تاسجولداردىڭ بويى - ناعىز تابىستىڭ كوزى

قىزمەت كورسەتۋ كەشەنىندە 40 ادام جۇمىسپەن قامتىلعان. بۇرىن جول بويىنداعى كەزدەسكەن ءدامحانادان اۋقاتتانىپ، تۇنەيتىن ورىن ىزدەۋگە ءماجبۇر بولاتىن كولىك جۇرگىزۋشىلەرى امبەباپ كەشەننىڭ اشىلعانىنا قۋانىشتى. «كەمپينگ» ىسكە قوسىلعان اپتاعا جەتپەيتىن ۋاقىتتا ونىڭ قىزمەتىن 100 دەن اسا ادام پايدالانىپتى.

ەربول ءابىلوۆ بەس جىلدان بەرى كولىك رولىندە. الىس- جاقىن شەتەلدەردە دە بولدى. «بەرىسى مىڭ شاقىرىم اۋماقتا مۇنداي نىسان جوق»، - دەيدى ول. قازىر «كەمپينگكە» اينالعان بۇل نىسان بۇرىنعى ءسۇت زاۋىتى ەدى. 20 جىلداي قاڭىراپ تۇرىپ قالعان عيمارات، بۇگىندە ادام تانىماستاي وزگەرگەن. قوناق ءۇي، تاماقتانۋ ورنى، دۇكەن مەن اقشا ايىرباستاۋ پۋنكتى تاۋلىك بويى جۇمىس ىستەيدى.

جۇك ساقتايتىن قويمانىڭ دا قۇرىلىسى تاياۋدا اياقتالادى. قارابالىق كەنتى رەسەيمەن شەكارالاس اۋماقتا، حالىقارالىق الماتى ەكاتەرينبۋرگ تاسجولىنىڭ بويىندا جاتىر. كۇنىنە بۇل جەردەن جۇزدەگەن جۇك كولىكتەرى وتەدى. وبلىس كاسىپكەرلەرى تاعام ءوندىرۋدى ۇلعايتقالى قاتىناس ءتىپتى قىزا تۇسكەن.

الماس سۇلتانوۆ، قارابالىق اۋدانى اكىمىنىڭ ورىنباسارى: - ءبىرىڭعاي ەكونوميكالىق كەڭىستىك اشىلعالى ءارلى-بەرلى وتەتىن كولىكتەر لەگى كوبەيدى. رەسەيلىكتەر ءجيى قاتىنايدى. ولاردى ءبىزدىڭ اۋداندا وندىرىلەتىن ازىق-تۇلىك قىزىقتىرادى. سوڭعى بەس جىلدا قوستاناي وبلىسىنىڭ كەدەندىك وداق ەلدەرىمەن سىرتقى ساۋدا اينالىمى 2,5 ەسە ارتىپ، 1,5 ميلليارد ا ق ش دوللارىنا جەتكەن.

جەرگىلىكتى كاسىپكەرلەر رەسەيدىڭ كورشى ايماعىنا نەگىزىنەن قيىرشىق تاس، بيداي، كونديتەر ونىمدەرى مەن ەليتالى استىق تۇقىمىن، ازىق-تۇلىك تاسيدى. قارابالىقتىقتار جاڭا اشىلعان ورتالىقتى تابىس كوزى عانا ەمەس، وتاندىق ءونىمدى وتكىزۋدىڭ قوسىمشا مۇمكىندىگى دەپ بىلەدى.

اۆتورلارى: ابىلاي ماۋدانوۆ، ەرمەك مۇحامەدياروۆ

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى