مەملەكەتتىك حاتشى «ابىلاي حاننىڭ ارمانىن» تاماشالايدى

قويىلىم قاليبەك قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا 7 - اقپان كۇنى ساعات 18.00 دە وتەدى، بۇل تۋرالى تەاتردىڭ باسپا ءسوز قىزمەتى حابارلادى.

بۇل تاريحي دراما ازداعان وڭدەۋدەن ءوتىپ، كورەرمەنگە قايتا ۇسىنىلادى. اۆتورى - بەلگىلى جازۋشى، جۋرناليست، زەرتتەۋشى، دراماتۋرگ دۋمان رامازان، رەجيسسەرى - قازاقستاننىڭ ەڭبەك سىڭىرگەن قايراتكەرى بولات ۇزاقوۆ.

«بۇل رامازان مەن ۇزاقوۆ شىعارماشىلىعىنداعى ەكىنشى تاريحي تۋىندى بولماق. بۇعان دەيىن 2010 -جىلى دراماتۋرگ پەن رەجيسسەر ۇندەستىگىندە «كەنەسارى - كۇنىمجان» اتتى تاريحي دراما دۇنيەگە كەلىپ، بۇگىنگى تاڭعا دەيىن كورەرمەننىڭ سۇرانىسىنا يە قويىلىمنىڭ ءبىرى بولدى»، - دەلىنگەن حابارلامادا.

ايتا كەتەيىك، «ابىلاي حاننىڭ ارمانى» اتتى تاريحي دراما ابىلاي حاننىڭ جوڭعار تۇتقىنىنا تۇسكەن كەزىنەن باستالادى. ابىلاي حاننىڭ قازاق حالقىن قيىندىقتاردان قالاي امان- ەسەن الىپ شىققانى باياندالادى. بۇل شىعارمادا ۇلى حاننىڭ كوشباسشىلىق قاسيەتىمەن بىرگە، ادامي بولمىسى، قايراتكەرلىگى، ساياساتكەرلىگى، پاراساتتىلىعى مەن ەرجۇرەك باتىرلىعى جان- جاقتى اشىپ كورسەتىلەدى. ابىلاي حاننىڭ رولىندە «قاسىم» فيلمىندە قازاقستاننىڭ حالىق قاھارمانى قاسىم قايسەنوۆتى، ەركىن جۋاسبەكتىڭ «تەرەڭ تامىرلار» اللەگوريالىق دراماسىندا ەلباسى نۇرسۇلتان نازاربايەۆتى سومداعان اكتەر قۋاندىق قىستىقبايەۆ وينايدى.

ەسكە سالايىق، بۇعان دەيىن مەملەكەتتىك حاتشى گۇلشارا ءابدىقالىقوۆانىڭ پرەزيدەنت نۇرسۇلتان نازاربايەۆقا الداعى مەرەيتويلىق داتالاردى - قازاق حاندىعىنىڭ 550 جىلدىعىن، ۇلى وتان سوعىسىنداعى جەڭىستىڭ 70 جىلدىعىن، كونستيتۋتسيانىڭ جانە قازاقستان حالقى اسسامبلەياسىنىڭ 20 جىلدىعىن مەرەكەلەۋگە دايىندىق بارىسى تۋرالى بايانداعانى حابارلانعان ەدى.

نۇرسۇلتان نازاربايەۆ وسى ءىس-شارالاردىڭ جاستاردى پاتريوتتىق رۋحتا تاربيەلەۋ، مەملەكەتتىلىكتى نىعايتۋ، سونداي-اق رەسپۋبليكادا بىرلىك پەن كەلىسىمدى قامتاماسىز ەتۋ ءۇشىن ماڭىزدىلىعىن اتاي وتىرىپ، ورتالىق جانە وڭىرلىك دەڭگەيدە تياناقتى ۇيىمداستىرۋ قاجەتتىگىنە نازار اۋداردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى