موڭعوليانىڭ ەكىنشى ءنومىرلى دزيۋدوشى قىزى قازاقستان ازاماتتىعىن الماق
«موڭعوليا سپورتشىسىنا توقتالاتىن بولساق، بۇل باعىتتاعى شارالار بىرىنشىدەن تاجىريبە الماسۋ ماقساتىندا ىسكە اسىرىلۋدا. وسى ورايدا اتالعان ەلمەن ءتيىستى مەموراندۋمعا قول قويعان بولاتىنبىز. ول موڭعوليانىڭ ەكىنشى ءنومىرلى سپورتشىسى، سونىمەن بىرگە قازىرگى كەزدە الەمدىك رەيتينگتە بەسىنشى ورىندا تۇر. ءبىراق، قازاقستان ازاماتتىعىن العاننان كەيىن ونىڭ وسىنىڭ الدىنداعى سپورتتىق جەتىستىكتەرى تۇگەل جويىلادى. ول جاڭادان باستاپ رەيتينگكە جۇمىس ىستەيدى»، - دەدى فەدەراتسيانىڭ ءبىرىنشى ۆيتسە-پرەزيدەنتى.
وسى ورايدا م. مىقتىبەكوۆ تاجىريبە الماسۋدىڭ بۇنداي ۇدەرىسىنەن قازاقستان قۇراماسىنىڭ ۇتار تۇستارى كوپ ەكەنىن اتاپ ءوتتى.
بۇدان بۇرىن حابارلانعانداي، موڭعوليا دزيۋدو فەدەراتسياسىنىڭ اتقارۋشى ديرەكتورى ازامات بوحبات پەن قازاقستان دزيۋدو فەدەراتسياسىنىڭ ۆيتسە-پرەزيدەنتى سامات جىلقىبايەۆ ۇلان-باتىردا ىنتىماقتاستىق تۋرالى مەموراندۋمعا قول قويدى. كەلىسىم ماڭىزدى ماسەلەلەردى، ونىڭ ىشىندە قازاقستان وليمپيادالىق قۇراماسىنا كەلەشەگى زور موڭعول سپورتشىسى گالبادراحىن وتگونتسەتسەگتى ەنگىزۋدى قامتيدى.
گالبادراحىن 2016-جىلى ريو-دو-جانەيرودا وتەتىن وليمپيادا ويىندارىنا قاتىسۋ قۇقىعىن جەڭىپ العان. سپورتشى - استانا گران-پري التىن مەدالىنىڭ، ماسكەۋدەگى ۇلكەن دۋلىعا تۋرنيرىنىڭ قولا مەدالىنىڭ، قىتايداعى چينداو گران-پريىنىڭ قولا مەدالىنىڭ يەگەرى.
اۆتور: رۋسلان عابباسوۆ
