ا ق ش ەلشىسى نازاربايەۆپەن كەزدەسۋدى اسىعا كۇتىپ ءجۇر
«ەلشى دجوردج كرول ا ق ش-تىڭ قازاقستان رەسپۋبليكاسىنداعى ەلشىسى رەتىندە انت بەرۋگە 2015 - جىلدىڭ 8 - قاڭتارىندا كەلتىرىلگەن. ول قازاقستان پرەزيدەنتى نۇرسۇلتان نازاربايەۆقا سەنىم گراموتاسىن تاپسىرۋ سالتاناتىن اسىعا كۇتىپ ءجۇر»، - دەلىنگەن تاراتىلعان حابارلامادا.
بۇعان دەيىن كرول بىرنەشە جىل بويى ا ق ش-تىڭ وزبەكستانداعى ەلشىسى قىزمەتىن اتقاردى. ول - ديپلوماتيا قىزمەتىنىڭ كەڭەسشى- ەلشى دەڭگەيىندەگى جوعارعى بۋىنىنىڭ بىلىكتى ديپلوماتى.
بۇگىنگە دەيىن ا ق ش مەملەكەتتىك دەپارتامەنتىنىڭ وڭتۇستىك جانە ورتالىق ازيا ىستەرى بويىنشا بيۋروسىندا مەملەكەتتىك حاتشى كومەكشىسىنىڭ ورىنباسارى مىندەتىن اتقاردى.
دجوردج كرول ديپلوماتيالىق قىزمەتكە 1982 - جىلى كىرىستى، 2003-2006 - جىلدارى ا ق ش- تىڭ بەلارۋستەگى ەلشىسى بولدى.
ا ق ش- تىڭ ۆارشاۆا، نيۋ-دەلي، ماسكەۋ، كيەۆ، مينسك قالالارىنداعى ەلشىلىكتەرىندە، سانكت-پەتەربۋرگتەگى باس كونسۋلدىعىندا قىزمەت ەتتى، ا ق ش مەملەكەتتىك دەپارتامەنتىنىڭ رەسەي ىستەرى جونىندەگى بيۋروسىندا ديرەكتور جانە ەلشىنىڭ جاڭا تاۋەلسىز مەملەكەتتەر بويىنشا ايرىقشا تاپسىرمالار جونىندەگى اعا كەڭەسشىسى بولدى.
بۇعان قوسا، جاڭا ەلشى بۇرىن امەريكانىڭ ۇلتتىق اسكەري كوللەدجىندە وقىتۋشى بولعان، ولشەۋسىز ەڭبەگى ءۇشىن ا ق ش مەملەكەتتىك دەپارتامەنتىنىڭ بىرنەشە جوعارعى قۇرمەتتى ماراپاتىن يەلەنگەن. ول - ا ق ش-تىڭ گارۆارد جانە ۇلى بريتانيانىڭ وكسفورد ۋنيۆەرسيتەتتەرىنىڭ تۇلەگى.
