لوندوندا قازاقستاندىق «كازسپورت» ءتىلشىسى جۇمىس ىستەي باستادى
جۋىردا ۇلى بريتانيانىڭ تانىمال «Daily Mail» باسىلىمىندا اعىلشىن پرەمەر-ليگاسىنىڭ ويىندارىن قازاقستاندىق جانكۇيەرلەردىڭ قالاي تاماشالايتىنى تۋرالى ماقالاسى دا جارىق كوردى، - دەپ حابارلادى تەلەارنانىڭ لوندونداعى ءتىلشىسى. انگليا چەمپيوناتىنىڭ 23- تۋرىنداعى «چەلسي» مەن «مانچەستەر سيتي» كلۋبتارى اراسىنداعى باستى ماتچ پرەمەر-ليگاداعى شەتەلدىك حابار تاراتۋشىلاردىڭ (كورسەتىلىمنىڭ قۇقىق يەلەرى) سانى بويىنشا جاڭا رەكورد ورناتتى. بۇل ويىندى الەمنىڭ 24 كومپانياسى (تەلەارناسى) كورسەتكەن. بۇعان دەيىنگى رەكورد 19 تەلەارنا الەمگە تاراتقان «مانچەستەر سيتي» مەن «مانچەستەر يۋنايتەد» كلۋبتارىنىڭ اراسىنداعى 2012-جىلى وتكەن كەزدەسۋگە تيەسىلى بولعان ەدى.
«چەلسي» مەن «مانچەستەر سيتي» كەزدەسۋىن كورسەتكەن 24 كومپانيا اراسىندا قازاقستاندىق «Kazsport» تەلەارناسى دا بار. «ءبىز ويىنداردى تەك كورسەتىپ قانا قويماي، بارلىق وقيعالاردىڭ ورتاسىندا بولىپ، كورەرمەنگە ماتچ كەزىندەگى كوڭىل-كۇيدى بەرۋگە تىرىسامىز»، - دەيدى ز. سەيفۋللينا. «اعىلشىن پرەمەر-ليگاسى - فۋتبول الەمىندە ەڭ قىزىقتى دا تارتىستى ۇلتتىق چەمپيوناتتاردىڭ ءبىرى. قازاقستاندا دا وتە تانىمال. ءبىزدىڭ ەلدە «چەلسي»، «مانچەستەر يۋنايتەد»، «ارسەنال»، «ليۆەرپۋل» جانە باسقا دا اعىلشىن كلۋبتارىنىڭ جانكۇيەرلەرى كوپ. سول كورەرمەندەردىڭ قالاۋى قابىل بولىپ، قازىرگى ۋاقىتتا قازاقستاندىقتار انگليا پرەمەر-ليگاسىن وتاندىق تەلەارنادان كورە الادى»، - دەپ كەلتىرەدى «Kazsport» ءتىلشىسىنىڭ ءسوزىن «Daily Mail» باسىلىمى.
ەستەرىڭىزگە سالا كەتەيىك، فۋتبول جانكۇيەرلەرى 2014-جىلدىڭ تامىزىنان 2016-جىلدىڭ مامىر ايىنا دەيىن «قازاقستان» جانە «Kazsport» تەلەارنالارىنان اعىلشىن پرەمەر-ليگاسىنىڭ تىكەلەي كورسەتىلىمىن تاماشالاي الادى. شەتەلدىك فۋتبول تۋرنيرلەرى اراسىندا قازاقستاندىق فۋتبول جانكۇيەرلەرى ءۇشىن اعىلشىن پرەمەر-ليگاسىنىڭ ورنى ەرەكشە. الەمدەگى ەڭ «باي» فۋتبول ليگاسىنا ءارقايسىسى 38 ماتچتان وتكىزەتىن تاڭداۋلى 20 كلۋب قاتىسادى («چەلسي»، «مانچەستەر يۋنايتەد»، «ارسەنال»، «ليۆەرپۋل»، «مانچەستەر سيتي» جانە ت. ب.). اعىلشىن پرەمەر-ليگاسى كوپ جىلدار بويى الەم بويىنشا بارلىق فۋتبول چەمپيوناتتارىنىڭ ىشىندە كورەرمەندەردىڭ باسىم بولىگىنە يە. ونى الەمنىڭ 200 مەملەكەتىندە ترانسلياتسيالايدى. تۋرنير اۋديتورياسى 600 ميلليون ادامدى قۇرايدى.
