تۇركيا وزگە مەملەكەتتەردەگى تۇرىك ليسەيلەرىن جابۋعا كىرىستى
رەسمي مالىمەتتەرگە سۇيەنسەك، قازىر 160 مەملەكەتتە مىڭنان اسا مەكتەپ بار. ءبىراق ولاردىڭ بارلىعى تۇركيا قولدايتىن مەكتەپتەر ەمەس. «سوندىقتان رەسمي انكارا قانشا ارەكەتتەنسە دە، ولاردى تۇگەل جاۋىپ تاستاۋ مۇمكىن ەمەس»، - دەيدى جەرگىلىكتى ساراپشىلار.
ليتسەيلەر جابىلسىن دەگەن جارلىق ءبىر جىل بۇرىن سول كەزدەگى تۇركيا پرەمەر- ءمينيسترى رەجەپ تايىپ ەردوعاننان تۇسكەن. وعان سەبەپ - «حىزمەت» قوزعالىسىنىڭ جەتەكشىسى فەتحۋللا گۇلەنمەن اراداعى ساياسي تەكەتىرەس. بىلتىر پارامەن ۇستالعان ءتورت ءمينيستردىڭ ىسىنە بيلىك باسىنداعىلاردىڭ قاتىسى بار دەگەن گۇلەندى ەردوعان ەل ءۇشىن قاۋىپتى دەپ، ونىڭ ەسىمىمەن بايلانىستى مەكتەپتەردى تۇگەل جابۋعا بۇيرىق بەردى.
احمەت ءداۋىتوعلۋ، تۇركيا پرەمەر- ءمينيسترى:
وكىنىشكە وراي، سوڭعى جىلدارى بۇل وقۋ وردالارى ءبىلىم بەرگەننەن گورى، مەملەكەتىمىزدى سىناۋمەن كوپ اينالىسۋدا. ەلدەگى تۇيمەدەي وقيعالاردى تۇيەدەي ەتىپ كورسەتىپ، ساياسي ىستەرگە ارالاسا باستادى. بۇل ءۇردىس ءبىر ەمەس، بارلىق ليتسەيلەردە ورىن الۋدا.
جاقىندا ەردوعان افريكانىڭ بىرنەشە مەملەكەتىنە ارنايى بارىپ، ارىپتەستەرىمەن كەلىسسوز جۇرگىزىپ قايتتى. ەفيوپيا بيلىگىنە «ەگەر ۇكىمەتتىك ەمەس تۇرىك ليسەيلەرى جابىلسا، ورنىنا 100 پايىز تۇركيانىڭ ءبىلىم مينيسترلىگىنە باعىناتىن مەكتەپ اشىپ بەرۋگە ءازىرمىز»، - دەدى. پرەزيدەنتتىڭ بۇل ارەكەتى تۇركياداعى ساياسي پارتيالاردىڭ شىمبايىنا باتتى.
وكتاي ۆۋرال، تۇركيا ۇلى ۇلتتىق ءماجىلىسىنىڭ دەپۋتاتى، ۇلتتىق قوزعالىس مۇشەسى:
بىرنەشە جىل بويى شەتەلدە مەملەكەتىمىزدىڭ كەڭىنەن تانىلۋىنا ۇلەس قوسقان ءبىلىم ورداسىن نە ءۇشىن جابادى؟ مەكتەپ اشۋعا رۇقسات بەرگەن ەلدەردەن ارىز- شاعىم تۇسپەسە، كىمگە زيانى بار؟ ناقتى سەبەبىن نەگە ايتپايدى؟ بۇل - قانشاما جىل ەڭبەك ەتىپ، ەلىمىز ءۇشىن تەر توككەن ازاماتتاردىڭ قۇقىعىن تاپتاۋ.
تۇرىك ساراپشىلارى «تۇركياداعى ليتسەيلەر جابىلسا، ءبىلىم سالاسى ايتارلىقتاي اقساپ قالادى» دەگەن پىكىردە. ايتا كەتەيىك، العاشقى مەكتەپتەر 90- جىلدار باسىندا شەت ەلدەردە جۇمىس ىستەيتىن تۇرىك كاسىپكەرلەرى كۇشىمەن اشىلعان.
قۇدىرەت التىندا، «Kadip» حالىقارالىق ۇيىمىنىڭ باس حاتشىسى:
سىرت ەلدەردە تۇرىك ليتسەيى دەپ اتالعانمەن، كوپ مەملەكەتتەردە تۇركياعا قاتىسى جوق. ەڭ كوبى 50/50. كەيبىرى ءتىپتى 100 پايىز سول ەلدىڭ ءبىلىم مينيسترلىگىنىڭ قاراماعىندا. ماسەلەن، قازاقستاندا. ۇستازدار مەن وقۋشىلار نەگە زارداپ شەگۋ كەرەك؟ ناقتى سەبەپ تە جوق. ۇكىمەت تولىق جابامىز دەسە، ەۋروپا، اقش- تاعى مەكتەپتەردى نەگە ۇمىت قالدىرعان؟ تەك ساناۋلى ەلگە ءوتىنىش ايتتى. بۇل ادىلەتسىزدىك.
تۇركيا بيلىگى بىرنەشە اي بۇرىن ءازىربايجان مەن تاجىكستان ەلدەرىنە ءوتىنىش- ەسكەرتۋىن ايتىپ، حات جولداعان. اتالعان ەكى مەملەكەتتەن دە «مەكتەپتەر جابىلدى» دەگەن رەسمي جاۋاپ بولمادى. سوندىقتان، تۇرىك ساراپشىلارىنىڭ ويىنشا، بۇل ءوتىنىشتىڭ ورىندالۋى وڭايعا تۇسپەيدى.
«استانا» ارناسى
