قازاقستاننىڭ بىرنەشە بانكى يپوتەكانى دوللارمەن بەرۋدى توقتاتتى
ەسكە سالا كەتەيىك، وتكەن جىلدىڭ جەلتوقسان ايىندا قازاقستاننىڭ ءبىرقاتار بانكى يپوتەكالىق قارىزدى تەڭگەمەن راسىمدەۋدى ۋاقىتشا توقتاتىپ، تەك ۆاليۋتامەن بەرگەن بولاتىن.
الايدا قازىر تەك قازكوممەرتسبانك يپوتەكانى دوللارمەن بەرىپ جاتىر.
ال رەسەي جيناق بانكى مەن تەمىربانك قازىرگى تاڭدا دوللارمەن يپوتەكا بەرۋدى دە توقتاتتى. ونىڭ سەبەبىن بانكتەردىڭ call-ورتالىقتارى الەمدەگى ماكروەكونوميكالىق احۋالدىڭ ناشارلاۋىمەن ءتۇسىندىردى.
بانكتەردىڭ ءبىرى بۇعان دەيىن نەسيلەۋ جۇيەسىن جاڭارتۋ تۋرالى 20 - قاڭتاردان كەيىن بەلگىلى بولاتىنىن حابارلاعان ەدى. يپوتەكا بەرۋ جۇيەسى 2015 - جىلدىڭ اقپان ايىندا جاڭارتىلادى دەپ باعامدالدى. الايدا قازىر بانكتەردىڭ بايلانىس ورتالىقتارى يپوتەكالىق نەسيە بەرۋ جۇيەسىنىڭ قاشان جاڭاراتىنى تۋرالى بولجامدى مەرزىمدى دە ايتپاي وتىر.
سونىمەن قاتار، قازاقستاننىڭ وزگە دە بانكتەرىنىڭ يپوتەكانى تەك تەڭگەمەن بەرۋدى جالعاستىرىپ جاتقانىن ايتا كەتەيىك.
ولاردىڭ قاتارىندا ا ت ف بانكى، بانك سەنتركرەديت، ەۋرازيالىق بانك، اليانس بانك پەن حالىق بانكى بار. بۇل بانكتەردە قۇجات راسىمدەۋ كەزىندە باسپانا قۇنىنىڭ 20-30 پايىزىن الدىن الا تولەۋ مىندەتتەلەدى.
سونىمەن قاتار، بۇعان دەيىن پارلامەنت ءماجىلىسىنىڭ جالپى وتىرىسىندا دەپۋتات سۆەتلانا قادىراليەۆا «اق جول» پارتياسىنا قازاقستاننىڭ كوپتەگەن بانكتەرىندە تەڭگەمەن نەسيە بەرىلمەيتىنى جونىندە كاسىپكەرلەردەن وتە كوپ ارىز تۇسەتىنى تۋرالى ايتقان بولاتىن.
ونىڭ ايتۋىنشا، بارلىق نەسيە دوللارمەن نەمەسە شەتەلدىك ۆاليۋتا باعامىنا بايلانىپ بەرىلەدى.
دەپۋتات مۇنىمەن قوسا، تەڭگەمەن بەرىلگەن ءۇش نەسيەدە پايىزدىق ۇستەماقىنىڭ جوعارى بولعانى سونشا، كەز كەلگەن كاسىپكەرلىك قىزمەتىنىڭ ءمانىن جوعالتا الاتىنى تۋرالى ايتىپ ءوتتى.
الايدا قارجى ينستيتۋتتارىنىڭ call-ورتالىقتارى قازاقستان بانكتەرىنىڭ تۇتىنۋشىلىق نەسيەنى تەڭگەمەن جانە كەپىلسىز بەرۋدى توقتاتپاعانى جانە نەسيە بەرۋدى جالعاستىرىپ جاتقانى تۋرالى حابارلادى.
