اقشا ايىرباستاۋ پۋنكتتەرى ۆاليۋتا ساتۋدان باس تارتقانى تۋرالى انىقتاما بەرۋى ءتيىس
قولما-قول اقشانى ايىرباستاۋ وپەراتسيالارىنىڭ ەرەجەلەرىنە قاتىستى وسىنداي شارا قارالدى.
بۇل تۋرالى مالىمەتتى قازاقستان ۇلتتىق بانكىنىڭ باسپا ءسوز قىزمەتى تاراتتى، - دەپ حابارلايدى Tengrinews.kz ءتىلشىسى.
«ەرەجەلەرگە سايكەس، ەگەر ۆاليۋتانى ساتۋ مەن ساتىپ الۋدىڭ باعامى كورسەتىلگەن ايىرباستاۋ پۋنكتىندە جەكە تۇلعاعا ۇلتتىق ۆاليۋتانىڭ نەمەسە شەتەلدىك ۆاليۋتانىڭ بولماۋىنا بايلانىستى اقشا ايىرباستاۋ وپەراتسياسىن جۇرگىزۋدەن باس تارتىلسا، جەكە تۇلعا اقشا ايىرباستاۋ پۋنكتىندە جوق ۆاليۋتانىڭ سوماسى مەن ءتۇرى كورسەتىلگەن، بەرىلگەن كۇنى مەن ۋاقىتى جازىلعان انىقتامانى كاسسيردەن تالاپ ەتۋگە قۇقىعى بار. انىقتاماعا كاسسيردىڭ قولى قويىلىپ، اقشا ايىرباستاۋ وپەراتسيالارىن ۇيىمداستىرۋعا قۇقىعى بار زاڭدى تۇلعانىڭ (فيليالداردا دا) بەكىتىلگەن ىشكى ەرەجەلەرىنە سايكەس تىركەلەدى. ەگەر بۇل ىستەلمەسە، زاڭ بۇزۋشىلىق بولىپ ەسەپتەلەدى»، - دەپ ءتۇسىندىردى قارجى رەتتەۋشى بانكتىڭ باسپا ءسوز قىزمەتىنىڭ وكىلدەرى.
الايدا بۇل شارا بارلىق جەردە قولدانىلمايدى. Tengrinews.kz ءتىلشىسى بىرنەشە ايىرباستاۋ پۋنكتى بار ايماق - الماتىنىڭ اۋەجايىنا بارىپ قايتتى. Facebook الەۋمەتتىك جەلىسىندە شەتەلدىك ۆاليۋتانىڭ جوقتىعىن ايتىپ شاعىمدانعاندار بولدى.
راسىندا دا بەس اقشا ايىرباستاۋ پۋنكتىنىڭ ۇشەۋىندە دوللار بولماي شىقتى، ال ەۋرو شەكتەۋلى مولشەردە عانا بولدى. ال تارتىپكە ساي ۆاليۋتانىڭ جوقتىعىن راستايتىن انىقتاما بەرۋ تۋرالى وتىنىشىمىزگە كاسسير تاڭدانىس ءبىلدىردى.
«الماتىنىڭ اۋەجايىندا بىردە-ءبىر ايىرباس پۋنكتى دوللاردى دا، ەۋرونى دا، رۋبلدى دە ساتپايدى. تەك ساتىپ الادى. «ال وندا نەگە سىزدەر ساتىپ الۋمەن بىرگە ساتۋدىڭ باعاسىن كورسەتىپ، ادامداردى الدايسىزدار؟» دەگەن سۇراققا: «مۇمكىن قازىر بىرەۋ دوللارىن ساتاتىن شىعار، ءبىز بىردەن ساتىپ الىپ، ساتامىز" دەپ جاۋاپ بەردى»، - دەپ جازدى Facebook جەلىسىن قولدانۋشىلاردىڭ ءبىرى.
ايتا كەتەيىك، الماتى اۋەجايىنداعى ايىرباستاۋ پۋنكتتەرى 3 - اقپان كۇنى تابلودا كورسەتىلگەن باعام بويىنشا: دوللاردى 183 تەڭگەمەن ساتىپ الىپ، 185 تەڭگەگە ساتىپ جاتىر.
