ا ق ش- تا ەكولوگيالىق تازا كولىكتەردىڭ كورمەسى وتۋدە
ەندەشە ا ق ش استاناسىندا ءوتىپ جاتقان ءداستۇرلى ۆاشينگتون اۆتوشوۋى دا بيىلعى ۇسىنۋىن «جاسىل» ەكونوميكا جەتىستىكتەرىنە تەگىن ارناماسا كەرەك- ءتى.
ا ق ش استاناسىندا جىل سايىن كولىك كورمەسىن وتكىزۋ جاقسى داستۇرگە اينالعان. ايگىلى دەترويت پەن نيۋ- يورك كورمەلەرىنەن كەم تۇسپەيتىن الاڭنان Toyota, Lexus, Mercedez, Volkswagen جانە تاعى باسقا برەندتەردىڭ كەز كەلگەن ءونىمىن تابۋعا بولادى. كەلەمىن دەۋشىلەرگە ەسىك اشىق. ال تورگە الەمدىك 42 كومپانيانىڭ جيىنى - 700 گە جۋىق كولىگى جايعاسىپتى. ۆاشينگتون جاھاندىق كولىك كورمەسىنىڭ كوركىن قىزدىرۋدا. التى قۇرلىققا اتى تانىمال اۆتو الپاۋىتتاردىڭ ەڭ سوڭعى جەتىستىكتەرى كوز الدىڭىزدا. جايداق، جول تالعامايتىن، سپورتتىق جانە تاعى باسقا تۇرلەر.. .
الايدا اۋەلى اۋقاتتى تاپقا ارنالعان ونداي تەمىر تۇلپارلاردىڭ تىزگىنى قاراپايىم جۇرتقا تاياۋ ارادا بۇيىرا قويماسى تۇسىنىكتى. سوندا دا «ءجۇز ەستىگەننەن ءبىر كورگەن ارتىق» دەپ بىلەتىن دەرريل ءۇشىن بۇگىن ارمانىنداعى ارعىماعىن قاسىنان سيپاپ كورەتىن كۇن تۋدى دەسە دە بولادى.
دەرريل كوللينز، ۆاشينگتون تۇرعىنى:
- ۇناتقان كولىكتەرىمنىڭ تۇگەلىن قاراپ شىقتىم. ءبىراق قازىر الاتىن شامام جوق. قارتايعانعا تامان ولجالايتىن شىعارمىن.
كورمەدەگى بيىلعى جاڭالىق - ەكولوگيالىق تازا، «جاسىل» تەحنولوگيا ونىمدەرىن جارنامالاۋعا ويىسقان. مىسالى، BMW اۆتوكولىگىنىڭ і8 ۇلگىسىندەگى ءتۇرى سول ساناتتاعىلاردىڭ قاتارىندا. كولىك ساۋىتى كومىرتالشىقتارىنان جاسالعان. ناتيجەسىندە سالماعى ازايىپ، جانارماي شىعىنى كەمىگەن. قۇنى 140 مىڭ ا ق ش دوللارىن القىمدايدى. ىشىنەن ەمەس، اينەگىنەن كورىنىپ تۇر.
جۇرتتىڭ نازارىن اۋدارعان تاعى ءبىر ترەند - Lexus- ءتىڭ قىزعىلت- سارى تۇسكە ەنۋى.
ناتالي كينگ، ءونىم جونىندەگى مامان:
- ۇسىنىلعان كولىكتەرىمىزدىڭ وتباسىلىق ماقساتتا، قىدىرىسقا نەمەسە جىلدامدىق قۋۋعا ارنالعانىن ايتقىمىز كەلەدى. قالاساڭىز، قوزعالتقىش كولەمى 5 ليترگە، ال قۋاتى 467 اتتىڭ كۇشىنە تەڭ تەمىر تۇلپاردى ەمىن- ەركىن جۇگەندەي الاسىز.
قازىر ەلەكتروكار اتاۋلىسى ەشكىمگە تاڭسىق ەمەس. ءبىراق كۇنمەن جۇرەتىن كولىكتى كوردىڭىز بە؟ بار- جوعى 70 كەلى بولاتىن ماشينانى امەريكالىقتار ۇسىنىپ وتىر. كولىك قۇرالى توبەسىندەگى كۇن پلاستينكالارى ارقىلى قۋات الادى جانە قوردى قوسىمشا توقپەن دە تولىقتىرىپ قويۋعا بولادى. جالعىز اتتىڭ كۇشى بولسا دا، ساعاتىنا 50 شاقىرىمدى وڭاي ەڭسەرەدى.
توماس كولكلاسۋرە، كولىك تانىستىرۋشى:
- باعاسىنا كەلسەك، 5 مىڭ ا ق ش دوللارىنان باستالادى. بۇل نەگىزىنەن ۆەلوسيپەد تۇرىنە جاتادى. ەشقانداي جۇرگىزۋشى كۋالىگىن نەمەسە مەملەكەتتىك تىركەۋدى قاجەت ەتپەيدى.
سالا ماماندارى بۇگىندە حالىق تالعامى ەكولوگيالىق تازا كولىك تۇرلەرىنە قاراي اۋىپ بارا جاتقانىن قۋاتتايدى. ءبىراق ونداي ونىمدەردىڭ وزىندىك قۇنى دا ازىرگە ارزان بولماسى انىق. اۆتوشوۋ اپتا سوڭىنا دەيىن جالعاسادى.
