نيۋ-يوركتە ب ۇ ۇ-نىڭ شتاب-پاتەرىندە ق ر پرەزيدەنتىنىڭ حالىقارالىق باستاماسى - اتوم جوباسىنا قولداۋ كورسەتتى
بۇل تۋرالى ق ر س ءى م باسپا ءسوز قىزمەتىنەن حابارلادى.
كونفەرەنتسيا جۇمىسىنا قاتىسقان دۇنيە جۇزىنىڭ 800 دەن استام عالىمى، ازاماتتىق قوعام وكىلدەرى، ستۋدەنتتەر مەن باسقا دا بەلسەندىلەر، ب ۇ ۇ تاريحىنان حاباردار بولدى. سونداي-اق دەلەگاتتار ب ۇ ۇ دامۋ، قارۋسىزدانۋ، بىتىمگەرشىلىك جانە باسقا دا سالالارداعى جەتىستىكتەرىمەن تانىستى.
ءماجىلىس اياسىنداعى اقپارات جارمەڭكەسى بارىسىندا ب ۇ ۇ جانىنداعى ق ر تۇراقتى وكىلدىگى ءىس-شاراعا قاتىسۋشىلاردىڭ نازارىنا ق ر پرەزيدەنتى ن. نازاربايەۆتىڭ حالىقارالىق باستاماسى - اتوم جوباسىن ۇسىندى.
بىلتىرعى جىلداعىداي، قاتىسۋشىلار جوباعا كەڭ قولداۋ تانىتتى. دەلەگاتتار قازاقستانداعى كەڭەستىك زامانداعى يادرولىق سىناقتاردىڭ قايعىلى تاريحىمەن، يادرولىق قارۋسىزدانۋ ۇردىسىنە ەلىمىزدىڭ قوسقان ۇلەسىمەن، سونداي-اق تاراپتاۋ رەجىمىن كۇشەيتۋگە جانە عالامدىق يادرولىق قارۋسىزدانۋ سالاسىنداعى ەلەۋلى پروگرەسكە جەتۋگە باعىتتالعان دايەكتى قادامدارمەن تانىستى.
اقپاراتتىق جارمەڭكە بارىسىندا كونفەرەنتسيانىڭ جۇزدەن استام قاتىسۋشىلارى يادرولىق سىناقتارعا جاپپاي تيىم سالۋ تۋرالى شارتتىڭ كۇشىنە ەنۋىنە قول جەتكىزۋ جانە يادرولىق قارۋدان ازات الەمگە جەتۋگە باعىتتالعان ماڭىزدى جاڭا قادام جاساۋ تۋرالى الەم ۇكىمەتتەرىنە ارنالعان ۇندەۋى بار اتوم جوباسىنىڭ ونلاين-پەتيتسياسىنا قول قويدى.
