جەڭىس تاقىرىبىندا جازاتىن جۋرناليستەر ءۇشىن بايقاۋ جاريالاندى - ب ق و
ۇيىمداستىرۋ كوميتەتىنەن تۇسكەن مالىمەتكە قاراعاندا، اتالمىش بايقاۋدى ورال قالالىق ءماسليحاتى، مۇرات جاكىبايەۆتىڭ پروديۋسەرلىك ورتالىعى جانە «جايىق پرەسس» ج ش س ۇيىمداستىرىپ وتىر.
بايقاۋعا باتىس قازاقستان وبلىسىنىڭ اۋماعىندا جارىق كورەتىن جانە تارالاتىن بارلىق گازەت رەداكتسيالارىنىڭ جۋرناليستەرى، سونىمەن قاتار جاريالانعان بايقاۋعا قىزىعۋشىلىق تانىتقان، ۇلى وتان سوعىسى جىلدارىنداعى مايدانداعى جانقيارلىق ەرلىك پەن تىلداعى جانكەشتى ەڭبەكتى پاش ەتۋگە شىنايى ىقىلاس بىلدىرگەن جۋرناليستيكا سالاسىنىڭ ارداگەرلەرى دە قاتىسا الادى. شىعارماشىلىق دوداعا جەكە جاريالانىمداردى، سونداي-اق تاقىرىپتىق توپتامالار مەن ءبىر اۆتور ماتەريالدارىنىڭ سەرياسىن ۇسىنۋعا بولادى. ماتەريالدار قازاق جانە ورىس تىلدەرىندە قابىلدانادى.
«جەڭىس تاريحى» - «يستوريا پوبەدى» بايقاۋىنىڭ باستى ماقساتى - ۇلى وتان سوعىسى كەزىندە باتىس قازاقستاندىقتاردىڭ مايدانداعى جانقيارلىق ەرلىگى مەن ەل ىشىندەگى، ياعني تىلداعى جانكەشتى ەڭبەگىن بارىنشا كەڭ جانە جان-جاقتى كورسەتۋگە جۋرناليستەردى تارتۋ. سونىمەن قاتار كوپشىلىككە بەيمالىم، بۇرىن ەش جەردە جاريالانباعان دەرەك-دايەكتەردى، فاشيستىك باسقىنشىلارعا قارسى كۇرەستە قازاقستاندىقتاردىڭ باسىنان وتكەرگەن سىن ساعات، سىندارلى ساتتەرىن كورسەتۋگە ۇمتىلعان جۋرناليستەردىڭ شىعارماشىلىق ىزدەنىسىنە قولداۋ كورسەتۋ.
بايقاۋ ءۇش كەزەڭنەن تۇرادى:
I كەزەڭ - 2015 - جىلدىڭ 1 - اقپان- 15 - ناۋرىز ارالىعى؛
II كەزەڭ - 2015 - جىلدىڭ 15 - ناۋرىز - 15 - ءساۋىر ارالىعى؛
III كەزەڭ - 2015 - جىلدىڭ 15 - ءساۋىر- 20 - مامىر ارالىعى.
بايقاۋعا قاتىسۋ ءۇشىن گازەت بەتتەرىندە جاريالانعان ماقالالاردىڭ كوشىرمەلەرىن جارىق كورگەن ۋاقىتىن كورسەتە وتىرىپ، بايقاۋ كوميسسياسىنىڭ قاراۋىنا تاپسىرۋ قاجەت. ءار كەزەڭ قورىتىندىسى بويىنشا كوميسسيا گازەتتەردە اتالمىش كەزەڭ ارالىعىندا جارىق كورگەن ماتەريالداردى عانا قاراستىرادى. تالاپقا ساي كەلەتىن ماتەريالدار ءار كەزەڭنىڭ اياقتالۋىنان ەكى كۇن بۇرىن zhenis.pobeda.45@mail.ru ەلەكتروندىق مەكەنجايىنا ۇسىنىلادى، سونداي-اق اتالمىش ماقالا جاريالانعان گازەتتىڭ ءنومىرى ورال ق. , مۇحيت كوش., 57/1 مەكەنجايى بويىنشا ورنالاسقان «جايىق پرەسس» ج ش س كەڭسەسىنە جەتكىزىلۋى ءتيىس.
ۇيىمداستىرۋ كوميتەتى بايگەگە ۇسىنىلعان ماقالا-ماتەريالداردى «جايىق پرەسس» ج ش س- نىڭ ەلەكتروندى سايتىندا جانە ءوزىنىڭ Facebook-تاعى پاراقشاسىندا جاريالايدى.
