اقمولا وبلىسىندا جوعالىپ كەتكەن جاسوسپىرىم قىز وزبەكستان شەكاراسىنان تابىلدى
بۇل تۋرالى وبلىستىق ءى ءى د باسپا ءسوز قىزمەتى ءمالىم ەتتى.
پوليتسەيلەردىڭ مالىمەتى بويىنشا، قاڭتاردىڭ 28 ءى اتباسار اۋداندىق ءى ءى ب كەزەكشىلىك بولىمىنە مارينوۆكا سەلوسىنىڭ تۇرعىنى 10 سىنىپتا وقيتىن 16 جاستاعى قىزىنىڭ ءىز-ءتۇزسىز جوعالىپ كەتكەنىن ايتىپ، شاعىمدانعان. اناسىنىڭ ايتۋىنشا، جاسوسپىرىم قاڭتاردىڭ 27 ءى كۇنى كۇندىزگى 11:00 شاماسىندا ۇيىنەن شىعىپ، بەلگىسىز باعىتتا كەتىپ قالعان. جەدەل ىزدەستىرۋ شاراسىن قولعا العان پوليتسەيلەر قىزدىڭ ەلەكترو پويىزبەن استاناعا، ودان ءارى وڭتۇستىك قازاقستان وبلىسىنا جول تارتقانىن انىقتايدى. ول جاقتاعى ارىپتەستەرىمەن جۇرگىزىلگەن جۇمىستاردىڭ ناتيجەسىندە جاسوسپىرىم قىز وزبەكستانمەن شەكارالاس ەلدى مەكەندەردىڭ بىرىندە تابىلىپ، شىمكەنت قالاسىنداعى كامەلەتتىك جاسقا تولماعانداردى بەيىمدەۋ ورتالىعىنا جەتكىزىلەدى.
كەيىن بەلگىلى بولعانداي، جاسوسپىرىم الەۋمەتتىك جەلى ارقىلى 31 جاستاعى وزبەكستان ازاماتىمەن حات جازىسىپ تۇرعان ەكەن. وزبەك ازاماتى ونى ءوز ەلىنە شاقىرعان كورىنەدى. ول قىزدى استانادا قارسى الىپ، ەكەۋى بىرگە وزبەكستانعا كەتپەك بولعان. ابىروي بولعاندا قۇقىق قورعاۋ ورگاندارىنىڭ جەدەل ءىس قيمىلىنىڭ ارقاسىندا جاسوسپىرىم شەكارا اسا المادى.
