وقۋشى ايران پىسەتىن كۇبىنىڭ اۆتوماتتاندىرىلعان نۇسقاسىن ۇسىندى

«جاسىل ەكونوميكا» توڭىرەگىندە ىزدەنگەن ولار تىڭ يدەيالارعا تۇرەڭ سالا باستادى.

ماسەلەن، جالاعاشتىق وقۋشىلار كۇن ەنەرگياسىنان قۋات الاتىن كومباين جانە اۆتوماتتاندىرىلعان كۇبى مەن كەلساپ جاساپ شىعاردى.

سىر وڭىرىندە جىل سايىن ورتا ەسەپپەن 75 مىڭ گەكتار جەرگە كۇرىش تۇقىمى سەبىلەدى. ودان جىل سايىن 350 مىڭ تونناداي ءونىم جينالادى. سىر مارجانىن ورۋعا جۇزدەگەن تەحنيكا جۇمىلدىرىلىپ، توننالاپ جانار ماي كەتەتىنى انىق.

داڭعايىر ديقانداردىڭ بۇگىنگى ءىزباسارلارى وسى شىعىنداردى قىسقارتۋدى كوزدەيدى.

باتىرجان قونىس، №232-ورتا مەكتەپتىڭ وقۋشىسى:

- بۇل كومباين كۇن كوزىنەن قۋات الادى، امبەباپ. ياعني ەكى قىزمەتتى ءبىر مەزەتتە اتقارادى. ءوزى ورادى جانە ءوزى ساباعىنان ءداندى اجىراتادى. ءبىر كۇندە العان قۋاتىمەن 2-3 كۇندەي جۇمىس جاساۋعا بولادى.

بولاشاقتا جارىق كورىپ جاتسا، بۇل كومباين ىشىندە جەلدەتكىش بۋنكەر ورناتىلادى. جانە ءوزىن باسقاراتىن كومپيۋتەر قۇرىلعىسى بولادى. 11-سىنىپ وقۋشىسى باتىرجان قونىس ازىرگە كۇننەن قۋات الاتىن كومبايننىڭ شاعىن ۇلگىسىن جاساعان. باستى ماقساتى -  ەكولوگيالىق تازا تەحنولوگيا ءارى سارقىلمايتىن ەنەرگيا كوزىن پايداعا جاراتۋ. ادام ويىنا كەلە بەرمەيتىن بۇل يدەيانى دامىتۋعا باتىرجاننىڭ عىلىمي جەتەكشىسى سەرىكبول الپىسوۆ ۇلەس قوسقان.

سەرىكبول الپىسوۆ، عىلىمي جەتەكشى:

- 1 ساعاتتا 15 تونناداي استىق جيناۋعا بولادى. قازىرگى كومبايندار سالماعى وتە اۋىر، سونى جەڭىلدەتىپ جاساۋعا بولادى. گەنەراتوردىڭ سالماعىنا كۇش تۇسپەيتىندەي، ءوزىنىڭ قۋاتىن مۇمكىندىگىنشە پايدالانۋعا جەڭىلدەتىپ جاساۋعا بولادى.

جالاعاشتىق تاعى ءبىر وقۋشى نۇرتىلەۋ جولاۋشى ايران ءپىسىپ، بيداي تۇيۋدە -  انالاردىڭ ەڭبەگىن جەڭىلدەتىن جول تاپتى. ول كادىمگى كۇبى مەن كەلساپتىڭ اۆتوماتتاندىرىلعان نۇسقاسىن جاساپ شىعارعان. وسى كۇرىلعىنىڭ كومەگىمەن 20 مينۋتتا 20 ليتر قاتىقتىڭ قايماعىن ءسۇزىپ، مايىن اجىراتىپ، ايرانىن الۋعا بولاتىنىن دالەلدەپ وتىر.

نۇرتىلەۋ جولاۋشى، №118-ورتا مەكتەپتىڭ وقۋشىسى:

- بۇنىڭ قۇرلىسى: ارقالىق، تىرەۋىشتەر جانە اينالدىرعىش مەحانيزم، پىسمەك جانە مىناۋ توق كوزى، كۇبى. بۇل اعاش كۇبى پلاستماسسا كۇبىلەرگە قاراعاندا وتە دامدىرەك بولادى، پىسكەندە جانە وتە تابيعي، ادام دەنساۋلىعىنا جاقسى. اۋىلدىق جەردە بارلىعىمىزدىڭ ۇيىمىزدە كۇبى بار. مۇنىمەن انامىز ايران پىسەدى. ونى ءپىسۋ ءۇشىن قولدىڭ كۇشىن كەرەك ەتەدى جانە ءبىراز ۋاقىت كەرەك. سوندىقتان دا مەن ەلەكترلى كۇبىنى ويلاپ تاپتىم.

بولاشاق عالىمدار «بولاشاقتىڭ ەنەرگياسى» توڭىرەگىندە ىزدەنە بەرمەك. ولار 2017 -جىلى ەلوردادا وتەتىن «ەكسپو» كورمەسىندە ءوز تۋىندىلارىن الەم نەزارىنا ۇسىنعىسى كەلەدى.

www.khabar.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى