تاريحي دەرەكتىك ماڭىزى بار جىر جيناعى جارىققا شىقتى - فوتو
وقىرماندارىنا «داريعا عۇمىر، جىر-جۇرەك»، «تاڭعى شىق»، «جاپىراق-عۇمىر»، «شىراق»، «پىراق»، «ەرىك قۇرمانعاليەۆ»، «وراز ءبي» اتتى كىتاپتارىمەن جاقىن تانىس بولعان مارجان ەرشۋدىڭ بۇل كىتابىنا ءار جىلدارى جازعان شىعارمالارى (پوەزيا، دراما، پروزا، اۋدارما، ادەبي - سىن ماقالالارى) ەنگەن.
تۇساۋكەسەردى جۇرگىزگەن بەلگىلى اقىن قالقامان سارين ءوز زامانداسى جايلى وقىرماندارعا كەڭىنەن ايتا وتىرىپ، مارجان ەرشۋدىڭ قازاقتىڭ الاشتانۋشى عالىمدارىنىڭ قاتارىنا ەنگەنىن اتاپ ءوتتى. وسى ۋاقىتقا دەيىن الاش قايراتكەرلەرى تۋرالى جىر-داستاندار جازىپ، ءتۇرلى زەرتتەۋلەرىن جارىققا شىعارعان مارجان ەرشۋدىڭ بۇل سالاداعى ەڭبەكتەرىنىڭ دەرەكتىك ماڭىزى زور.
اقىننىڭ مەرەيىن كوتەرگەن استانا قالاسىنىڭ تىلدەردى دامىتۋ باسقارماسىنىڭ باسشىسى ەربول تىلەشوۆ باسقارما اتىنان قۇرمەت كورسەتتى.
اقىن مارجان ەرشۋ تۇركى حالىقتارى ادەبيەتىنىڭ دامۋىنا زور ۇلەس قوسىپ جۇرگەن اۋدارماشى - عالىم. ونىڭ ەڭبەگىن جوعارى باعالاعان يۋنۋس ەمرە اتىنداعى تۇرىك مادەني ورتالىعىنىڭ ديرەكتورى يبراگيم يىلدىرىم مىرزا تۇركيانىڭ قازاقستانداعى ەلشىلىگى اتىنان قۇرمەت گراموتاسىن تابىستادى.
قازاقستاننىڭ ەڭبەك سىڭىرگەن قايراتكەرى، حالىقارالىق ش. ايتماتوۆ اتىنداعى اكادەميانىڭ اكادەميگى راقىمجان وتاربايەۆ مارجان ەرشۋدىڭ شىعارماشىلىعىنىڭ تاريحي ماڭىزى زور ەكەنىنە توقتالدى. «مارجان اقىن تاريح بەتتەرىنەن كورىنبەي كەتكەن قايراتكەرلەرىمىزدى ورتامىزعا قايتا اكەلدى. ونىڭ ىزدەنىمپازدىعى مەن زەرتتەۋشىلىك قابىلەتىن جوعارى باعالايمىن. قازاق قىزدارىنا ءتان قايسارلىق پەن ەڭبەكقورلىقتى وسى اقىن قىزىمىزدىڭ بويىنان كورەمىن»، - دەدى ول.
اقىن نەسىپبەك ايت ۇلى مارجان ەرشۋدىڭ تۇركى حالىقتارىنىڭ ادەبيەتىن قازاق تىلىنە اۋدارىپ جۇرگەن ەڭبەگىن جوعارى باعالايتىندىعىن جەتكىزدى. «ولەڭ اۋدارۋ دەگەن وڭاي ەمەس. وزگە تىلدەگى ولەڭدى قازاقشا سويلەتۋ ءۇشىن قازاقتىڭ جانىن كىرگىزۋ كەرەك. سوندا بۇل ولەڭ قازاققا جاقىن بولادى»، - دەي كەلە اقىننىڭ اۋدارما سالاسىنداعى قىزمەتىنە تابىس تىلەدى.
ايتا وتەيىك، كىتاپتىڭ مۇقاباسىن بەزەندىرگەن - بەلگىلى سۋرەتشى، ق ر سۋرەتشىلەر وداعىنىڭ مۇشەسى، ق ر مادەنيەت قايراتكەرى كاميلا جاپالوۆا. سۋرەتشى ءوز شىعارماشىلىعىن اقىننىڭ ولەڭدەرىمەن تەرەڭ ۇشتاستىرا وتىرىپ، كىتاپتىڭ تارتىمدى بولا تۇسۋىنە زور ۇلەسىن قوسقان.
نۇرسەرىك جولبارىس
