسەتۋ كەرەك. قىدىر بۇل تۇرعىدا ادام بالاسىن ءوزارا تابىستىرۋشى، الىس- جاقىندى جالعاستىرۋشى كيەلى تۇلعا»، - دەدى ا. سمايىل.
سونىمەن قاتار دەپۋتات ۇماي انانىڭ تۇركى تەكتەستەردىڭ اراسىندا حاۋا انادان كەيىنگى ۇلى اناسى ەكەنىن، ايەل مەن بالانىڭ ءپىرى ەكەنىن ەسكە سالدى.
«مىنە، وسى ەكى اۋليە ناۋرىز كۇنى الدىندا جانە توي كۇنى بالاباقشاداعى بۇلدىرشىندەر مەن تومەنگى سىنىپتاعى سىيلىق ۇلەستىرسە، باتالارىن بەرىپ، يگى- تىلەكتەرىن بىلدىرسە، ۇلى مەيرام - ناۋرىز مەرەكەسىنىڭ تاريحى مەن ەرەكشەلىكتەرى جايلى اڭگىمەلەپ بەرسە قۇبا- قۇپ ەمەس پە؟ بۇل الداعى ۋاقىتتا داستۇرگە اينالسا بالا جۇرەگىنە قىدىر بابانىڭ كيەسى، ۇماي انانىڭ مەيىرىم- شۋاعى دارىپ، ۇلتتىق ۇلاعات پەن تالىمگە اينالماي ما؟ ءداستۇرىمىز بەن سالتىمىز بالدىرعاندارعا اسەرلى ناسيحاتتالىپ، اياز اتاعا جۇگىنىپ، قارشا قىزعا جۇگىرگەن بالاۋسالار تۇپكى تامىرىنا وسىلاي ورالماي ما؟ ناۋرىزدى ۇلىقتاپ، تاريحتى قادىرلەۋ ءۇشىن پايدالانۋ دەگەنىمىزدىڭ ءبىرى وسى»، - دەيدى دەپۋتات الدان سمايىل.
اۆتور: قانات مامەتقازى ۇلى
