قازاق پوەزياسىنىڭ ون تومدىق انتولوگياسى جارىققا شىقتى
وسى ورايدا، ەرتەڭ، 4 - اقپان كۇنى ساعات 15:00 دە قازاقستان رەسپۋبليكاسىنىڭ ۇلتتىق كىتاپحاناسىندا تانىستىرىلىم ءراسىمى وتەدى.
«مەرەكە باسپاسى» اتىراۋ وبلىسى اكىمدىگىنىڭ تاپسىرىسىمەن جانە قولداۋىمەن «جىر مارجانى» اتتى ون تومدىق قازاق پوەزياسىنىڭ انتولوگياسىن جارىققا شىعاردى. قازاق كىتاپ باسۋ تاريحىندا تۇڭعىش رەت 1977 - جىلى ەكى تومدىق قازاق سوۆەت پوەزياسىنىڭ انتولوگياسى جانە بەلگىلى ادەبيەتشى ساۋىتبەك ءابدىراحمانوۆ قۇراستىرعان (2007 - جىل، «راريتەت» باسپاسى) ەكى تومدىق انتولوگيادان باسقا بۇرىن-سوڭدى قازاق حالقىنىڭ ارعى تاريحىنان بەلگىلى بابا جىراۋدان باستاپ بۇگىنگى جاس تالانتتارعا دەيىن مەيلىنشە تولىق قامتىلعان كولەمدى 10 تومدىق انتولوگيا وقىرمان قولىنا تيگەن ەمەس.
10 تومدىقتىڭ I تومى ۇلى بابامىز تاسقا قاشاپ جازىپ كەتكەن دانىشپاندىق جىرلارى مەن تۇرىك قاعاناتىن قۇرعان قۇتىلىع قاعاننىڭ ۇلى كۇلتەگىن قاعاننىڭ ەل شەجىرەسىنەن باستالادى. كۇلتەگىن مۇراسىنىڭ ەركىن ادەبي نۇسقاسىن جاساعان اقىن تەمىرحان مەدەتبەك.
«قازاق اقىندارىنىڭ باسىن قۇراپ، ون تومدىق جيناق شىعارۋ جونىندە اتىراۋ وبلىسىنىڭ اكىمى باقتىقوجا ىزمۇحامبەتوۆ باستاما جاساعان بولاتىن. سودان كەيىن اقىنداردىڭ شىعارمالارىن جيناۋ، ىرىكتەۋ، باسپاعا دايىنداۋ جونىندە كوپتەگەن جۇمىستار جاسالدى.
سونىڭ ناتيجەسىندە تۇڭعىش رەت وسىنداي ون تومدىق جارىققا شىعىپ وتىر. وندا قازاق تاريحىنداعى جىراۋلاردان باستاپ قازىرگى اقىنداردىڭ باسىم بولىگى قامتىلدى. بۇل كولەمدى جيناق ومىردەن ءوتىپ كەتكەن جىر جامپوزدارىنا كورسەتىلگەن ەرەكشە قۇرمەت دەپ ەسەپتەيمىز. سونداي- اق بۇگىنگى تاڭدا ءار وڭىردە جۇرگەن اقىندارعا دا جاسالعان ۇلكەن قولداۋ بولادى دەپ ويلايمىن»، - دەدى بەلگىلى قالامگەر، اتالعان انتولوگيانى قۇراستىرۋشى مەرەكە قۇلكەنوۆ.
وسى ون تومدىق جيناقتىڭ قازاق پوەزياسىن زەرتتەۋشى عالىمدار مەن سىنشىلارعا دا زور پايداسى تيەتىنى انىق. جىر سۇيەر قاۋىم ءۇشىن دە رۋحاني بايلىق بولماق.
678 اقىننىڭ باسىن قوسىپ، 3000 دانامەن جارىق كورگەن وسىناۋ جىر جادىگەرىنىڭ ءار تومى كوركەم بەزەندىرىلىپ، ءار اقىننىڭ بەينەسى سۋرەتشىنىڭ قىلقالامىمەن سالىنعان. بۇل جيناقتان سۋرەتشى التاي ايتجانوۆ قولتاڭباسىن كورەمىز. انتولوگيانى قۇراستىرعاندار مەرەكە قۇلكەنوۆ پەن گۇلسىم مۇقىشيەۆا. ءالعىسوزىن جازعان اقىن تەمىرحان مەدەتبەك.
مەرەكە قۇلكەنوۆتىڭ ايتۋىنشا، ون تومدىق انتولوگيانىڭ تانىستىرىلىم راسىمىنە اقىندار، سونداي-اق ومىردەن ءوتىپ كەتكەن جۇبان، عافۋ، قادىر، تۇمانباي جانە باسقا جىر ساڭلاقتارىنىڭ جۇبايلارى شاقىرىلىپ وتىر.
اۆتور: ايدىن بايمەن
