استانادا قازاقتىڭ ساندىك-قولدانبالى ونەرى بۇيىمدارىنىڭ كورمەسى وتەدى
كورمە مۋزەيدىڭ سەرىكتەستىك جوباسى اياسىندا قازاقتىڭ ساندىك-قولدانبالى ونەرىنىڭ كونە داستۇرلەرى مەن تاريحي ارتەفاكتىلەرگە جاڭا ءومىر بەرگەن اۆتوردىڭ شىعارماشىلىعىن جان-جاقتى كورسەتۋ ماقساتىندا ۇيىمداستىرىلىپ وتىر، دەپ حابارلايدى ەلوردا اكىمدىگىنىڭ باسپا ءسوز قىزمەتىنەن.
ايجان ءابدۋبايتتىڭ شىعارماشىلىعى ايرىقشا. ول كونە داۋىرلەردەگى كيىمدەر مەن تۇرمىس قۇرالدارىن قالپىنا كەلتىرىپ، قايتا جاڭعىرتۋمەن اينالىسادى، كونە «زەرلەۋ» تەحنيكاسىن پايدالانىپ، توي جانە ۇلتتىق كيىمدەردى، تۇرمىس زاتتارىن جاسايدى.
اۆتوردىڭ ايتۋىنشا، كەستەلەپ توقۋدىڭ تامىرى تەرەڭدە جاتىر. قازاقتار بۇل كوركەم ادىسپەن بەدەلدى ادامداردىڭ سالتاناتتى كيىمدەرىن، باس كيىمدەرىن، تۇرمىستىق زاتتارىن اشەكەيلەگەن.
قازاقتىڭ تۇرمىسى مەن ءداستۇرلى كيىم-كەشەكتەرىن ەتنوگرافيالىق جانە تاريحي تۇرعىدا زەرتتەۋ قولونەر شەبەرىنە تاريحي ارتەفاكتىلەردىڭ تۇتاس ءبىر بولىگىن قالپىنا كەلتىرۋگە مۇمكىندىك بەردى.
ولاردىڭ قاتارىنداعى حان كيىمدەرىنىڭ جيناعى، جانگىر حاننىڭ اسكەري مۋنديرى، فاتيما حانشايىمنىڭ بەشپەنتى جانە قازاق اقسۇيەكتەرىنىڭ قايتا جاڭعىرتىلعان كۇندەلىكتى قولدانعان زاتتارى جوعارى دەڭگەيدەگى كوركەمدىك ورىندالۋ شەبەرلىگىمەن قاتار عىلىمي ماڭىزعا يە.
ا. ءابدۋبايتتىڭ قولىنان شىققان تۋىندىلار ق ر مەملەكەتتىك ورتالىق مۋزەيىنىڭ، ق ر تۇڭعىش پرەزيدەنتى مۋزەيىنىڭ، قازاقستاننىڭ وبلىستىق مۇراجايلارىنىڭ جيناقتارىندا ساقتالعان.
