قىتايدا بۇركىت سالۋدان چەمپيونات ءوتتى

ۇمىتىلا باستاعان قازاقتىڭ بەكزادا ونەرىن جانداندىرۋ ءۇشىن وتكەن شاراعا 67 قۇسبەگى قاتىستى، دەپ حابارلايدى 24.kz.

بۇل - قىتايدىڭ ىلە-قازاق اۆتونوميالىق وبلىسىندا ءوتىپ جاتقان 3-بۇركىتشىلەر چەمپيوناتى. ادەتتەگىدەي سايىستا قىران قۇستى قولعا شاقىرۋ، يەسى مەن بۇركىتتىڭ اراسىنداعى بايلانىس باعالاندى. سودان كەيىن قاناتتىنى قويانعا سالىپ، ۇشقىرلىعىن، ايلا-ءتاسىلىن تەكسەردى. جالپى، شىڭجانداعى قازاقتار بۇركىت سالۋدان جازعى جانە قىسقى چەمپيوناتتى تۇراقتى تۇردە وتكىزىپ تۇرادى. جات جەردە بابادان قالعان بۇل ونەردىڭ تۇعىرىن بەكەمدەپ جۇرگەن قانداستارىمىزدىڭ باستى كوزدەگەنى - جاستار اراسىندا بۇركىتشىلىكتى ناسيحاتتاۋ.

«بۇل جويىلىپ بارا جاتىر. ءبىزدىڭ ۇرپاقتارىمىز اتقا دا مىنبەيدى، بۇركىت دەگەننەن قورقادى، بىلمەيدى. سوندىقتان ۇلتىمىزدىڭ وسى ءداستۇرىن ۇيرەتۋدى وزىمىزگە ماقسات تۇتتىق»، - دەيدى قازىلار القاسىنىڭ مۇشەسى تابىسبەك سماعۇل ۇلى.

چەمپيوناتتىڭ باس جۇلدەسى مەن ارنايى سىيلىعىن نۇرعازىم قالامان ۇلى مەن سەرىك باقىتبەك ۇلى جەڭىپ الىپ، 5 مىڭ يۋان ەنشىلەدى. وسىلايشا قىتايداعى قۇسبەگىلەر قاراقيا قىستاۋىن ساڭقىلداعان قىران داۋىسىمەن ەكى كۇن تەربەتىپ قايتتى.

 

 

 

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى