دوپتى حوككەي: «اقجايىق» ءوز ايدىنىنداعى سوڭعى كەزدەسۋىن جەڭىسپەن اياقتادى

باتىس قازاقستاندىقتار «دينامو-قازان-2» كومانداسىمەن ەكىنشى ويىندا دا باسىمدىلىق كورسەتىپ، 7:2 ەسەبىمەن جەڭىسكە جەتتى. بۇل كەزدەسۋدە «اقجايىقتىڭ» كاپيتانى، قازاقستان ۇلتتىق قۇراماسىنىڭ مۇشەسى ەسكەندىر نۇعمانوۆ بەس بىردەي دوپتىڭ اۆتورى اتاندى. سونداي-اق سامات امانشين مەن سەرگەي باشايەۆ ءبىر-ءبىر گولدان ەنگىزدى.

وسى ماتچتان كەيىن 44 ۇپاي جيناعان «اقجايىق» ەكىنشى توپتا ازىرگە ءبىرىنشى ورىندا كەلەدى. الايدا باسقا كوماندالاردىڭ ويىنى كەم، سوندىقتان ورالدىقتارعا فينالدىق سايىستارعا قاتىسۋعا مۇمكىندىك بەرەتىن العاشقى ۇشتىككە ىلىگۋ قيىنعا تۇسەدى. ويتكەنى ولار قالعان ءتورت كەزدەسۋىن سىرت ايدىندا توپ جەڭىمپازدىعىنان ۇمىتكەر مىقتى كوماندالار بولىپ ەسەپتەلەتىن ورىنبوردىڭ «لوكوموتيۆى» جانە ساراتوۆتىڭ «ۋنيۆەرسالىمەن» وتكىزەدى.

ايتا كەتەيىك، «اقجايىق» ءوز ايدىنىنداعى كەزدەسۋلەرىنىڭ بىرەۋىنەن («ۋنيۆەرسالمەن» عانا تەڭ وينادى) باسقاسىنىڭ بارىندە قارسىلاستارىن ۇتتى. ەسەسىنە سىرت ايدىنداعى ويىندارىندا ءساتسىز ونەر كورسەتىپ، بار بولعانى ءتورت ۇپايعا قول جەتكىزدى.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى