اۆستراليا قازاقستانداعى سپورت سالاسىن باسقارۋدىڭ زاماناۋي جۇيەسىن دامىتۋعا قولداۋ كورسەتپەك
ەكى مەملەكەتتىڭ وكىلدەرى مادەني ەسكەرتكىشتەردىڭ ساقتالۋى مەن بۇقارالىق سپورت ماسەلەلەرىن تالقىلادى، دەپ حابارلانعان ق ر مادەنيەت جانە سپورت مينيسترلىگىنىڭ سايتىندا.
بۇل جۇزدەسۋ بۇكىل الەمدىك مادەني جانە تابيعي مۇرالاردى ساقتاۋ، الەم مادەنيەتىنە قولداۋ كورسەتۋ ماسەلەلەرىن تالقىلاۋدان باستالدى.
يۋنەسكو جانە يسەسكو ىستەرى بويىنشا ق ر ۇلتتىق كوميسسياسىنىڭ باسشىسى رەتىندە مينيستر ا. مۇحامەدي ۇلى ۇلتتىق مادەني مۇرالاردى ساقتاۋ سالاسىندا يۋنەسكو-مەن ءوزارا ارەكەتتەستىكتەگى قازاقستاندىق ۇلگىسىمەن ءبولىستى. ول قازاقستاندا تاريح جانە مادەنيەت ەسكەرتكىشتەرىنىڭ ساقتالۋى، ولاردى يۋنەسكو بۇكىل الەمدىك مۇرا تىزىمىنە ەنگىزىلۋى بويىنشا كەڭ كولەمدى جۇمىستار جۇرگىزىلىپ جاتقاندىعىن مالىمدەدى. بۇگىنگى تاڭدا تىزىمگە قازاقستاننىڭ بىرەگەي تاريحي جانە مادەني ەسكەرتكىشتەرى قوجا احمەت ياسساۋي كەسەنەسى (2003)، تامعالى پەتروگليفتەرى (2004)، سولتۇستىك قازاقستاننىڭ دالالارى مەن كولدەرى (2008) جانە ۇلى جىبەك جولىنىڭ چانان-تيان-شان بولىگىندەگى نىساندارى - قايالىق، قارامەرگەن، تالعار، اقتوبە، اقىرتاس، قۇلان، قوستوبە جانە ورنەك قالاشىقتارى (2014) ىلىكتى.
ءوز كەزەگىندە پيتەر ۆۋلكوتت جاسىل ماتەريكتىڭ اتىنان يۋنەسكو- نىڭ بۇكىل الەمدىك مۇرا تىزىمىنە 19 نىسان قوسىلعاندىعىن ءمالىم ەتتى. سونىمەن قاتار ول اۆستراليا ۇكىمەتى جاساقتاعان 2050-جىلعا دەيىنگى ۇلكەن بارەرلىك ريفتىڭ تۇراقتى دامۋىنىڭ ۇزاق مەرزىمدى جوسپارى تۋرالى باياندادى. بۇل نىسان بويىنشا ماسەلە ۇستىمىزدەگى جىلدىڭ ماۋسىم ايىندا بونندا وتەتىن يۋنەسكو كوميسسياسىنىڭ وتىرىسىندا قاراستىرىلادى دەپ جوسپارلانىپ وتىر.
سونىمەن قاتار كەزدەسۋگە قاتىسۋشىلار سپورت جانە دەنە شىنىقتىرۋ سالاسىنداعى ىنىتىماقتاستىق بويىنشا پىكىر الماستى. قازاقستاندىق ۆەدومستۆانىڭ باسشىسى اۆستراليا ۇلتتىق مادەني مۇرالاردى ساقتاۋدا ۇلگى بولىپ تابىلاتىندىعىن ەسكەرە وتىرىپ، بولاشاقتا بۇل سالادا ءوزارا بايلانىس ءتيىمدى جۇزەگە اسىرىلاتىندىعىنا ءۇمىت ارتتى. ول بۇل مەملەكەتتىڭ سپورتتىق قوزعالىستى دامىتۋ مەن ناسيحاتتاۋداعى جەتىستىكتەرىن اتاپ ءوتتى.
پيتەر ۆۋلكوتت بولسا، قازاقستاندىق سپورتتىڭ زاماناۋي باسقارۋ جۇيەسىن دامىتۋعا قولداۋ كورسەتۋ مەن اۆستراليانىڭ تابيعي ساياباقتارىن باسقارۋداعى تاجىريبەسىمەن بولىسۋگە دايىندىعىن ءبىلدىردى.
